ЗША паскорылі перакідку дэсантных караблёў і тысяч марскіх пехацінцаў для магчымай высадкі ў Іране
Агульная колькасць можа скласці каля 8 тысяч вайскоўцаў, з якіх да 5 тысяч — марскія пехацінцы.
ЗША вырашылі паскорыць перакідку дэсантных караблёў і тысяч марскіх пехацінцаў на Блізкі Усход на фоне працяглай ваеннай аперацыі супраць Ірана, паведамілі NBC і Newsmax са спасылкай на інфармаваныя крыніцы.
Паводле іх слоў, 11‑ы экспедыцыйны корпус марской пяхоты (MEU), які налічвае не менш за 2,2 тыс. марскіх пехацінцаў, адправіцца з Сан-Дыега раней запланаванага тэрміну — ужо ў бліжэйшыя дні. Вайскоўцы будуць размешчаны на борце дэсантнага карабля USS Boxer.
Разам з ім да берагоў Ірана накіруюцца яшчэ два дэсантныя транспартныя караблі — USS Portland і USS Comstock. Яны павінны даставіць да месца прызначэння знішчальнікі F-35, ракеты і тэхніку для высадкі дэсанту на сушы.
Чакаецца, што флатылія пройдзе праз Інда-Ціхаакіянскі рэгіён да Блізкага Усходу, дзе злучыцца з дэсантным караблём USS Tripoli. Пазней да аперацыі далучыцца крэйсер USS New Orleans і карабель-док USS Rushmore.
У выніку агульная колькасць асабовага складу, які будзе перакінуты ў зону канфлікту, можа скласці каля 8 тысяч вайскоўцаў, з якіх да 5 тысяч — марскія пехацінцы.
Раней пра тое, што адміністрацыя прэзідэнта ЗША разглядае магчымасць адпраўкі на Блізкі Усход дадатковых войскаў для наземнай аперацыі супраць Ірана, паведамлялі крыніцы Reuters. Сярод варыянтаў, што абмяркоўваюцца: высадка дэсанту на ўзбярэжжы Армузскага праліва для забеспячэння бяспечнага праходу танкераў, адпраўка сухапутных падраздзяленняў на востраў Харк, праз які праходзіць да 90% іранскага нафтавага экспарту, а таксама захоп наяўных у Ірана запасаў высокаўзбагачанага ўрану.
Каментары