У Стамбуле праз моцныя паводкі загінулі два чалавекі, сотні жыхароў эвакуявалі. Адной з ахвяр стаў 14‑гадовы падлетак, якога ўдарыла токам, калі ён наступіў у лужыну. Другі загінулы — 34‑гадовы мужчына. Ён паслізнуўся, калі спрабаваў перайсці дарогу, упаў і ўдарыўся галавой аб тратуар, піша Бі-бі-сі.
Па словах намесніка мэра Стамбула Нуры Аслана, ратавальнікі вывезлі ў бяспечныя месцы 595 чалавек, якія аказаліся заблакаванымі праз паводку. У некаторых раёнах горада аўтамабілі цалкам апынуліся пад вадой. Да ліквідацыі наступстваў стыхіі прыцягнулі больш за 8000 супрацоўнікаў экстранных і камунальных службаў.
Губернатар правінцыі Давут Гюль заклікаў жыхароў не выходзіць з дому без крайняй неабходнасці. Абставіны гібелі падлетка расследуе губернатарская адміністрацыя.
Паводле слоў міністра ўнутраных спраў Турцыі, у некаторых раёнах Стамбула выпала столькі ападкаў, колькі складае адна сёмая частка сярэднегадавой нормы. Паколькі дажджы, як чакаецца, працягнуцца, улады распарадзіліся закрыць школы ў чацвер і пятніцу.
Нуры Аслан заклікаў жыхароў быць асабліва пільнымі праз чаканыя моцныя дажджы і шторм, асабліва ў начны час. Ён таксама параіў карыстацца грамадскім транспартам замест асабістых аўтамабіляў. Працу стамбульскага метро працягнулі да другой гадзіны ночы.
Непагадзь парушыла і авіязносіны: паводле Турэцкай службы Бі-бі-сі, 46 самалётаў не змаглі прызямліцца ў аэрапортах Стамбула.
У раёне Сарыер затапіла паркоўку гандлёвага цэнтра, дзе пад вадой апынуліся некалькі аўтамабіляў. Мясцовыя СМІ таксама паведамлялі пра абвалы асобных участкаў дарог і выхад адной з рэк з берагоў.
У стамбульскай агламерацыі жывуць больш за 16 мільёнаў чалавек. Міністэрства ўнутраных спраў Турцыі папярэдзіла таксама пра небяспеку раптоўных паводак у іншых правінцыях краіны.
15 кастрычніка дзяржаўным служачым з інваліднасцю, цяжарным жанчынам і ветэранам далі адміністрацыйны выхадны. Выключэнне зрабілі для супрацоўнікаў аховы здароўя, службаў бяспекі і тых, хто займаецца адвядзеннем дажджавой вады.
Акрамя таго, ад працы вызвалілі жанчын, занятых у дзяржаўным сектары, якія маюць дзяцей ва ўзросце да васьмі гадоў.
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек44
Каментары