Меркаванні

Nashaniva.com

22.10.2026 / 08:42

Статкевіч: Калі Беларусь возьме ўдзел у агрэсіі супраць NATO ці стане тылам для такіх дзеянняў, то ўдар NATO па Беларусі будзе непазбежным

Мікола Статкевіч параўнаў падтрымку Лукашэнкі Крамлём з ханскім ярлыком на княжанне. За захаванне ўлады Лукашэнка плаціць усё большую цану, і гэта можа надта дорага абысціся беларусам, піша палітык.

Аляксандр Лукашэнка і Уладзімір Пуцін. Фота: Maxim Shipenkov Pool Photo via AP

Была ў манголаў такая традыцыя: прэтэндэнты на княскія пасады ў залежных ад іх землях павінны былі атрымаць дазвол на княжанне, адна з назваў якога — «ярлык». Каб атрымаць «ярлык», трэба было не толькі прапаўзці на жываце дзясяткі метраў у ханскую юрту, але і пагадзіцца на пэўныя саступкі і паслугі хану Арды. Матэрыяльныя ці палітычныя.

Вядома, што найбольшы плён ад тых поўзанняў, саступак ды паслуг займелі маскоўскія князі. Таму гэтая традыцыя настолькі ўкаранілася ў Маскве, што спадкаемцы тых князёў ужо самі даюць сваім сатэлітам дазвол на кіраванне паводле таго ж прынцыпу — пасля самапрыніжэння і саступак.

У найноўшай беларускай гісторыі працэдура атрымання «ярлыка» адбывалася ледзь не перад кожнымі прэзідэнцкімі «выбарамі». Схема заўсёды аднолькавая. Напярэдадні «выбараў» Крэмль дэманструе пахаладанне ў стаўленні да галоўнага кандыдата і нават імкненне падтрымаць альтэрнатыву яму. Сярод тутэйшых «сілавікоў» пачынаюцца хістанні — яны выдатна разумеюць, на чым стаіць уся сістэма. Як казаў мне адзін з іх: «Пакуль з намі Масква, а ў яе ёсць нафта, мы можам спаць спакойна». А тут нібыта ўжо «не з намі». Пачынаюцца сумненні.

Але напярэдадні «выбараў» галоўны кандыдат едзе ў Маскву. Не ведаю, як там наконт поўзання, бо ўсё адбываецца закрыта ад прэсы і публікі, але ўрэшце бакі падпісваюць дамову з чарговымі саступкамі і дэманструюць «саюзныя» адносіны. «Сілавікі» супакойваюцца і забяспечваюць звычайны вынік «выбараў».

Толькі з кожнымі новымі «выбарамі» саступкі суверэнітэту ўсё большыя.

Пасля 2020 года была саступлена наша тэрыторыя для нападу на Украіну. Цяпер Масква, паводле інфармацыі заходніх разведак, рыхтуецца да сілавых дзеянняў супраць суседніх краін NATO. Без выкарыстання нашай тэрыторыі такая справа наўрад ці абыдзецца.

Калі ж Беларусь возьме ўдзел у агрэсіўных дзеяннях супраць NATO ці стане тылам для такіх дзеянняў, то ўдар сіл NATO па нашай тэрыторыі будзе непазбежным. Незалежна ад таго, казаў пра гэта публічна ці не казаў які-небудзь натаўскі генерал.

Падобна, што кошт «ярлыка» шалёна падняўся. Але ўрэшце ён можа абысціся вельмі дорага найперш беларусам, а таксама ўсім суседнім з намі народам.

Толькі вольная, бяз’ядзерная ды нейтральная Беларусь можа прадухіліць канфлікт у Еўропе, а значыць, і ва ўсім свеце.

Чытайце яшчэ

Каментары

Цяпер чытаюць

Палітолаг Валер Карбалевіч назваў самы важны дзень у сваім жыцці

У Беларусі абмежавалі доступ да сайтаў з-за мяжы праз небяспечныя памылкі ў PHP

У Беларусі здымаюць серыял пра «СВА». Набіраюць масоўку на дыверсантаў, а сярод акцёраў — былы міністр Руслан Чарнецкі

У Еўропе абмяркоўваюць, хто мог бы весці перамовы з Пуціным ад яе імя1 1