Sport ścisła

Jury Puntus paćvierdziŭ rename samaha paśpiachovaha biełaruskaha trenera. Pad jahonym kiraŭnictvam barysaŭskaje BATE ni razu nie zastavałasia pa-za pjedestałam čempijanatu. Hod pracy ŭ MTZ-RIPA — i kamanda z 14-ha letašniaha miesca skočyła na treciaje miesca, zavajavaŭšy «bronzu». Pryjšoŭ, pabačyŭ, pieramoh.

Vyniki futbolnaha sezonu

5 listapada zaviaršyŭsia 15-ty čempijanat Biełarusi pa futbole ŭ vyšejšaj lizie. Kančatkovaje raźmierkavańnie kamandaŭ u turnirnaj tablicy nastupnaje: «Šachtar» (Salihorsk) — 63 punkty, «Dynama» (Miensk) — 50, MTZ-RIPA (Miensk) — 49, «Tarpeda» (Žodzina) i BATE (Barysaŭ) — pa 47, «Dniapro-Transmaš» (Mahiloŭ) — 43, «Homiel» — 39, «Dynama» (Bieraście) — 36, «Naftan» (Navapołacak) — 33, «Daryda» (Ždanovičy) — 29, «Lakamatyŭ» (Miensk) — 26, «Nioman» (Horadnia) — 24, «Zorka-BDU» (Miensk) — 14, «Słavija» (Mazyr) — 11. Vyšejšuju lihu pakinuli «Zorka» i «Słavija», im na źmienu pryjšli «Lakamatyŭ» (Viciebsk) i babrujskaja «Biełšyna».

«Šachtar» na nastupny hod vystupić u kvalifikacyi Lihi čempijonaŭ, mienskaje «Dynama» — u Kubku UEFA, MTZ-RIPA ŭ Kubku Intertota.

Najlepšym bambardziram druhi raz zapar staŭ forvard «Naftanu» Valer Strypiejkis: na jaho rachunku 16 miačoŭ.

Samsonaŭ trymaje marku

Uładzimier Samsonaŭ staŭ pieramožcam turniru «Russian Open» seryi «Pro tour» pa nastolnym tenisie, što prajšoŭ u Sankt-Pieciarburhu. U finale biełarus 6 listapada abyhraŭ letašniaha pieramožcu spabornictvaŭ hreka Kalinikasa Kreanhi ź likam 4:0. Sioleta ŭ biełarusa heta druhaja pieramoha na turnirach «Pro tour». Pieršaja była atrymana ŭ studzieni ŭ Charvatyi.

Da finału ŭ žanočym parnym razradzie dajšli siostry Vieranika i Viktoryja Paŭłovič. Tut jany sastupili vuhorkam Krystynie Tot i Hiearhinie Pota ź likam 1:4.

Mirny na panižeńni

Niaŭdały vystup na turniry seryi «Masterz» u Paryžy adbiŭsia na pazycyjach Maksa Mirnaha ŭ rejtynhu Asacyjacyi tenisistaŭ-prafesijanałaŭ. U rejtynhu, što ŭličvaje pakazčyki spartoŭcaŭ za apošnija 52 tydni, Mirny apuściŭsia z 28-ha na 35-je miesca, u čempijonskaj honcy-2005 — z 33-ha na 34-je, u rejtynhu parnych hulcoŭ — z 2-ha na 4-je.

Šaniec papravić stanovišča ŭ parnym rejtynhu ŭ biełarusa jość. 13 listapada ŭ Šanchai pačniecca finalny turnir seryi «Masterz» — «Tennis Masters Cup». M.Mirnamu j švedu Junasu Bjorkmanu buduć procistajać najmacniejšyja pary śvietu — braty Bob i Majk Brajany (ZŠA), biełaskuryja zymbabvijcy Ŭejn Błejk i Kievin Uljet, Mark Noŭłz (Bahamy) i Denieł Nestar (Kanada), Stefan Hjuz (Aŭstralija) i Ŭeśli Mudaj (PAR), Mišel Ładra i Fabrys Santaro (abodva — Francyja), Leandar Pajes (Indyja) i Nienad Zimońjič (Serbija).

Paralelna ŭ Šanchai projdzie i turnir najmacniejšych indyvidualnych hulcoŭ. Matčy abiacaje pakazvać u žyvym etery kanał «Eŭrasport». Jość na što pahladzieć.

AR, atptennis.com, belapan.com

• 0
• 0
• 0
• 0
• 0
• 0
• 0
• 0