17 listapada ŭ Akademii navuk Litvy prajšła kanferencyja «Pachodžańnie litoŭskaha hienomu». Na im prafesar Vilenskaha ŭniversytetu Vajducis Kučynskas paviedamiŭ pra vyniki apošnich daśledavańniaŭ u Litvie. Akazałasia, što ŭ hienomie litoŭcaŭ značnuju častku składajuć takija spałučeńni DNK, jakija najčaściej ułaścivy azijackim nacyjam — prykładna 37% u hienomie mužčynaŭ. Inšy istotny kampanent litoŭskaha hienomu — heta peŭnaja prymieta, charakternaja dla Centralna-Ŭschodniaj Eŭropy.
Pačatak XXI st. byŭ admietny abviaščeńniem vynikaŭ pieršaha etapu mižnarodnaha prajektu «Hienom čałavieka». Navukoŭcy ŭ Londanie i Vašynhtonie ŭ 2000 h. paviedamili, što zdoleli amal całkam rasšyfravać paśladoŭnaść nukleatydaŭ, jakija składajuć bolš jak 80 tysiačaŭ hienaŭ čałaviečaha arhanizmu.
Častku prajektu składała daśledavańnie na dobraachvotnikach — adna z kampanij-udzielnic daśledavała DNK 24-ch ananimnych dobraachvotnikaŭ roznych rasaŭ i nacyj, druhaja — piaci svaich supracoŭnikaŭ. Było znojdziena pad try miljony adroźnieńniaŭ pamiž indyvidami, i mienavita indyvidualnych adroźnieńniaŭ u hienach było značna bolš, čym rasavych.
Daśledavańni «hienetyčnaje mapy» čałavieka, jakija pravodziacca u śviecie, najpierš skiravany na medycynskija mety. Siarod daśledčykaŭ z roznych halinaŭ navuki pieravažaje mierkavańnie, što sutnaść i admietnaść i ludziej jak asobaŭ, i nacyjaŭ nia ŭkładvajecca tolki ŭ tuju ci inšuju kambinacyju hienaŭ.
Kamientary