Nazirajučy za subotnikami, kaśboj dy i prosta navinami, jakija tyčacca kiraŭnika krainy, možna akreślić prykładnaje koła blizkich da Łukašenki ludziej. Jak praviła, heta adnyja i tyja ž paplečniki — biznesoŭcy, spartoŭcy, čynoŭniki. Ale ž čym žyvuć užo darosłyja dzieci nabližanych da prezidenta?
Alaksandr Šakucin
Adzin z najbahaciejšych čalcoŭ prezidenckaj «zbornaj pa kaśbie» Alaksandr Šakucin — viadomy biznesoviec, jon suŭładalnik chołdynha «Amkador».
Syn biznesoŭca, 32-hadovy Alaksandr Šakucin-małodšy, skončyŭ jurydyčny fakultet BDU i ŭvajšoŭ u baćkaŭ biznes. Jon dyrektar «Spamaš Hrup». Heta jašče adzin chołdynh, jaki zajmajecca dystrybucyjaj pramysłovaj techniki.
Darečy, «Spamaš» - heta nie prosta nabor litar. Nazva rasšyfroŭvajecca jak «Śvietłaj pamiaci Mašy Šakucinaj». Maryja Šakucina — dačka biznesoŭca, jakaja pamierła ŭ 2000-yja pry trahičnych abstavinach.
Siarhiej Ciacieryn
Siarhiej Ciacieryn — były tenisist, a siońnia trenier i biznesoviec. Jon taksama nie adnojčy byŭ zaŭvažany pobač z Łukašenkam: kasiŭ travu, źbiraŭ bulbu i kavuny, lataŭ na zimovuju Alimpijadu ŭ Sočy.
Tenisist Ciacieryn siońnia — dyrektar chołdynha «BiełHłobałStart». U chołdynh uvachodzić niekalki kampanij, jakija zajmajucca prodažam mebli, charčavańnia, karmoŭ dla žyviołahadoŭli, śpiecyjalnaha spartovaha charčavańnia.
U adnoj z takich daččynych kampanij — «BiełHłobałStar» — pracuje i dačka Siarhieja. Taćciana Ciacieryna zajmaje pasadu dyrektara pa kamiercyjnych pytańniach.
«BiełHłobałStar» vałodaje sietkaj baraŭ «Blockbuster», jakija znachodziacca ŭ minskich kinateatrach. Darečy, kampanija zajmajecca vytvorčaściu papkorna. Siarod aktyvaŭ «BiełHłobałStar» papularny vinny bar «Svabody, 4».
Juryj Čyž
Jury Čyž, napeŭna, siońnia ŭžo nie ŭvachodzić u koła prezidenckich siabroŭ. Ale ž da zatrymańnia biznesoviec źjaŭlaŭsia adnym z najbližejšych da Łukašenki ludziej.
Starejšamu synu aliharcha Siarhieju — 28 hadoŭ. Siarhiej Čyž advučyŭsia ŭ Anhlii. Spačatku skončyŭ univiersitet u Łondanie, paśla była mahistratura ŭ Oksfardzie.
Atrymaŭšy adukacyju za miažoj, Siarhiej viarnuŭsia ŭ Biełaruś, dzie baćka ŭziaŭ syna pad kryło. Siarhiej pracavaŭ namieśnikam dyrektara ŭ sietcy hipiermarkietaŭ «ProStore», zatym dyrektaram kampanii «Prastor Trejd», jakaja kiruje piaćciu hipiermarkietami Prostore u Minsku.
Kali Čyž-starejšy byŭ zatrymany, «Trajpł» uznačaliŭ mienavita Siarhiej.
Ź ciaham času Siarhiej Čyž aficyjna zaniaŭ pasadu dyrektara kampanii. A vyzvaleny baćka ŭznačaliŭ naziralnuju radu «Trajpła».
Druhomu synu aliharcha — 21 hod. Uładzimir Čyž pastupaŭ u BNTU, ale paśla pajšoŭ u vojska. Słužyŭ u Marjinaj Horcy. Ciapier Uładzimir vučycca ŭ minskim filijale Rasijskaha dziaržaŭnaha sacyjalnaha ŭniviersiteta.
Dačka Taćciana, jak i jaje starejšy brat Siarhiej, atrymała vydatnuju adukacyju za miažoj — jana vučyłasia ŭ Šviejcaryi, vyvučała hatelny i restaranny biznes.
Dačka Juryja Čyža pracuje razam z maci ŭ elitnym vełnies-kłubie EVO. Taćciana — pieršy namieśnik dyrektara pa servisu.
Uładzimir Kanaploŭ
Uładzimir Kanaploŭ — eks-pamočnik Łukašenki, były staršynia Pałaty pradstaŭnikoŭ. Akramia taho — ziamlak Łukašenki. Siońnia jon uznačalvaje Biełaruskuju fiederacyju handboła.
Kanaploŭ maje dvoje synoŭ. Starejšy Mikałaj skončyŭ fakultet mižnarodnych znosinaŭ BDU, paśla vučyŭsia ŭ Piekinskim univiersitecie, pracavaŭ pradstaŭnikom Hankonhskaj handlova-pramysłovaj kampanii «Hłedzis» u Piekinie. Byŭ alimpijskim ataše biełaruskaj delehacyi na piekinskich hulniach 2008 hoda. Zatym Mikałaj Kanaploŭ, pa słovach baćki, adkryŭ svoj biznes u Kitai.
Siońnia Mikałaj Kanaploŭ žyvie ŭ Minsku. Z 2014 hoda jon zaniaŭ pasadu dyrektara pa źniešnieekanamičnym raźvićci biełaruska-brytanskaha pradpryjemstva «Eryd-Hroŭ Pradakšn», jakoje zajmajecca vytvorčaściu i prodažam srodkaŭ dla hleby, i taksama — technałohijami azielanieńnia pustyniaŭ.
Akramia taho, pa niepaćvierdžanaj infarmacyi, jon praciahvaje pracavać na kampaniju, jakaja znachodzicca ŭ Šanchai.
Małodšy syn Dzianis padaŭsia ŭ restaratary. Jamu naležyli «City-cafe Boulevard» i «Pub Club Mixx». Pieršy restaran užo zakryŭsia, druhi — pracuje i pa siońnia, źmianiŭšy nazvu na «Wine & whiskey bar Mixx».
Michaił Zacharaŭ
Jašče adzin siabar prezidenta, były chakieist Michaił Zacharaŭ siońnia pracuje trenieram staličnaha chakiejnaha kłuba «Junactva». U pamiaci ludziej jon zastaŭsia nie tolki chakiejnymi dasiahnieńniami, ale i hučnaj avaryjaj na svaim «Bentli» u 2011 hodzie.
Jahony syn Kanstancin pajšoŭ pa baćkavych śladach. Kanstancin — prafiesijny chakieist, pačynaŭ u «Junactvie», paśla hulaŭ u Homieli, u kanadskaj chakiejnaj lizie, u amierykanskaj chakiejnaj lizie (druhi pa mocy dyvizijon paśla NCHŁ).
Zatym byli minskaje «Dynama», kazachski «Irtyš», ale paśla koła zamknułasia — siońnia 32-hadovy napadajučy hulaje ŭ baćkavym «Junactvie».
Akramia taho, u Zacharava jašče dvoje dziaciej: dvajniaty Kryścina i Alaksandr naradzilisia ŭ 1995 hodzie. Pryčym, Alaksandr taksama zajmaŭsia chakiejem, ale ŭ zorki nie vybiŭsia.
Siońnia Kryścina vučycca ŭ Instytucie žurnalistyki BDU i pracuje mieniedžaram u minskim ivent-ahienctvie «Burochaplin». Taksama dziaŭčyna paśpieła zaśviacicca na telekanale «Biełaruś 5» Alaksandr ža — fihura absalutna nie publičnaja.
Viktar Šejman
Viktar Šejman — viadomy łukašenkaŭski paplečnik, jaki siońnia pracuje kiraŭnikom spravami prezidenta. U jaho dvaich dziaciej.
Syn čynoŭnika Siarhiej naradziŭsia ŭ 1983 hodzie. Skončyŭ pryvatny Mižnarodny humanitarna-ekanamičny instytut, atrymaŭ dypłom jurysta. Užo ŭ 23 hady jon pracavaŭ hałoŭnym kantraloram-revizoram Kamiteta ekanamičnaha kantrolu pry Minskim abłvykankamie. Akramia taho Siarhiej Šejman byŭ adnym z arhanizataraŭ kancertaŭ «Za Biełaruś!». U pryvatnaści, vyrašaŭ pytańni achovy, kantaktavaŭ z zorkami, zaćviardžaŭ prahramy kancertaŭ.
Pa niepaćvierdžanaj infarmacyi, siońnia Siarhiej zajmajecca biznesam.
Siastra Siarhieja Volha naradziłasia ŭ 1989 hodzie. Jana skončyła toj ža instytut, što i jaje brat. Letaś vyjšła zamuž.
Ciapier Volha vučycca ŭ ZŠA, va ŭniviersitecie Kapłan u štacie Ajova.
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy4
Kamientary