Prakapienia raskryŭ detali narady ŭ Łukašenki: niezadavolenaść Karpienkam, škoły pry PVT i kredyty ŭsim achvotnym na IT-adukacyju
IT-biźniesmien Viktar Prakapienia apublikavaŭ u svaim FB post, dzie apisaŭ vyniki sustrečy prahramistaŭ z Łukašenkam.
Park vysokich technałohij (PVT) prahnazuje pavieličeńnie patreby ŭ prahramistach, jakuju budzie prablematyčna zakryć, tamu hatovy vydavać usim achvotnym biespracentnyja kredyty na pieranavučańnie pa IT-śpiecyjalnaści.
Pamier kredytu — da 6000 rubloŭ, z adterminoŭkaj na dva hady i pahašeńniem ciaham troch. Kredytavać hatovyja da tryccaci tysiač čałaviek za hod.
Rabicca heta budzie sa srodkaŭ samoha PVT, kudy kampanii-rezidenty ciapier robiać adličeńni.
Jak udakładniŭ Prakapienia ŭ kamientary «Našaj Nivie», havaryć pra dakładnuju datu pačatka vydačy kredytaŭ jašče rana. Heta stanie mahčymym paśla padrychtoŭki pravavoj bazy, jakaja budzie aformlena jašče adnym dekretam.
«Akramia hetaha abmierkavali ideju stvareńnia novaha IT-Univiersiteta z ekśpierymientalnymi padychodami da navučańnia, a taksama prezident padtrymaŭ ideju dazvolić niekatorym škołam uvajści ŭ PVT dla pravierki roznych ekśpierymientalnych prahram, i, kali budzie pazityŭny vynik — maštabavać hetyja idei na ŭsiu krainu, — napisaŭ taksama Prakapienia.
— Prezident padkreśliŭ, što ŭ adukacyi bardak, i, kali heta nie budzie vypraŭlena, to chutka ŭ Ministerstva adukacyi budzie novy ministr.
Prezident paćvierdziŭ, što adukacyi budzie nadavacca samaja pilnaja ŭvaha i płanujecca praviadzieńnie jašče jak minimum adnoj narady pa hetym pytańni».
U kamientary «Našaj Nivie» Prakapienia taksama adznačyŭ, što ŭsio akreślenaje stanie mahčymym tolki paśla pryniaćcia novaha Dekreta ab PVT, jaki dazvolić uvachodzić u park taksama i adukacyjnym ustanovam, naprykład, — škołam, jakija praz heta zmohuć uvodzić ekśpierymientalnyja prahramy, nie pryviazanyja da prahram Minadukacyi.
Viktar Prakapienia čakaje, što abjomy ekspartu PVT pa vynikach 2019 hoda pieravysiać ličbu $ 2 młrd. Za 3 hady hety pakazčyk vyras u 2,4 razu. «Rubiel staić na miescy ŭ tym liku dziakujučy valucie, jakaja pastupaje ŭ krainu ad IT-haliny», — kaža Prakapienia.
Na siońnia dola IKT u VUP krainy dasiahnuła 5,5% — heta supastaŭna z unioskam sielskaj i lasnoj haspadarki (6,4%), budaŭnictva (5,4%), transpartu (5,8%). «Da 2022 hoda hetaja dola vyraście da 10%», — prahnazuje biznesoviec.
Apytanka
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam44
Kamientary