Rychtuje miortvych da pachavańnia i abjadnoŭvaje jabaciek-influjensieraŭ. Što viadoma pra błohiera Holikava?

Prakłaŭ šlach na telebačańnie movaj varožaści

Sa svaim abranym kursam Holikaŭ chutka ŭziaŭ intervju ŭ załatoha piara Andreja Mukavozčyka, Juryja Vaskrasienskaha, zaprasiŭ da siabie na razmovu «biełaruskuju Sabčak» Ksieniju Lebiedzievu. Mienavita na kanale ŭ Holikava źjaviłasia vialikaja razmova z eks-ministram MUS Juryjem Karajevym.

Pavialičyć

Alaksiej vyrazna akreśliŭ svaju prałukašenkaŭskuju pazicyju, padajučy jaje jak adzinuju pravilnuju. Pa-pieršaje, jon jašče da vybaraŭ padtrymlivaŭ ideju taho, što karanavirus — heta psichoz i suśvietnaja zmova. Ziemlakoŭ-pratestoŭcaŭ nazyvaŭ «bčb-upyrami», «ciemrašałami», tymi, kaho treba pieravychavać i izalavać. Jašče 12 žniŭnia Holikaŭ adkryta padtrymaŭ hvałtoŭnyja dziejańni siłavikoŭ, paraŭnaŭšy ich ź nieabchodnaściu «vychavać pa jahadzicach žonku, jakaja admoviłasia hatavać śniadanak».

Z takoj pazicyjaj i pohladam na žyćcio błohier chutka prakłaŭ sabie šlach na biełaruskaje telebačańnie: 7 śniežnia na STB startavała jaho aŭtarskaja rubryka pad nazvaj «Holikaŭ». Premjeru padali pad «sousam»: vy ž lubicie internet i błohieraŭ, voś vam błohier, voś my dajom jamu svabodna i abjektyŭna vykazvacca. Ale ŭ pieršym ža vypusku Holikaŭ pajšoŭ pa tych ža temach, što i Azaronak. Voś tolki adna z cytat:

— Asabista ŭ mianie da bieła-čyrvona-biełaj simvoliki niama ahidy. Jość jasnaje razumieńnie pra razburalnyja namiery ludziej, u čyich rukach hety ściah. Jość razumieńnie patreby na zakanadaŭčym uzroŭni pryznać hetu simvoliku ekstremisckaj, zabaronienaj i pa zakonie pieraśledavać jaje papularyzacyju. Siońnia častka biełarusaŭ, padmanutaja błohieram Ściopam i hramadziankaj Śvietaj, paznačajuć siabie hetym ściaham. Jany jasna pakazvajuć i kažuć: «Kali my pryjdziem da ŭłady, my budziem rezać i viešać łukašystaŭ i jabaciek». To bok, hety ściah piersanalna im pryniasie ŭsiodazvolenaść, a ŭsim inšym — śmierć. 

Mienavita Holikaŭ kuryruje abjadnańnie tak zvanych praŭładnych błohieraŭ u imia zachavańnia krainy. Pieršy ich źjezd prajšoŭ 12 śniežnia. Padzieja była pakazanaja ŭ repartažy na dziaržaŭnym telebačańni. Na sustrečy zaśviacilisia takija piersony, jak Miška Biełarus, Jaŭhien Vałodčanka, Juryj Uvaraŭ, i viadomy ŭdzielnik mitynhaŭ «Za baćku» i aŭtaprabiehaŭ Cimur Prachin.

Pavialičyć

Zarablaje tym, što rychtuje ludziej da pachavańnia 

Pry ŭsioj ahresii, jakuju błohier nieprychavana vykazvaje ŭ efiry da ziemlakoŭ, Holikaŭ stvaraje sabie imidž idealnaha haspadara i siemjanina. Błohier žanaty, haduje čatyroch dziaciej. Maje ziamielny ŭčastak z aharodam, karovaj i aviečkami. Na žyćcio zarablaje zdačaj u arendu domika i pradprymalnictvam u śfiery tanatapraktyki. Tanatapraktyk — heta toj samy čałaviek, jaki rychtuje miortvych da pachavańnia ŭ estetyčnym płanie. Śpiecyjalisty balzamujuć pamierłych ludziej, hrymirujuć, myjuć, padbirajuć im adzieńnie.

Akramia hetaha, Holikaŭ zarehistravany ŭ bazie viadučych, hatovych pravieści luboje mierapryjemstva — ad kancerta da viasiella. Jaho možna było zaŭvažyć ź mikrafonam u rukach na rehijanalnych dziaržaŭnych śviatach.

Pavialičyć

U minułych intervju Holikaŭ ščyra pryznavaŭsia, što jon nie žurnalist, žurnalisckaj adukacyi nie maje. Pry hetym ciaham hoda zajmaŭ pasadu namieśnika redaktara haziety «Brescki kurjer». Temy intaresaŭ u jakaści karespandenta — toj ža akumulatarny zavod, darmajedy, ekałohija, praca čynoŭnikaŭ.

Darečy, uvažlivyja biełarusy jašče ŭ kastryčniku adznačyli, što z usich mierapryjemstvaŭ u Breście błohier vioŭ strymy, nie majučy akredytacyi žurnalista, pry hetym dapuskaŭ paklop — pa hetym i inšym parušeńniach milicyju paprasili pravieści pravierku. Ni pa adnym z faktaŭ vidavočnych parušeńniaŭ Holikaŭ nie byŭ pryciahnuty da adkaznaści.

Pavialičyć

Siarod ahučanych mar błohiera — uziać intervju ŭ Isusa Chrysta i Alaksandra Łukašenki, kali b była takaja mahčymaść. A taksama ŭ «troch hracyj» — Kaleśnikavaj, Cichanoŭskaj i Capkała.

• 0
• 0
• 0
• 0
• 0
• 0
• 0
• 0