Jakija knihi kuplali žychary Biełarusi ŭ 2021 hodzie, raskazała marketing.by kampanija OZ.BY, adzin z najbujniejšych hulcoŭ na našym knižnym rynku. Samaj pradavanaj u Biełarusi knihaj u raździele «Mastackaja litaratura» staŭ kultavy raman brytanskaha piśmieńnika Džordža Orueła «1984».
Taksama ŭ biełarusaŭ papularnaściu karystaŭsia raman ab čałaviečaj psichałohii XXI stahodździa šviedskaha kłasika sučasnaj litaratury Fredryka Bakmana «Tryvožnyja ludzi». Na pieršy pohlad typovaja detektyŭnaja historyja pra zakładnikaŭ i rabavańni adkryvaje pierad čytačom nieadnaznačnuju karcinu chitrasplacieńniaŭ čałaviečych losaŭ, jarkich pieražyvańniaŭ i abvostranych pačućciaŭ.
Karystaŭsia popytam i jašče adzin raman Bakmana: «Druhoje žyćcio Uve». Hetaja dobraja historyja raskazvaje pra niaprostaje žyćcio svarlivaha piedanta-staroha z dobrym sercam.
Nie zdradžvajučy zakładzienym raniej tradycyjam, u minułym hodzie biełarusy bolš za ŭsio čytali litaraturu pa samaraźvićci, matyvacyi i asobasnamu rostu. Niaźmiennaha lidara apošnich hadoŭ Džen Sinsera źmianiła biełaruskaja žurnalistka i błohierka Volha Prymačenka. «Da siabie piaščotna» — heta kniha-miedytacyja, jakaja zaklikaje da ŭnutranaj razmovy i dapamahaje pačuć ułasny hołas siarod mnostva inšych.
A voś chit prodažaŭ minułych hadoŭ «Ni SY» hetym razam zaniaŭ tolki druhuju pazicyju. Pieravydzieny biestseler rasijskaha psichołaha «Chaču i budu. 6 pravił ščaślivaha žyćcia abo mietad Łabkoŭskaha ŭ dziejańni» staŭ trecim. U novaj knizie źjavilisia pradmova i raździeł, dzie psichołah padrabiazna raźbiraje kožnaje praviła, kaža pra niuansy i tłumačyć svaju mietodyku, jak žyć praściej, lahčej i ščaśliviej.
Akramia hetaha, u 2021 hodzie biełarusy vučylisia «Tonkamu mastactvu pafihizmu» i «Mastactvu lubić», a taksama vyvučali mietad «Radykalnaha prabačeńnia».
U 2021 hodzie biełarusy čytali šmat knih, jakija byli ekranizavanyja. Heta i raman «Chod karalevy» Uołtera Tevisa, i tryler «The One. Adziny» Džona Marsa, i navukovaja fantastyka «Dziuna» Frenka Hierbierta.
U raździele «Biełaruskaja litaratura» jaki ŭžo hod zapar lidziruje dziońnik «Radziva «Prudok» Andrusia Horvata. U top trapiŭ i Viktar Marcinovič z knihaj «Mova». Taksama popytam karystalisia tvory Śviatłany Aleksijevič.
A voś na druhim miescy ajčynnaha topu apynuŭsia biełaruski kłasik Uładzimir Karatkievič i jahony znakamity histaryčny raman «Kałasy pad siarpom tvaim». Čytali biełarusy i inšych kłasikaŭ: Jakuba Kołasa, Janku Kupału i Kuźmu Čornaha.
U topie dziciačaj litaratury ŭžo druhi hod lidziruje zachodni biestseler «Dziońnik Styva, jaki zachras u Minecraft. Kniha 1». Taksama papularnaść utrymlivaje kniha «Hravici Fołz» - Dziońnik 3, vydadzienaja na asnovie adnaho z samych papularnych multsieryjałaŭ.
Pa tradycyi, u rejtynh uvajšli taksama niekalki knih pra Hary Potera, «Maleńki prync» i «Chroniki Narnii».
Ciapier čytajuć
Pamiłavanyja 15 čałaviek, siarod jakich 13 palitviaźniaŭ7
Pamiłavanyja 15 čałaviek, siarod jakich 13 palitviaźniaŭ
Najbujniejšaj u śviecie fan-supolnaściu Łedzi Hahi kiruje chłopiec ź Minska, jaki adsiedzieŭ za pratesty. Rasijanie paśpiašalisia zapisać jaho ŭ svaje1616
Kamientary