«Tut ža niamała, na čale z pasłom, ukraincaŭ. My ž da ich stavimsia pa zakonie» — Łukašenka zavualavana pahražaje
Na pasiadžeńni Rady biaśpieki 7 krasavika Alaksandr Łukašenka zrabiŭ vypad u bok ukraincaŭ.
«Kali ŭ nas tam niedzie adzin-dva-try-piać čałaviek zastalisia, to treba žorstka pastavić umovy, chaj Makiej razmaŭlaje z hetym pasłom Ukrainy, i kali heta nie budzie zroblena, my ŭžo adkažam pa-inšamu. Jany vielmi ryzykujuć. Bo i tut niamała, na čale z pasłom, ukraincaŭ. My ž stavimsia da ich pa zakonie, pa-ludsku. Ale heta nie taja situacyja, viali siabie kiepska, i my vymušanyja byli reahavać», — skazaŭ Łukašenka.
Pakul da kanca nie jasna, što mieŭ na ŭvazie Alaksandr Łukašenka ŭ hetym pasažy. Ën havaryŭ nibyta pra viartańnie ŭ Biełaruś biełarusaŭ-dalnabojnikaŭ z Ukrainy. Ale Ukraina nie pieraškadžała vyjezdu z krainy hramadzian Biełarusi. Tysiačy ich, kali nie dziasiatki tysiač, paśla pačatku vajny vyjechali z Ukrainy ŭ Polšču, Vienhryju, Słavakiju, Rumyniju, niekalki dziasiatkaŭ čałaviek — naŭprost u Biełaruś. Mahčyma, havorka pra ŭdzielnikaŭ niejkaj śpiecapieracyi biełaruskich siłavikoŭ.
U kožnym razie, słovy prahučali jak zavualavanaja pahroza ŭkraincam Biełarusi ci tym, jakija znachodziacca ŭ Biełarusi. Raniej pa sfabrykavanych abvinavačvańniach u raspalvańni sacyjalnaj varožaści byli aryštavanyja aktyvisty polskaj mienšaści ŭ krainie, siarod ich Anžalika Borys i Andrej Pačobut, što pryviało da abvastreńnia varožaści ŭ adnosinach z Polščaj.
Rasija napała na Ukrainu 24 lutaha, u tym liku z terytoryi Biełarusi. Hetaje hrubaje parušeńnie mižnarodnaha prava było asudžanaje Hienieralnaj asamblejaj AAN 140 hałasami suprać piaci, siarod hetych piaci i Biełaruś.
U vyniku ahresii zahinuli ŭžo dziasiatki tysiač vajskoŭcaŭ z abodvuch bakoŭ, a taksama mirnych žycharoŭ. Na akupavanych terytoryjach adbyvajucca sapraŭdnyja źvierstvy, ich maštab staŭ viadomy paśla razhromu rasijskich vojskaŭ pad Kijevam.
Zhodna ź mižnarodnym pravam, Biełaruś ličycca saŭdzielnicaj ahresii, bo pradastaviła svaju terytoryju dla viadzieńnia vajny.
Pierad napadam na Ukrainu Alaksandr Łukašenka ŭ intervju rasijskamu prapahandysckamu TV zajaŭlaŭ, što vajna va Ukrainie praciahniecca 3 — 4 dni. Padčas vajny jon niekalki razoŭ zaklikaŭ kiraŭnictva Ukrainy kapitulavać, pahražajučy, što inakš toje samaje pryjdziecca zrabić paźniej na horšych umovach.
U siońniašnim vystupie na Radzie biaśpieki Alaksandr Łukašenka ŭžo zychodziŭ z taho, što likvidavać i rasčlanić Ukrainu Rasii nie ŭdasca, i patrabavaŭ dla siabie miesca ŭ paślavajennym uładkavańni rehijona.
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju18
Kamientary