Ci možna ličyć stvoranyja štučnym intelektam karciny mastactvam? Voś niekalki arhumientaŭ

Usio bolšuju papularnaść u śviecie nabyvajuć instrumienty štučnaha intelektu, jakija pieraŭtvarajuć tekst u malunak. Jany vykarystoŭvajuć šyrokija bazy danych isnujučych vyjaŭ (fota, malunkaŭ, karcin). 

Vydańnie The Atlantic raskazvaje pra samyja viadomyja ź ich na siońnia: DALL-E 2 ad OpenAI, Midjourney i Stable Diffusion. Vyniki ich pracy mohuć uražvać: realistyčnyja sceny na vulicach, hory z kłubničnaha maroziva ŭ kosmasie. Prahrama Stable Diffusion atrymała miljonnaha karystalnika ŭsiaho praź miesiac paśla zapusku, i prynamsi stolki ž ludziej vykarystoŭvajuć DALL-E 2.

Icecream Mountain with Strawberries in Space.#midjourney #aiart pic.twitter.com/vEeH2BnsHL

— Phirox (@ALittleGolden) September 18, 2022

Niekatoryja mastactvaznaŭcy kažuć, što takoj źjavy, jak «mastactva štučnaha intelektu», prosta nie moža isnavać. Maŭlaŭ, tut niama nijakaha mastackaha vykazvańnia, a prosta naciskańnie na knopki.

Ale takija dumki nie novyja: hetak sama kazali i pra fatahrafiju, jakuju nazyvali «śmiarotnym voraham» mastactva. Spatrebilisia dziesiacihodździ, kab fatahrafiju pryznali vidam mastactva.

Pra niekatoryja važnyja mastackija tvory XX stahodździa kazali hetak ža hrebliva, naprykład, pra tvory Endzi Uorchała.

Azirajučysia nazad, stanovicca jasna, što mašyny nie zamianili mastactva — jany prosta pašyryli jaho. Praź ich źjavilisia novyja i cudoŭnyja rečy. Tamu łahičnym vyhladaje, što štučny intelekt nie zamienić samu tvorčaść, a prosta źmienić pryrodu tvorčaści, jak heta robiać mašyny z momantu źjaŭleńnia i da siońnia.

Žan-Fransua Lijatar, francuzski fiłosaf i tearetyk litaratury, pisaŭ: «Banki danych — heta encykłapiedyja zaŭtrašniaha dnia. Jany pieravyšajuć mahčymaści kožnaha ź ich karystalnikaŭ. Jany źjaŭlajucca «pryrodaj» dla postmadernisckaha čałavieka». Tamu štučny intelekt u tvorčaści možna nazvać mastactvam vielizarnych kulturnych archivaŭ, u jakich my ŭžo žyviom.

Mastacki kiraŭnik Louis Vuitton Virdžył Abło sfarmulavaŭ «praviła troch adsotkaŭ». Abło śćviardžaŭ, što treba dadać tolki try adsotki karekciroŭki da ŭžo isnujučaj kancepcyi, kab zhienieravać kulturny ŭniosak, jaki budzie ličycca inavacyjnym.

Abło śćviardžaŭ, što sutnaściu mastactva ŭ XXI stahodździ źjaŭlajecca nie aryhinalnaść, a rekanfihuracyja.

AI-tvorčaść užo sparadziła łavinu malunkaŭ. Źjaviŭsia rynak padkazak, dzie vy možacie kuplać i pradavać frazy dla ŭvodu ŭ štučny intelekt: naprykład, za 1,99 dalara vy možacie atrymać tekstavaje apisańnie dla ŭvodu ŭ DALL-E 2. 

Jość taksama surjoznyja mastaki, jakija ekśpierymientujuć z technałohijami. Kiniematahrafist Hlen Maršał niadaŭna atrymaŭ uznaharodu žury Kanskaha fiestyvalu karotkamietražnych filmaŭ za stvorany štučnym intelektam animacyjny film pad nazvaj «Varona». I ŭžo pačaŭ źjaŭlacca vialiki płast mastakoŭ štučnaha intelektu, jakija nabyvajuć papularnaść: Karen X. Cheng, CoffeeVectors, Faezeh Razavi, Alan Resnick.

• 20
• 0
• 1
• 3
• 2
• 1
• 1
• 0