«Schapili tolki za toje, što ŭkrainiec i mieŭ Signal na telefonie». Maci pra zatrymanaha ŭ Viciebsku «ahienta» ź filma ANT
Iryna Šmaj žyvie ŭ Čarnihavie. Adtul rodam i jaje syn Andrej, jaki pierabraŭsia ŭ 2013 hodzie ŭ Biełaruś. Učora Andreja pakazali pa telekanale ANT jak «špijona» ci «ahienta». «Svaboda» pahutaryła ź jahonaj maci.
Andreja Šmaja zatrymali jašče 19 studzienia. Maci mužčyny nie viedała pryčyn zatrymańnia. Jon pracavaŭ u Viciebskim abłvykankamie, byŭ rabočym pa kompleksnym absłuhoŭvańni i ramoncie budynkaŭ i zbudavańniaŭ. Jak raskazali ŭ filmie kanała ANT, Šmaj nibyta ź vieraśnia rehularna adpraŭlaŭ infarmacyju va Ukrainu praź miesiendžar Signal.
Paviedamleńni adrasavaŭ svajmu małodšamu bratu Rusłanu. Toj słužyć u čarnihaŭskim upraŭleńni «Poŭnač» majoram, namieśnikam kamandzira pa apieratyŭnych pytańniach.
«Jaki ahient, jaki špijon? Što jon moh uvohule viedać, pracujučy zvyčajnym rabočym? Ja hladzieła toje kino. U mianie skłałasia adčuvańnie, što Andrej tam pa arkušy papiery čytaje «pryznańni». Heta prosta niejkaja padstava. Za jaho ŭčapilisia, bo jon ukrainiec, były pamiežnik i tut brata-vajskoŭca maje. Dy i karystaŭsia Signal», — kaža Iryna.
Žančyna dadaje, što jaje tata byŭ lotčykam, syn Rusłan sapraŭdy słužyć, jon vajskoviec. Andrej raniej słužyŭ pamiežnikam u Novych Jaryłavičach — punkcie propusku ź Biełaruśsiu. U Viciebsk jon pierabraŭsia, bo na hetym nastojvała jahonaja niaviesta, jakaja potym stała žonkaj.
«Moj syn Rusłan nu nie moh ničoha havaryć ci pra niešta prasić Andreja. Bo navošta nam jaho padstaŭlać? My vydatna razumieli, u jakoj krainie jon žyvie. Naadvarot, Rusłan prasiŭ jaho paśla 24 lutaha 2022 hoda, kab toj vyjechaŭ ź Biełarusi. My razmaŭlali tolki na pobytavyja temy: pra nadvorje, pra ŭnukaŭ. Nu možna ž prasačyć jahony maršrut! Heta byŭ dom, škoła, praca i nazad. Jon ni z kim nie razmaŭlaŭ, ničoha nikomu nie pieradavaŭ», — kaža maci ŭkrainca.
Jana dadaje, što dla ŭsioj siamji zatrymańnie Andreja — vialikaja trahiedyja i biada. Ciapier mužčyna ŭ SIZA. Jaho, jak paviedamili na ANT, abvinavačvajuć pa artykule 358-1 Kryminalnaha kodeksa («Ahienturnaja dziejnaść»).
Stała viadoma, kudy źnik uradženiec Čarnihava, jaki pracavaŭ u Viciebskim abłvykankamie
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj43
Kamientary