Stała viadoma, kudy źnik uradženiec Čarnihava, jaki pracavaŭ u Viciebskim abłvykankamie
Andreja Šmaja z Čarnihava zatrymali jašče 19 studzienia. Tolki ciapier stali viadomyja pryčyny aryštu.
Andrej Šmaj pracavaŭ u Viciebskim abłvykankamie z 2013 hoda, byŭ rabočym pa kompleksnym absłuhoŭvańni i ramoncie budynkaŭ i zbudavańniaŭ.
«19 studzienia paśla zakančeńnia pracoŭnaha dnia Andreja paprasili zatrymacca niejkija ludzi. Paprasili zatrymacca, jon zatrymaŭsia i ŭsio. Na pracy skazali, što zatrymali śpiecsłužby. Ja nie viedaju, za što jaho zatrymali, vidać, za toje, što prosta ŭkrainiec», — raskazvała raniej maci Šmaja «Fłahštoku».
Jak raskazali ŭ filmie ANT, jon nibyta ź vieraśnia rehularna adpraŭlaŭ infarmacyju va Ukrainu, praz mesendžar sihnał, svajmu małodšamu bratu Rusłanu. Toj słužyć u čarnihaŭskim upraŭleńni «Poŭnač» majoram, namieśnikam kamandzira pa apieratyŭnych pytańniach.
Pa słovach Šmaja, brata cikaviła infarmacyja ab «mierapryjemstvach pa ŭzmacnieńni abłvykankamaŭ», jon paprasiŭ Andreja paviedamlać, «kali budzie mianiacca abstanoŭka».
«Jaho cikaviła infarmacyja, jakaja pravodzicca ŭ peŭnych budynkach administracyjnych, pra jakija viedajuć tolki supracoŭniki, jakija pracavali tam», — raspavioŭ Šmaj.
U filmie zajaŭlajuć, što braty šyfravali pierapisku. Šmaj tłumačyć, u čym zaklučałasia «šyfravańnie» — brat prasiŭ jaho vydalać pierapisku, kali nazapašvałasia šmat paviedamleńniaŭ.
Andrej Šmaj — były vajskoviec, słužyŭ z 2006 pa 2013 hady na biełaruska-ŭkrainskaj miažy inśpiektaram punkta propusku «Jaryłavičy».
Ciapier mužčyna ŭ SIZA. Jaho, jak paviedamili na ANT, abvinavačvajuć pa artykule 358-1 Kryminalnaha kodeksa — «ahienturnaja dziejnaść».
Kamientary