«Jaje nie było i nie budzie». Łukašenka vykazaŭsia pra maštabnuju pryvatyzacyju ŭ Biełarusi
U Biełarusi nie budzie ni šokavaj terapii, ni maštabnaj pryvatyzacyi dziaržaŭnaj ułasnaści. Pra heta Alaksandr Łukašenka zajaviŭ padčas svajoj pajezdki na Abuz-Lasnoŭski palihon u Baranavickim rajonie, piša BiełTA.
«Ja nie suprać pryvatnaj ułasnaści. Tolki ja aściarožny z pryvatyzacyjaj», — zajaviŭ Łukašenka.
Jon pryvioŭ u prykład niadaŭniaje abmierkavańnie ŭmoŭ pieradačy ŭ kiravańnie i nastupnaha vykupu pryvatnaj kampanijaj «Siervaluks» haspadarak u Dubrovienskim rajonie Viciebskaj vobłaści. Pa słovach Łukašenki, kampanija była hatovaja atrymać hetyja haspadarki ŭsiaho za adnu bazavuju adzinku. Jon zajaviŭ, što nie ličyć takuju ŭmovu spraviadlivaj, bo navat prablemnyja haspadarki majuć žyviołu, pamiaškańni, traktary, kambajny i inšuju techniku.
Łukašenka ličyć, što pry vykupie treba ŭličvać realnyja aktyvy haspadarak i ich daŭhi, a nie stavić simvaličnuju canu.
Pavodle jaho słoŭ, pryvatnym inviestaram u pieršuju čarhu prapanujuć haspadarki, jakija pracujuć nieefiektyŭna. U cełym pa krainie ich nibyta niašmat, ale ŭ Viciebskaj vobłaści chapaje. Łukašenka zajaviŭ, što rehijonu ŭžo dapamahli z technikaj, dziakujučy čamu svoječasova pasiejali raps i atrymali kala miljona ton zbožža. Adnak, pavodle jaho, heta tolki pieršyja kroki.
Havoračy pra załučeńnie pryvatnych inviestaraŭ i pieradaču im asobnych dziaržaŭnych aktyvaŭ, Łukašenka padkreśliŭ, što palityka ŭ hetym kirunku budzie praciahvacca. Pry hetym Biełaruś nie maje namieru pravodzić rezkuju i maštabnuju pryvatyzacyju.
«Jaje nie było i nie budzie», — zajaviŭ jon.
Łukašenka taksama skazaŭ, što rašeńnie ab pryvatyzacyi dziaržaŭnych aktyvaŭ u Biełarusi faktyčna prymajecca tolki ź jaho zhody. Jon adznačyŭ, što składanaść i ŭ vyznačeńni spraviadlivaj cany dziaržaŭnych pradpryjemstvaŭ.
Zakranajučy pytańni raźvićcia rehijonaŭ, Łukašenka taksama źviarnuŭ uvahu na demahrafičnuju prablemu i niedachop pracoŭnych ruk. Kali ŭnutry krainy nie staje rabotnikaŭ, ich davodzicca zaprašać z-za miažy. U jakaści prykładu jon nazvaŭ hramadzian Uźbiekistana, jakija pracujuć u Biełarusi.
Pavodle Łukašenki, pryciahnieńnie ŭźbiekskich rabotnikaŭ źjaŭlajecca kantralavanym pracesam. Jon zajaviŭ, što asabista sočyć za tym, jak jany pracujuć, i atrymlivaje stanoŭčyja vodhuki.
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach1
Kamientary