«Ja skažu tolki adno: nie treba». Bajden papiaredziŭ inšyja krainy ad dałučeńnia da vajny suprać Izraila
Prezident ZŠA Džo Bajden vystupiŭ z pramovaj na temu vajny pamiž Izrailem i CHAMAS. Jon abviaściŭ ab vydzialeńni dadatkovaj dapamohi Izrailu, a taksama zaklikaŭ inšyja dziaržavy i arhanizacyi nie dałučacca da kanfliktu.
«Dazvolcie mnie jašče raz skazać, luboj krainie, luboj arhanizacyi, lubomu, chto dumaje skarystacca hetaj situacyjaj, ja skažu adno: nie treba. Našy sercy mohuć być raźbityja, ale naša rašučaść jasnaja», — skazaŭ Bajden.
Prezident ZŠA nazvaŭ masavyja zabojstvy izrailskich mirnych žycharoŭ bajevikami CHAMAS «čystym złom». «U žyćci byvajuć momanty, kali na śviet abvalvajecca čystaje zło. U hetyja vychadnyja narod Izraila pieražyŭ taki momant. Žorstkaść CHAMAS, hetaja kryvažernaść prymušaje ŭspomnić ab samych strašnych biasčynstvach IDIŁ. I, na žal, dla jaŭrejskaha naroda heta nie štości novaje. Hety napad padniaŭ na pavierchniu balučyja ŭspaminy i šnary, pakinutyja tysiačahodździami antysiemityzmu i hienacydu».
Jon abviaściŭ ab pavieličeńni dadatkovaj vajennaj dapamohi Izrailu z boku ZŠA. «My źbirajemsia pierakanacca, što ŭ Izraila nie skončacca krytyčna važnyja resursy dla abarony svaich haradoŭ i hramadzian», — skazaŭ Bajden.
Pa jaho słovach, na ciapierašni momant viadoma jak minimum pra 14 hramadzian ZŠA, jakija zahinuli ŭ chodzie kanfliktu. Siarod zakładnikaŭ, zachoplenych CHAMAS, jość amierykancy.
«Ja daručaju svajoj kamandzie abmieńvacca raźviedvalnaj infarmacyjaj i nakiravać dadatkovych ekśpiertaŭ dla kansultavańnia izrailskich kaleh pa pytańniach viartańnia zakładnikaŭ. Tamu što ŭ majoj administracyi niama bolš vysokaha pryjarytetu, čym biaśpieka amierykancaŭ, jakija znachodziacca ŭ zakładnikach va ŭsim śviecie», — skazaŭ Bajden.
Kamientary