Čamu ŭ Biełarusi adbyvajecca bum na rynku nieruchomaj majomaści? Tłumačyć ekanamist
Popyt na nieruchomuju majomaść u trecim kvartale 2023 hoda staŭ maksimalnym za ŭsiu historyju nazirańnia. «Naša Niva» spytała ŭ ekanamista, čym moža być abumoŭleny taki ŭsplosk na rynku žylla.
Z banka ŭ bieton
Staršy navukovy supracoŭnik BEROC Źmicier Kruk nazyvaje dźvie asnoŭnyja pryčyny, čamu adbyvajecca bum na rynku nieruchomaj majomaści (historyja nazirańnia za im viadzie adlik ad 2005 hoda).
Pieršaja, na dumku ekanamista, — u admovie nasielnictva ad bankaŭskich depazitaŭ jak ad formy zachavańnia aščadžeńniaŭ.
Banki znachodziacca pad sankcyjami, zrabić niešta z zamiežnaj valutaj — naprykład, raźličycca ŭnutry krainy abo vyvieści za miažu — davoli składana. Pracentnyja staŭki pa valutnych depazitach ciapier u miežach chibnaści, banki padymajuć kamisiju za absłuhoŭvańnie valutnych rachunkaŭ, na jakich lažyć ad 50 tysiač dalaraŭ.
«U takich umovach trymać hrošy na valutnym depazicie, jak heta było ŭ papiarednija 20 hadoŭ, nie samaja lepšaja ideja. Ludzi pazbaŭlajucca valutnych depazitaŭ, tamu dla mnohich stała aktualnym pytańnie, u čym zachoŭvać svaje źbieražeńni. Alternatyvaj depazitaŭ źjaŭlajucca kaštoŭnyja mietały i nieruchomaja majomaść. Tamu na rynak nieruchomaj majomaści traplaje taja vielizarnaja masa hrošaj, jakaja zachoŭvałasia ŭ bankach.
Nieruchomaja majomaść jak forma zachavańnia aščadžeńniaŭ ciapier pačynaje zajmać lidzirujučyja pazicyi. A banki ŭsio mienš asacyjujucca z nadziejnym srodkam dla zachavańnia hrošaj», — tłumačyć ekśpiert.
Atrymać kredyt stała praściej
Druhaja pryčyna, jakuju ahučvaje ekanamist, — dostup da kredytavańnia.
«Vielmi spraściŭsia dostup da kredytavańnia na kuplu nieruchomaj majomaści. Adpaviedna heta taksama paŭpłyvała na rost popytu. Hety čyńnik bolš śviežy, bo dostup da kredytavańnia asabliva spraściŭsia sioleta, a zabirać hrošy z valutnych depazitaŭ, možna skazać, ludzi pačali jašče z 2020 hoda», — kaža Źmicier Kruk.
Siarod inšych čyńnikaŭ, jakija taksama možna adznačyć, ekanamist nazyvaje toj fakt, što ŭ Biełarusi značna skaracilisia mahčymaści dla inviestavańnia, tamu i hetyja hrošy taksama čaściakom układajucca mienavita ŭ nieruchomuju majomaść.
Čytajcie taksama:
Rekord za ŭsiu historyju. Što adbyvajecca z kvaterami ŭ rehijonach
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach14
Kamientary