Pracadaŭcy nie chočuć brać na pracu zumieraŭ — voś čamu tyja pravalvajuć sumoŭi
Daśledčyki adznačajuć, što ŭ tych, kamu ciapier da 25 hadoŭ, prablemy nie tolki z kamunikacyjaj.
Zumiery pravalvajuć sumoŭi z-za prablem z kamunikacyjaj. Pra heta havorycca ŭ novym daśledavańni, arhanizavanym u śniežni 2023 hoda hrupaj Intelligent ź Ńju-Džersi, u miežach jakoha apytali bolš za 800 kadravikoŭ, raskazvaje Fox News.
Daśledavańnie pakazała, što amal 75% kiraŭnikoŭ kampanij i mieniedžaraŭ skazali, što z pradstaŭnikami pakaleńnia Z (to-bok ź ludźmi, jakija naradzilisia paśla 1997 hoda) ciažej pracavać, čym z pradstaŭnikami inšych pakaleńniaŭ. Šerah apytanych taksama pahadzilisia z tym, što rabotnikam pakaleńnia Z brakuje kamunikatyŭnych navykaŭ, starannaści, matyvacyi i navat technałahičnych navykaŭ.
Amal 20% pracadaŭcaŭ sutykalisia ź situacyjami, kali niadaŭnija vypuskniki prychodzili na sumoŭje z baćkami.
Zumiery ŭvohule časta pravalvajuć sumoŭi praz prablemy z kamunikacyjaj. Jany miamlać, nie hladziać u vočy, zaprošvajuć nieadekvatnyja zarobki, nieadpaviedna apranajucca na intervju, a na anłajn-hutarkach admaŭlajucca ŭklučać kamieru abo zusim sprabujuć paźbiehnuć pieramovaŭ z ejčaram.
Dva z troch mieniedžaraŭ miarkujuć, što rabotniki pakaleńnia Z nie vytrymlivajuć pracoŭnych nahruzak, u toj čas jak 60% skazali, što maładyja ludzi časta spaźniajucca na pracu i časta nie ŭkładajucca ŭ dedłajny. A jašče jany vielmi kryŭdlivyja i nie ŭmiejuć naležna ŭsprymać krytyku ŭ svoj adras.
20% apytanych mieniedžaraŭ i kiraŭnikoŭ sutykalisia ź situacyjaj, kali im davodziłasia zvalniać supracoŭnika z pakaleńnia Z na praciahu tydnia abo miesiaca paśla taho, jak jon tolki raspačaŭ pracu.
Pa słovach ejčaraŭ, z pryčyny prablem z kamunikacyjaj u zumieraŭ kampanii ŭsio čaściej addajuć pieravahu śpiecyjalistam u hadach. Kala 60% pracadaŭcaŭ zajavili, što hatovyja prapanavać dadatkovyja lhoty i płacić bolš vysokija zarobki, kab pryciahnuć bolš stałych pracaŭnikoŭ, a nie niadaŭnich vypusknikoŭ.
Ekśpierty adznačajuć niekalki pryčyn, u tym liku źmieny ŭ kultury i vychavańni dziaciej. 62% vinavaciać «kulturu», 50% — baćkoŭ, 48% — COVID, 46% — nastaŭnikaŭ. Ciapier dzieciam stali zašmat dazvalać i šmat u čym paturać. Taksama prablemam paspryjała pandemija, u čas jakoj ludzi mienš kamunikavali.
Niekatoryja ekśpierty abaraniajuć maładych rabotnikaŭ, śćviardžajučy, što vyharańnie zakranaje ŭsie ŭzrostavyja hrupy. Jany vystupajuć za toje, što varta bolej układacca ŭ navučańnie maładych śpiecyjalistaŭ zamiest taho, kab adrazu ich zvalniać.
Kamientary