«Vaš zabity muž byŭ zakonnaj cellu Ukrainy». U Maskvie paśla danosu pačalisia razborki vakoł 67-hadovaj doktarki

Kryminałku ŭ adnosinach 67-hadovaj doktarki-piedyjatra maskoŭskaj palikliniki Nadziei Bujanavaj zaviali paśla danosu z boku Nastaśsi Akińšynaj. Maładaja žančyna raspaviała na videa ab vypadku, jaki nibyta adbyŭsia pad čas pryjomu ŭ piedyjatra.

Pa viersii Akińšynaj, jana pryviała svajho 7-hadovaha syna na pryjom da piedyjatra praz prablemy z vačyma ŭ małoha. U časie ahladu syn pačaŭ kapryźničać. Piedyjatr spytała ab pryčynie takich pavodzin. Nastaśsia patłumačyła, što chłopčyk ciažka pieražyvaje stratu baćki, jaki zahinuŭ na vajnie.

Na heta Bujanava nibyta adkazała žančynie, što «jaje muž, jak i luby inšy vajskoviec armii Rasii, zjaŭlajecca zakonnaj cellu Ukrainy», a «Rasija — kraina-ahresar, jakaja napała na Ukrainu i zabivaje jaje mirnych žycharoŭ».

Paźniej vyśvietliłasia, što piedyjatr Nadzieja Bujanava rodam ź Lvova. U 1984 hodzie jana skončyła Miedycynski ŭniviersitet u hetym horadzie. Nadzieja niekalki razoŭ prachodziła ŭ im pavyšeńnie kvalifikacyi, pryčym apošni raz u 2019 hodzie. Nieviadoma, jak jana atrymała rasijskaje hramadzianstva.

Videa, na jakim razzłavanaja maci raspaviała pra vypadak na pryjomie, padchapili praŭładnyja telehram-kanały i ŚMI. Paźniej Akińšyna napisała zajavu ŭ palicyju.

U vyniku pa asabistym daručeńni kiraŭnika Śledčaha kamiteta Rasii Alaksandra Bystrykina na piedyjatra zaviali kryminalnuju spravu ab raspaŭsiudžvańni fejkaŭ ab Uzbrojenych siłach Rasii. 2 lutaha Nadzieju Bujanavu zvolnili z pracy, a na jaje kvatery adbyŭsia pieratrus. Paśla jaho žančynu dastavili na dopyt, jaki praciahvaŭsia ŭsiu noč.

Zrešty, nie ŭsio ŭ hetaj spravie vyhladaje tak, jak padavałasia pieršapačatkova. Nastaśsia Akińšyna napisała na svajoj staroncy va «Ukantakcie», što rasijskija ŚMI skazili jaje historyju. Žančyna znachodziłasia ŭ razvodzie z baćkam chłopčyka. Bolš za toje, jana ŭžo zamužam za inšym mužčynam. Pa słovach Nastaśsi, heta nie pieraškadžała joj praciahvać padtrymlivać ciopłyja adnosiny z baćkam chłopčyka. A jaje novy muž navat siabravaŭ z byłym.

Pavialičyć

Adnak hałoŭnaje nie heta — piedyjatr Nadzieja Bujanava admaŭlaje sam fakt razmovy. Pa jaje słovach, ničoha padobnaha jana Akińšynaj nie havaryła. Advakat piedyjatra tłumačyć, što doktar padčas ahladu dziciaci tolki vyjaviła padazreńnie na «rasstrojstva pavodzin», a maci razzłavałasia, padumaŭšy, što ź jaje syna chočuć zrabić chvoraha. U vyniku i ŭźviała paklop na doktarku.

Pa słovach advakata, padčas dopytu doktar prasiła prasłuchać jaje razmovu z Nastaśsiaj (u maskoŭskich paliklinikach pavinny byli ŭstalavać aŭdyjozapisvajučyja pryłady dla kantrolu jakaści pryjomaŭ). Taki zapis moh by stać nieabvieržnym dokazam.

3 lutaha Tušynski rajonny sud Maskvy nie staŭ zadavalniać chadajnictva śledstva ab zaklučeńni pad vartu piedyjatra maskoŭskaj palikliniki Nadziei Bujanavaj. Abvinavačanuju vyzvalili z-pad varty ŭ zale suda.

Pavialičyć

Joj abrali mieru abmiežavańnia ŭ vyhladzie «zabarony peŭnych dziejańniaŭ» na paŭtara miesiaca. Doktarcy zabaroniena karystacca srodkami suviazi, a taksama razmaŭlać sa śviedkami i inšymi ŭdzielnikami spravy, za vyklučeńniem śledčych, abaroncaŭ i prakurora.

Advakat Bujanavaj zajaviŭ, što budzie skardzicca ŭ prakuraturu: paśla zatrymańnia ŭ piedyjatra zabrali telefon i pračytali ŭsie pierapiski.

Čytajcie jašče:

Siem hadoŭ za piać antyvajennych cetlikaŭ u kramie

Prapahandyst Prydybajła prydumaŭ fejk, kab dyskredytavać «Doždž». Jon pradstaviŭsia žycharom Lipiecka, jaki zamiarzaje biez aciapleńnia

Piaskoŭ nazvaŭ fejkam infarmacyju pra «siensacyjnuju zajavu» Pucina

• 16
• 0
• 9
• 22
• 4
• 10
• 64
• 0