Taryfy na taksi stali mienšyja: što kažuć kiroŭcy i čaho čakać dalej
Miesiac tamu ŭ Biełarusi ŭstupili ŭ siłu novyja praviły: kab mieć mahčymaść pracavać, taksisty pavinny być uklučanyja ŭ rejestr aŭtamabilnych pieravozak pasažyraŭ u nierehularnym złučeńni. Tady z-za novaŭviadzieńniaŭ śfieru nienadoŭha paralizavała: na liniju nie zmahła vyjści vialikaja kolkaść mašyn. Vynik — vyras popyt, ceny padnialisia ŭ niekalki razoŭ. Tochka.by daviedałasia ŭ kiroŭcaŭ, što stała z taksi praź miesiac paśla ŭviadzieńnia rejestra.
Kaeficyjent bolš nie štarmić
Pavodle źviestak «Minsktransa» na 4 listapada, u rejestry było ŭsiaho 62% ad ahulnaj kolkaści kiroŭcaŭ.
Źnižeńnie kolkaści mašyn na linijach adznačaŭ i servis «Jandeks Go»: taksi ŭ Minsku stała mienš na tracinu. Adsiul i rost cen.
Zaraz situacyja niby narmalizavałasia. Transpartnaja inśpiekcyja zajaŭlaje, što štodnia rejestr aŭtamabilnych pieravozak papaŭniajecca na 250—300 kiroŭcaŭ.
Zdajecca, ceńnik ciapier taksama imkniecca da zvykłych značeńniaŭ biez vysokich kaeficyjentaŭ.
«Tak, pajezdki stali tańniejšymi, a horad nie tak mocna i časta «haryć» vysokim popytam», — adznačaje kiroŭca Alaksandr.
Jon upeŭnieny, što pryčyn tut niekalki. Pa-pieršaje, dla mnohich pajezdki na taksi z 1 listapada ŭsio ž darahoje zadavalnieńnie — ludzi stali radziej jeździć.
Pa-druhoje, mašyn na linii ciapier bolš — mnohija ŭsio ž pryhledzielisia i taksama vyrašyli prajści praceduru ŭstupleńnia ŭ rejestr.
«Jandeks» dazvoliŭ usim pracavać. Navat tym, chto nie ŭ rejestry. Jość niesumlennyja parki, jakija padklučajuć i takich kiroŭcaŭ. Pahladzim, čym usio pavierniecca. Hetaje pytańnie Transpartnaja inśpiekcyja abiacała surjozna kantralavać. A adkaznaść dla «nielehałaŭ» salidnaja», — kaža kiroŭca.
Jon adznačyŭ, što ŭ listapadzie niadrenna zarabiŭ: kali raniej vaziŭ pasažyraŭ prykładna za Br5, to zaraz za tych ža pajezdki atrymaŭ u try razy bolš.
«Na minułym tydni ŭžo praściej niejak było z popytam i kaeficyjentami, ciapier užo, možna skazać, usio stabilizavałasia i viarnułasia da zvykłych taryfaŭ: ceny vyšejšyja ranicaj i ŭ vychadnyja, pa viečarach, u hadzinu pik i hetak dalej. Nu plus i Novy hod chutka — zvyčajna dzieści z 15 śniežnia da 15 studzienia padymajucca taryfy», — dadaŭ taksist.
«Mašyn nie chapała, ciapier ich bolš»
Ludmiła pracuje ŭ taksi niekalki hadoŭ. Kaža, što takoj situacyi, jak u pieršyja dni listapada, jana nikoli nie bačyła.
«Ažyjataž byŭ vialiki, mašyn nie chapała, ceny, viadoma, vyraśli. Ale takaja situacyja była maksimum tydzień. Potym z kožnym dniom usio išło i išło na spad. Dumaju, usio budzie, jak było raniej: śviatočnyja dni, vychadnyja, hadzina pik — vialikija ceny, astatnija — sa zvyčajnym kaeficyjentam», — kaža žančyna.
Jana adznačyła, što kiroŭcy ŭbačyli, što ź imi nie žartujuć: adpraŭlajuć mašyny na štrafstajanki, dajuć surjoznyja štrafy i zmahajucca ź nielehałami.
«Katajucca biez rejestru, ja ž baču takija nieŭkamplektavanyja pa zakonie mašyny. Nu, da pary da času. Ale voś naš park naohuł nie vypuskaŭ na liniju tych, chto nie trapiŭ u rejestr, usich zvolniŭ. Sabie daražej vyjdzie nielehalna pracavać ciapier», — upeŭnienaja kiroŭca.
«Vymušany pracavać pa novych praviłach»
Vital u taksi vosiem hadoŭ. Pamiataje jašče tyja časy, kali na biełaruskim rynku abychodzilisia biez «Jandeks Go». Kaža, było praściej. Taryfy fiksavalisia i nie zaležali ad popytu. Heta było prosta i zrazumieła.
«Usio roŭna jeździać i biez rejestru. Nu, ja taksama paśpieŭ tydzień pakatacca na svoj strach i ryzyku — treba ž było hrošy zarabić, kab zrabić usio pa praviłach i trapić u hety samy rejestr. Vyjazdžaŭ, papracuju hadzinki try, schavajusia. Znoŭ vyjdu da viečara», — kaža kiroŭca.
Jamu dla ŭstupleńnia ŭ rejestr treba było vydatkavać amal Br1,5 tys. — na kursy, abklejvańnie mašyny, płafon na dach, videarehistratar, strachoŭku i inšaje. Tamu zarablaŭ jak moh.
«Viadoma, taryfy pieršy tydzień listapada byli vyšejšyja — zarabić atrymałasia. Ale ciapier usio ŭstakaniłasia. Voś ciapier u vas kaeficyjent plus Br1,5, a jašče dva tydni tamu byŭ by plus Br10—15», — tłumačyć Vital.
Jon taksama supakojvaje: taryfy ŭ bližejšy čas narmalizujucca. Bo kiroŭcy ŭsio ž vymušanyja buduć pracavać pavodle novych praviłaŭ i ŭstupać u rejestr.
Kamientary