«Karabiel hańby». Adziny avijanosiec Pucina nie mohuć adramantavać treci hod zapar
Niaŭdačy praciahvajuć pieraśledavać ciažki avijanosny krejsier «Admirał Kuźniacoŭ» — adziny avijanosiec u składzie rasijskaha fłotu, jaki dastaŭsia Kramlu ŭ spadčynu ad SSSR. Staŭšy na ramont u 2018 hodzie paśla pachodu da bierahoŭ Siryi, «Admirał Kuźniacoŭ» tak i nie zmoh u termin viarnucca ŭ stroj, a jahonaja budučynia zastajecca niezrazumiełaj, piša The Moscow Times.
Pieršapačatkova płanavałasia, što pabudavany ŭ 1985 hodzie karabiel, raźličany na bazavańnie i absłuhoŭvańnie 28 samalotaŭ i 24 viertalotaŭ, atrymaje najnoŭšyja sistemy SPA «Pancyr-M», a taksama budzie padrychtavany da vykarystańnia kryłatych rakiet i samanavodnych avijabombaŭ.
Abjadnanaja sudnabudaŭničaja karparacyja abiacała zaviaršyć raboty na 35-m sudnaramontnym zavodzie ŭ Murmansku ŭ 2022 hodzie. Paśla terminy pieranieśli na 2023 hod, paśla — na 2024-y. Ale pa vynikach minułaha hoda pra viartańnie ŭ stroj avijanosca rasijskija ŭłady tak i nie paviedamili.
Paśla adpraŭki ŭ Siryju, jakaja zrabiła «Admirał Kuźniacoŭ» abjektam kpinaŭ z-za śledu čornaha dymu, jaki apanavaŭ nieba nad Atłantykaj, Majkł Fiełan, jaki zajmaŭ tady pasadu ministra abarony Vialikabrytanii, nazvaŭ avijanosiec «karablom hańby».
Amierykanski časopis National Interest pastaviŭ «Kuźniacova» na pieršaje miesca ŭ śpisie najhoršych avijanoscaŭ śvietu, adznačajučy nizkuju jakaść budaŭnictva, drennuju padtrymku i adsutnaść jakich-niebudź «naščadkaŭ» u vyhladzie novych, bolš sučasnych avijanoscaŭ.
Padčas siryjskaha pachodu, u jakim «Kuźniacova» supravadžaŭ buksir praź nizkuju nadziejnaść siłavoj ustanoŭki, avijanosiec straciŭ dva źniščalniki za try tydni, paśla čaho, jak pisaŭ The Telegraph, jahonyja avijakryły pieraviali na naziemny aeradrom.
Pieršaja sproba adramantavać karabiel paśla płavańnia ŭ Siryju skončyłasia katastrofaj. Na zavodzie pad Murmanskam «Admirał Kuźniacoŭ» nie zmoh vyjści z płyvučaha doka, u vyniku čaho na karabiel abrynuŭsia dokavy kran, u jahonaj karmie ŭtvaryłasia dzirka, a sam hihancki dok zatanuŭ.
Praz hod padčas ramontu «Admirała Kuźniacova» ŭźnik pažar, u vyniku jakoha zahinuli dvoje rabočych, a sam karabiel atrymaŭ dadatkovyja paškodžańni. U 2018 hodzie ramont avijanosca ŭłady aceńvali ŭ 20 młrd rasijskich rubloŭ (pavodle tahačasnaha kursu kala 300 młn dalaraŭ).
Kamientary