«Vy pavinny skazać, jaki drenny Sańnikaŭ». Šarenda-Panasiuk — pra toje, jak prapahandysty z BT zapisvali film pra jaje
«Važna było źniać intervju z takim čałaviekam — simvałam niazłomnaści i pryncypovaści, pakazać, što my pieramałoli navat takoha čałavieka», — raskazała jana ŭ intervju «Radyjo Svaboda».
U sakaviku 2024 hoda Palinu Šarenda-Panasiuk źniali ŭ prapahandysckim filmie na «Biełaruś 1». Zdymačnuju hrupu prysłali ŭ Rečycu ŭ žanočuju kałoniju dla recydyvistak, dzie palitźniavolenuju ŭtrymlivali va ŭmovach, pryznanych katavańniem.
Zhadvajučy abstaviny, jakija papiaredničali zapisu, Palina Šarenda-Panasiuk zaŭvažaje, što heta była cełaja epapieja. Pa jaje słovach, napiaredadni jaje ceły miesiac pratrymali ŭ ŠIZA.
«Ja ŭžo zrazumieła, što heta nie prosta tak, što da čahości rychtujuć, što heta śpiecyjalna ŭsio robicca. I ŭ razmovie z načalnikam PK-24 Dźmitryjem Kurłovičam ja naŭprost zapytałasia: «Što vy ad mianie chočacie? Čaho vy damahajeciesia voś hetymi katavańniami?» I prahučała słova «intervju». Ja zrazumieła, što treba ŭ łabavym sutyknieńni z hetymi katami pajści na chitraść, kab nie zahinuć. Ja pahadziłasia».
«Važna źniać intervju z takim čałaviekam — simvałam niazłomnaści i pryncypovaści, pakazać, što my pieramałoli navat takoha čałavieka», — tłumačyć matyvacyju režymu eks-palitźniavolenaja.
Šarenda-Panasiuk raskazvaje, što niejkaha akreślenaha scenaru nie było, chacia pa tych pytańniach, jakija zadavali, było vidavočna, što jany byli padrychtavanyja śpiecyjalna pad jaje. Byli navodziačyja pytańni — nazvać peŭnyja proźviščy, raskazać pra svaju dziejnaść, pra atrymańnie hrošaj.
Jak zhadvaje Palina, padčas zapisu intervju akramia žurnalistki Anastasii Bieniedziasiuk byli apieratar, čałaviek, jaki pracavaŭ z technikaj, pradstaŭnik HUBAZiK, jaki nazvaŭsia Michaiłam, a taksama jašče adzin čałaviek. Jon kuryravaŭ hrupu, ale admoviŭsia pradstavicca.
Šarenda-Panasiuk vykazvaje zdahadku, što heta byŭ nie pradstaŭnik biełaruskaha KDB, a niejki rasijanin. Palina dadaje, što hety čałaviek pastajanna chadziŭ u kapielušy, kab jaho tvar nie trapiŭ na kamiery, jakija raźmieščany na terytoryi kałonii.
Sami zdymki, pa słovach žančyny, zaniali pałovu dnia. «Jany zdymali interjery. Mianie źmiaścili ŭ pryhožyja dekaracyi, dzie byŭ novieńki ramont, pryhožaja padłoha, pryhožaja plitačka, usio takoje pryhožaje, novieńkaje. [Treba było] pakazać, jak dobra, ščaśliva žyvuć asudžanyja i palitviaźni».
Palina śćviardžaje, što jaje nijak nie rychtavali da zdymkaŭ, kab jana lepš vyhladała.
«Adziny bonus ad hetaha intervju — toje, što mianie vyzvalili ad prymusovaj pracy. Choć jany i na fabrycy siužet zdymali, ale ja ŭ hety dzień była vyzvalena».
Jak viadoma, paśla intervju žančynu nie adpuścili na svabodu. Čamu tak adbyłosia?
«Ciažka skazać. Ja źjaŭlajusia rehijanalnym kaardynataram Jeŭrapiejskaj Biełarusi. I voś kali ja kazała, u peŭny momant padyšoŭ pradstaŭnik HUBAZiK i skazaŭ: «Nu vy ž razumiejecie, što vy pavinny raskazać pra «Jeŭrapiejskuju Biełaruś», jakaja jana kiepskaja, jaki drenny Sańnikaŭ, jaki drenny toj albo toj. Voś hetyja pytańni jany mianie prymušali prahavorvać».
Pa słovach Paliny, značnaja častka taho, što było źniata, nie ŭvajšła ŭ vynikovy siužet.
«Ja mierkavała, što, mahčyma, jašče buduć niejkija asobnyja častki intervju, asobnyja narezki buduć ustaŭleny ŭ niejkija prapahandysckija roliki», — zaŭvažaje byłaja palitźniavolenaja.
Kamientary
Nia možacie, nie pravacyrujcie ludziej, bahata kaho ŭžo nie paviarnuć. Užo navad durniu zrazumieła, što ŭsie hetyja ślivy botaŭ, niedarečnyja zatrymańni i h.d. Heta padstava tak zvanych "lidaraŭ" psieŭdaapazicyi. Paśla 2020 hoda nichto nie pavieryć ŭ hetych lidaraŭ. Albo prapuskajecie maładoje pakaleńnie albo na biełaruskaj idei treba stavić tłusty kryž +.
Usie čytali siońnia chto i jak padstaŭlaŭ ludziej.
---
heta jana pra kaho ?