Smak biełaruskaj palandvicy. Jak chobi byłoha palitviaźnia vyrasła ŭ nievialiki biznes
Były palitviazień Alaksandr Babič raskazaŭ Radyjo Svaboda, jak jon hatuje palandvicu z pamidorami, kamu bolš padabajecca vostraje i čamu jon nie choča skaračać čas na sušku miasa.
Alaksandar Babič pachodzić ź Bieraścia, jamu 36 hadoŭ. Bolš za try ź ich Alaksandar adsiadzieŭ za toje, što ŭdaryŭ amapaŭca padčas pratestaŭ u Bieraści 9 žniŭnia 2020 hodu. Da aryštu Babič pracavaŭ ślesaram hazavaha abstalavańnia, potym adkryŭ kramu, jakaja zajmajecca ŭpakoŭkaj. Paśla vyzvaleńnia ŭ studzieni 2024 hodu pierajechaŭ u Polšču. U Varšavie pačaŭ rabić modulnyja draŭlanyja damki dla adpačynku i hatavać svojskuju palandvicu. Pastupova chobi stała pierarastać u nievialiki biznes.
Smak palandvicy
Alaksandar raskazvaje, što prasolvać i sušyć miasa pačaŭ jašče ŭ žniŭni 2020 hodu ŭ Biełarusi, adnak nieŭzabavie trapiŭ za kraty i vymušana spyniŭ zajmacca hetym chobi.
«Na hetym historyja mahła b zakončycca. Ale ŭ kancy 2024-ha ŭ haściach u svajakoŭ ja ŭbačyŭ palandvicu i ŭspomniŭ jejny smak», — kaža surazmoŭca.
U vyniku vyrašyŭ viarnucca da vyrabu svojskaha miasa, ale ž manetyzavać jaho nie planavaŭ. Chacieŭ hatavać dla siabie. Raskazvaje, što sioleta ŭ studzieni zamoviŭ onłajn niekalki ventylataraŭ, niekalki metraŭ maskitnaj sietki, kručki dla vialeńnia miasa, vakuŭmatar, znajšoŭ patrebnyja doški. Heta było ŭsio nieabchodnaje abstalavańnie. Alaksandar pačaŭ častavać palandvicaj siabroŭ, im spadabałasia.
«I tut zakruciłasia», — uśmichajecca surazmoŭca.
Alaksandar kaža, što žartam prapanavaŭ svajoj dziaŭčynie Alenie stvaryć staronku ŭ Instagram dla palandvicy. Ale jana sapraŭdy zaniałasia hetym, pačała zdymać i publikavać «miasny» kantent. Ciapier u ichnaj kamandzie try čałavieki: jon, Alena i jejnaja dačka. Alaksandar tłumačyć, što sam całkam zajmajecca miasam, hatuje jaho, upakoŭvaje. Alena viadzie staronku ŭ sietkach i kamunikacyju z klijentami, jejnaja dačka «stvaraje dobry nastroj».
Palandvica pa-italjansku
Alaksandar Babič kaža, što lubić hatavać, asabliva miasa, i hatuje časta.
«U mianie jość firmovyja kryły, jakija ja abaviazkova pakažu hetamu śvietu», — abiacaje jon.
Surazmoŭca dzielicca, što palandvicu pačaŭ hatavać z taho, što było pad rukoj.
«Była kuracina — rabiŭ z kuraciny. Była śvinina — rabiŭ sa śvininy. Specyi taksama nie vybiraŭ. Što było doma, z tym i rabiŭ. Kali chłopcy stali kazać, što heta ačmurenna, što klasna było b zrabić voś takuju i takuju, to pačali zabaŭlacca sa specyjami», — uspaminaje jon.
Ciapier Alaksandar pryjšoŭ da čatyroch hatunkaŭ palandvicy. Pieršaja, bolš tradycyjnaja ŭ biełarusaŭ — časnočnaja, ź piercam i kropam. Druhaja — padobnaja da italjanskaha miasa. Siabroŭka jahonaj dziaŭčyny Volha padkazała, što možna zrabić palandvicu, jakaja b nahadvała prašuta — z bazylikam, pamidorami i časnakom.
«Samaje hałoŭnaje — pamidory. My specyjalna zamovili italjanskija specyi z pamidorami, i atrymałasia vielmi smačnaja palandvica. Jana sapraŭdy padobnaja da italjanskaha smaku: sałodkaja, pamidornaja, trochi časnočnaja, z aramatam bazyliku. Mnie hety smak zdajecca niejkim nieziamnym», — apisvaje surazmoŭca.
Jašče adzin hatunak jon akreślivaje jak «uschodni» — z kmienam, kurkumoj, razmarynam, arehana. I apošni — vostraja palandvica ź piercam čyli i sałodkaj paprykaj.
«Palaki biaruć ź vialikim zadavalnieńniem vostraje. Biełarusam, naadvarot, vostraje nie padabajecca… Bolšaść palakaŭ nikoli nia čuli pra našuju palandvicu i nia jeli takoj ježy. Dla ich jość prašuta, chamon, basturma», — kamentuje vytvorca palandvicy.
«Čas robić miasa smačnym»
Testavy peryjad hatavańnia palandvicy zaniaŭ paŭtara miesiaca. Pakul kamanda pradaje nia bolš za 10 kilahramaŭ miasnych vyrabaŭ za miesiac. Asnoŭnyja pakupniki — «siabry i nieabyjakavyja biełarusy». Vytvorčaść pastupova akuplaje zatraty na abstalavańnie.
«Kali popyt na palandvicu budzie, to ŭ planach maštabavać hetuju spravu. Kali heta budzie prynosić zadavalnieńnie, to ja pieraŭtvaru hetaje chobi ŭ maleńki biznes», — kaža Alaksandar.
Hatuje jon pakul što ŭ kvatery. Ale ŭ planach pierajechać u pryvatny dom z haspadarčymi prybudovami. Chłopiec kaža, što pakul nia dumaje ab prybytku ad palandvicy.
«Prosta padabajecca rabić niešta pryjemnaje dla ludziej», — adznačaje jon.
Jamu prapanoŭvali vykarystoŭvać kamery dla suški miasa, jakija b skaracili vytvorčaść palandvicy da dvuch dzion.
«Ja kateharyčna suprać takoha padychodu. Dumaju, tolki čas robić miasa smačnym. Nam usim treba navučycca čakać», — kaža jon.
Alaksandar vytrymlivaje palandvicu ad čatyroch da siami dzion. Tady jana atrymlivajecca nia nadta ćviordaja. Kaža, što za dzieviać dzion moža zrabić takuju suchaść, što «stomiśsia rezać bolš za niekalki skryločkaŭ».
Z dvuch kilahramaŭ miasa — kilahram palandvicy
Alaksandar kaža, što nia jeść kaŭbasy, bo nia viedaje dakładna, z čaho jaje robiać vytvorcy.
«Ja nia jem taho, pra što nia viedaju, z čaho pryhatavana. Tamu starajusia abo hatavać sam, abo jeści nieskładanyja pakupnyja pradukty», — tłumačyć chłopiec.
Jon miarkuje, što ŭ Biełarusi miasa lepšaje, čym u Polščy. Na jahonuju dumku, polskaje bolš vadzianistaje. Najlepšym miasam Alaksandar nazyvaje jałavičynu abo kurycu.
«Śvinina bolš škodnaja, ale smačnaja», — kaža jon.
Dla svaich palandvic Alaksandar vybiraje miasa ź mienšaj kolkaściu tłušču. Kaža, što z dvuch kilahramaŭ śviežaha miasa vychodzić tolki kilahram palandvicy.
«Ja vielmi dbajna čyšču jaje. Z dvuch kilahramaŭ niedzie 300 hramaŭ prosta vylataje. Usialak abrazaju, farmuju pryhožyja kavałački. 30-35% usušvajecca. Pradukt kaštoŭniejšy, čym kaŭbasa. Palandvica nia tolki smačnaja, nia tolki naš nacyjanalny pradukt, ale i karysnaja, nasyčanaja białkom. Kali čałaviek zajmajecca sportam, jon acenić: u 100 hramach sušanaj kurycy 40 hramaŭ białku», — raskazvaje admysłoviec.
Alaksandar zaznačaje, što jamu palandvica nie nadakučvaje.
«Ja nie mahu skazać, što najeŭsia. Kožny dzień biaru krychu miasa z saboj u cech i padčas pracy padkidvaju dla padtrymańnia enerhii ŭ arhaniźmie. Rabić vialikuju paŭzu na pracy nie atrymlivajecca, a chot-doh z «Žabki» tak sabie zaduma», — kaža jon.
Palandvica ŭsio jašče zastajecca chutčej chobi. Asnoŭnaja sprava Alaksandra — modulnyja damy. Spačatku jon vučyŭsia ich rabić u inšaj kamandzie. Ciapier planuje adkryvać ułasnuju spravu. Niadaŭna skončyŭ svoj pieršy draŭlany damok dla adpačynku z praviedzienym śviatłom. Taksama pačaŭ vyrablać draŭlanyja pano ź biełaruskimi arnamentami.
«Paśla troch z pałovaj hadoŭ chočacca dahnać stračany čas», — kaža surazmoŭca.
U minskim mietro prachodziać vyprabavańni novyja ciahniki FOTY3
U minskim mietro prachodziać vyprabavańni novyja ciahniki FOTY
Rasijskaja nieanacystka, jakaja adsiadzieła 16 hadoŭ za zabojstva advakata i žurnalistki: Jon naprošvaŭsia svaimi pohladami na čačenskuju kampaniju2020
Kamientary