Biełaruskaja delehacyja musiła być na pamiatnym mierapryjemstvie ŭ Katyni

Pytańnie ŭ tym, ci my ŭsprymajem historyju i sutnaść našaj krainy jak cełaje. Piša ŭ svaim błohu na NN Aleś Čajčyc.

U Katyni prajšli memaryjalnyja mierapryjemstvy z nahody 70-hodździa rasstrełu aficeraŭ vojska polskaha ŭ Katyni. Biełaruskaj delehacyi na mierapryjemstvie, miarkujučy pa ŭsim, nie było.

Heta pry tym, što siarod aficeraŭ vojska polskaha, zabitych u Katyni, było šmat ludziej z Zachodniaj Biełarusi. U pryvatnaści, z dvuch rasstralanych hienerałaŭ adnym byŭ Branisłaŭ Bahatyrevič z Harodni, jaki kiravaŭ miascovaj samaabaronaj u 1918–19 hh. Taksama ŭ Katyni byŭ rasstralany biełaruski litaratar i publicyst Francišak Umiastoŭski. Pavodle acenak historykaŭ, z 14,5 tys. zabitych čyrvonymi ŭ 1940 h. polskich vajskoŭcaŭ prykładna čverć składali vychadcy ź Biełarusi.

Bolš za toje, rasstreł aficeraŭ vojska polskaha ŭ 1940 h. nia byŭ pieršym na tym miescy: zabojstvy ŭ Katyni adbyvalisia jašče ŭ 30-ja hady. U tym liku, pavodle historykaŭ, siarod achviaraŭ byli dziejačy biełaruskaha nacyjanalnaha ruchu Smalenščyny.

Aficyjnyja biełaruskija ŭłady ihnarujuć Katyń — a razam z hetym dačynieńnie tych padziej da svajoj krainy.

Navat z pozirku na hieahrafičnuju kartu vidavočna, što Biełaruś była ŭ centry padziejaŭ 70-hadovaj daŭniny, ale ŭsio roŭna Katyń vystupaje jak aspekt vyklučna rasiejska-polskich stasunkaŭ.

Biełaruś fihuruje ŭ navinach pra pamiatnyja mierapryjemstvy tolki ŭ naźvie «Biełaruskaha śpisu» — rehistra achviar, rasstralanych savietami na terytoryi Biełarusi. Pra toje, kab zaprašać aficyjnuju biełaruskuju delehacyju, arhanizataram pamiatnych mierapryjemstvaŭ, padobna, navat u hałavu nie mahło pryjści.

I heta nia ich vina, a vina biełaruskich uładaŭ.

Dobra, što choć biełaruskaja hramadzkaja supolnaść pra Katyń pamiataje, chacia i tut padčas pary nazirajecca spakusa vyrakčysia našych ziemlakoŭ tolki za toje, što nia ŭsio ź ich uspryniali idei pa-sialansku i sacyjalistyčna afarbavanaha biełaruskaha nacyjanalnaha adradžeńnia pačatku XX stahodździa i što jašče mienšaja častka ź ich sympatyzavała zachodniebiełaruskim separatystam. Praŭda, jašče bolšaja spakusa zapisvać čałavieka ŭ biełaruskija adradžency tolki za fakt pachodžańnia ź Biełarusi.

Pytańnie da taho, što my z vami razumiejem pad Biełaruśsiu i ci ŭsprymajem my historyju i sutnaść našaj krainy i našych histaryčnych karanioŭ całkam.

Adnak, hladzieć na hetaje pytańnie varta kudy bolš hłyboka i mieniej zašorana. Budziem spadziavacca, što na 80-ja ŭhodki trahiedyi da memaryjału, pryśviečanaha pamiaci taksama i socień našych suajčyńnikaŭ, uskładzie vianok i biełaruskaja delehacyja.

• 0
• 0
• 0
• 0
• 0
• 0
• 0
• 0