Pierad vybarami ŭ Čechii ŭ tyktoku aktyvizavalisia sotni prarasijskich akaŭntaŭ z šalonaj papularnaściu
Češskija analityki z Online Risk Labs vyjavili 286 akaŭntaŭ u tyktoku, jakija raspaŭsiudžvajuć prarasijskuju prapahandu i padtrymlivajuć radykalnyja partyi pierad parłamienckimi vybarami ŭ Čechii. Pavodle ich słoŭ, hetyja akaŭnty atrymlivajuć ad 5 da 9 miljonaŭ prahladaŭ na tydzień, piša Reuters.
Hetaja sietka nie źviazanaja z adnoj kankretnaj partyjaj, a padtrymlivała niekalki vyhadnych Rasii ruchaŭ adrazu. Siarod ich — ultrapravaja arhanizacyja «Svaboda i pramaja demakratyja» (SPD) (kala 13% padtrymki) i ultralevaja Stačilo («Chopić!») (kala 5%), jakija vystupajuć za vychad Čechii z NATA i ES.
Analityki adznačyli, što sami kandydaty nibyta mahli navat nie viedać pra takuju padtrymku. U partyi Stačilo! aficyjna zajavili, što nie vykarystoŭvała fejkavyja akaŭnty i nie paddavalisia zamiežnamu ŭpłyvu.
Češski rehulatar atrymaŭ niekalki skarhaŭ na hetyja akaŭnty i pieradaŭ infarmacyju Jeŭrapiejskaj kamisii. Tyktok, jakim u Čechii karystajucca kala čverci nasielnictva, zapeŭniŭ, što viadzie baraćbu z parušeńniami pravił i «manipulatyŭnaj dziejnaściu».
Napiaredadni parłamienckich vybaraŭ u Čechii, jakija pryznačanyja na 3—4 kastryčnika, śpiecsłužby hetaj krainy adznačajuć rost kibieratak i dezynfarmacyi z boku Rasii. U toj ža čas padčas ich jość vialikaja vierahodnaść pieramohi papulisckaj partyi ANO, jakuju ŭznačalvaje miljarder i były premjer Andrej Babiš.
Pieramoha partyi Babiša moža pryvieści da źmianšeńnia padtrymki Ukrainy z boku Čechii: naprykład, pastaŭki bolš za miljona artyleryjskich snaradaŭ mohuć być prypynienyja. Babiš krytykavaŭ hetuju inicyjatyvu jak «hniłuju» i abiacaŭ jaje spynić, a jaho namieśnik padkreśliŭ nieabchodnaść kantrolu pastavak na ŭzroŭni NATA.
BiełdziaržSMI i kanały siłavikoŭ sprabavali budaražyć Małdovu razam z rasijanami. Voś što z hetaha vyjšła
Na vybarach u Małdovie pieramahła prajeŭrapiejskaja partyja prezidenta Sandu, prarasijskaja apazicyja prajhrała
«Rasija padobnaja da vady». Jak rasijskaja prapahanda nieprykmietna zavajoŭvaje aŭdytoryju ŭ Afrycy i Łacinskaj Amierycy
Kamientary