Va Ukrainu viarnułasia chvaroba akopaŭ Pieršaj suśvietnaj vajny — hazavaja hanhrena

Vajskovyja miedyki raskazali The Telegraph, što vajna z vykarystańniem bieśpiłotnikaŭ zrabiła evakuacyju paranienych sałdat amal niemahčymaj. Heta pryvodzić da raspaŭsiudžvańnia «z pahroźlivaj chutkaściu» bakteryjalnaj infiekcyi, jakaja razburaje ciahlicy.

«My nazirajem uskładnieńni traŭmaŭ, jakich nikoli nie bačyŭ nichto z žyvych ludziej u vajenny čas», — skazaŭ vydańniu Aleks, zamiežny miedyk-vałancior, jaki pracuje ŭ Zaparožskaj vobłaści.

Pavodle jaho słoŭ, takich zatrymak evakuacyi paranienych nikoli nie było za apošnija 50 hadoŭ, z časoŭ Druhoj suśvietnaj vajny, a mahčyma, navat i raniej.

Hazavaja hanhrena — heta ciažkaja ciahlicavaja infiekcyja, jakaja vyklikajecca bakteryjami Clostridium. Chvaroba atrymała nazvu ad burbałak hazu, jakija ŭtvarajucca pad skuraj.

Bakteryi Clostridium razmnažajucca ŭ niekroznych tkankach, pazbaŭlenych kisłarodu, što vyklikaje mocny bol, aciok, źmianieńnie koleru tkanak i adčuvańnie padrapańnia cieła ŭ pacyjenta z-za ruchu hazu.

Zvyčajnaja hanhrena ŭźnikaje ŭ vyniku parušeńnia krovazabieśpiačeńnia. Jana nie źviazanaja z bakteryjalnymi taksinami abo ŭtvareńniem hazu i raźvivajecca značna pavolniej, čym hazavaja hanhrena, piša The Telegraph.

Infiekcyja zvyčajna ŭźnikaje paśla hłybokich ahniastrelnych abo vybuchovych ranieńniaŭ, u pieršuju čarhu kali miedycynskaja dapamoha źjaŭlajecca z zatrymkaj.

Jak raskazvajuć miedyki, hazavuju hanhrenu vielmi składana lačyć, a śmiarotnyja vypadki raspaŭsiudžanyja navat u najlepšych balnicach. Bieź lačeńnia ŭzrovień śmiarotnaści ad jaje — 100%.

Hazavuju hanhrenu asacyjujuć ź Pieršaj suśvietnaj vajnoj. Sałdaty zmahalisia ŭ brudnych vilhotnych akopach i na palach, časta ŭhnojenych hnojem, jakija źmiaščajuć bakteryi Clostridium. Evakuacyja i chirurhičnaje ŭmiašańnie časta zatrymlivalisia, a antybijotyki jašče nie byli dastupnyja.

Padčas Druhoj suśvietnaj vajny źjaŭleńnie antybijotykaŭ rezka źniziła śmiarotnaść ad infiekcyj na poli boju. Adnak siońnia va Ukrainie prablemy z evakuacyjaj i rost ustojlivaści da antybijotykaŭ dazvalajuć chvarobam, jakija ličyli daŭno vykaranienymi, znoŭ źjaŭlacca, piša The Telegraph.

Lačeńnie hazavaj hanhreny ŭklučaje chirurhičnaje ačyščeńnie rany razam ź vielmi mocnymi dozami antybijotykaŭ unutryvienna. Ale va Ukrainie ačyščeńnie rany, a taksama metanakiravanaje prymianieńnie antybijotykaŭ časta praktyčna niemahčymyja adrazu paśla ranieńnia.

Pavialičyć

Daktary adznačajuć, što bolšaść stabilizacyjnych punktaŭ u zonie bajavych dziejańniaŭ raźmieščanyja pad ziamloj, dzie ciažka zabiaśpiečyć sterylnaść. Z-za niedachopu resursaŭ i niebiaśpieki abstrełaŭ miedyki vymušanyja pracavać u składanych antysanitarnych umovach. Dastaŭka miedycynskich materyjałaŭ taksama abciažaranaja, pakolki kanvoi i transpartnyja srodki časta stanoviacca mišeniami praciŭnika.

«Paranienyja mohuć trapić u balnicu tolki praź niekalki tydniaŭ, a da hetaha jany ŭvieś čas lažać u padziemnych stabilizacyjnych punktach, dzie miedyki padtrymlivajuć ich žyćcio, jak mohuć», — skazaŭ The Telegraph zamiežny miedyk-vałancior Aleks.

Pavodle jaho słoŭ, mnohija vajskoŭcy z ranieńniami mahli b vyžyć, ale pamirajuć z-za taho, što ich nielha evakujavać svoječasova.

Jak raskazała Ukrainskaj słužbie Bi-bi-si doktarka USU Kaciaryna Zaremba, jana asabista nie sutykałasia z hetaj chvarobaj, ale toje, pra što havorycca ŭ artykule The Telegraph, źjaŭlajecca całkam «łahičnym i praŭdapadobnym».

«Evakuacyja paranienych sapraŭdy mocna adkładzienaja, nu, vy bačyli naviny, što čałaviek z turnikietam 30 dzion čakaŭ na pazicyi», — kaža miedyk.

Antybijotyki praduhledžanyja ŭ aptečcy vajskoŭcaŭ, ale mohuć być tam nie zaŭsiody.

«Važna, kab miedyki praviarali aptečki svaich bajcoŭ na pradmiet kamplektacyi», — dadaje Zaremba.

Dozu antybijotyka vajskoviec pavinien atrymać na praciahu 8‑12 hadzin paśla ranieńnia. Kali čałaviek jaho nie atrymaŭ, antybijotyk pavinny dać miedyki na pazicyi abo padčas evakuacyi. Pry pranikalnym ranieńni abaviazkovaja antybijotykavaja terapija.

«Ale vielmi časta miedyka na pazicyi niama i aptečka — heta adzinaje, što jość u bajca», — kaža doktarka.

Kali nie pravodzić antybijotykaterapii, zapaleńnie i hanhrena, zvyčajnaja abo hazavaja, mohuć być zvyčajnaj źjavaj.

• 0
• 1
• 1
• 0
• 5
• 22
• 1
• 0