Los syna prapahandysta sa «Sputnika», jaki pryjšoŭ da biełaruščyny padletkam, vyklikaŭ buru emocyj u jaho siabroŭ
Jutubier Usiasłaŭ Paškievič na prośbu «Našaj Nivy» pryhadaŭ svaju apošniuju razmovu ź Siamionam Małašenkavym.
17 śniežnia 2025 hoda KDB pryznaŭ ekstremisckim farmavańniem inicyjatyvu «Da zoraŭ», u skład jakoj, jak śćviardžajuć siłaviki, uvachodziać muzyka Aleś Čumakoŭ i 20‑hadovy minčuk Siamion Małašenkaŭ — syn prapahandysta «Sputnika». Abodvuch aryštavali. Vyhladaje, što razam ź imi zatrymali cełuju hrupu hramadskich i kulturnych aktyvistaŭ.
«Siamion Małašenkaŭ absalutna narmalny chłopiec, i nie maje takich ruskamirnych pohladaŭ, jak baćka. Vielmi prykra, što jaho zatrymali za arhanizacyju kancertaŭ, jakija byli absalutna lehalnymi. Nie ździŭlusia, kali baćka danos napisaŭ», — taki kamientaryj pakinuŭ niejki čałaviek pad hetaj navinoj na sajcie «Našaj Nivy».
Tata Siamiona Vasil Małašenkaŭ — uradženiec Kiemierava, ź siamji ź biełaruskimi karaniami, fiłołah pavodle adukacyi: skončyŭ Kiemieraŭski dziaržaŭny ŭniviersitet. U Biełaruś pryjechaŭ u 2004 hodzie, a ŭ nastupnym hodzie ŭ jaho naradziŭsia Siamion.
Małašenkaŭ-starejšy pracavaŭ u roznych dziaržaŭnych ŚMI (kala siami hadoŭ — u ahienctvie BiełTA), a taksama supracoŭničaŭ (i supracoŭničaje) sa Sputnik i MIA «Rośsija siehodnia». Jaho teksty i fotakredyty sustrakajucca i na finansavanych z Maskvy placoŭkach — takich, jak «Sajuznaje vieča», Eurasia.Expert, «SONAR-2050», Imhoclub.com.
Vasil — prychilnik ruskaha śvietu i «tradycyjnych kaštoŭnaściaŭ», aktyŭny abaronca RPC. Jon baćka piaci dziaciej, adzin sa stvaralnikaŭ kansiervatyŭnaha hramadzianskaha abjadnańnia «Rada baćkoŭ» (pad «baćkami» majucca na ŭvazie nie aboje baćkoŭ, a mienavita taty).
U 2023 hodzie žurnalist naviedvaŭ akupavanuju Danieččynu, byŭ u Maryupali. Viadzie telehram-kanał, na jakim krytykuje, a časta i abražaje praciŭnikaŭ rasijskaha i biełaruskaha režymaŭ.
U fejsbuku Vasila Małašenkava ŭčora źjaviŭsia post z asudžeńniem aryštu amierykancami prezidenta Madura. Ale niama ničoha pra aryšt ułasnaha syna.
My raspytali pra situacyju ź Siamionam jutubiera Usiasłava Paškieviča, jaki siabravaŭ z chłopcam, pakul žyŭ u Minsku.
Paškievič paznajomiŭsia ź Siamionam u 2019 hodzie. Siamionu było tady ŭsiaho 14 hadoŭ, a jon užo «ŭdzielničaŭ va ŭsich biełaruskamoŭnych čatach, va ŭsich imprezach. Usiudy, dzie byŭ biełaruski varušniak, tam byŭ i jon».
Siamion byŭ zaradžany na biełaruščynu, kaža Usiasłaŭ.
«Biełaruskaja kultura była dla jaho ŭsim. Heta było fienamienalna: takoje ŭražańnie, što jon naradziŭsia sa słovam «Biełaruś» na vusnach. Jon staraŭsia nivodnaj padziei nie prapuskać: vystavy, ivienty, kancerty. Zaradžany na biełaruščynu maksimalna. Nie na minuŭščynu — jaho sučasnaja kultura była cikavaja va ŭsich jaje prajavach, hodnaja muzyka. Jon sprabavaŭ stvaryć jutub-kanał. Jon maksimalna nasałodžvaŭsia tym, što robić».
Što vy viedajecie pra siamju Małašenkavych?
«Jon nie raskazvaŭ pra siamju. Ale raskazvaŭ pra svaje stasunki z tatam. Jany nie ładzilisia. I jon ad hetaha pakutavaŭ. Jon lubiŭ tatu, ale pakutavaŭ, bo zusim razychodziŭsia ŭ pohladach».
Adnak Usiasłaŭ Paškievič nie dumaje, što ŭsia hetaja historyja stała vynikam danosu baćki.
«Danos? Nie mahu skazać, nie viedaju. Jość niamała siamiej, dzie adnosiny nie składvajucca, ale ž ludzi nie pišuć adzin na adnaho danosaŭ».
Ničoha dziŭnaha, što Małašenkava zabrali za ŭdzieł u kulturnaj inicyjatyvie: «Jon vielmi lubiŭ muzyku».
«Jon čałaviek rezki, časam taksičny. Ale pry hetym vyklučna empatyčny», — uspaminaje Usiasłaŭ.
«Kali ja vyjechaŭ ź Biełarusi, ja abarvaŭ kantakty ź im — u metach biaśpieki, jaho biaśpieki, kab nie padstavić», — kaža jon.
Usiasłaŭ Paškievič pryhadvaje svaju apošniuju razmovu ź Siamionam Małašenkavym.
«Heta byŭ 2021 hod. Hod, kali zhuščalisia chmary. My źnianacku sustrelisia ŭ Minsku na Vałhahradskaj, kala elektramiechaničnaha zavoda, tam jašče pomnik Leninu staić, ź im i Iharam Pałynskim z «Sumaroka». Akurat paśla toj vypadkovaj sustrečy ja pryniaŭ rašeńnie vyjechać ź Biełarusi, bo Ihar padkazaŭ, jak praktyčna heta zrabić. Siamion pra emihracyju nie dumaŭ», — raskazvaje Usiasłaŭ.
25‑hadovy Usiasłaŭ Paškievič užo čatyry hady jak u vyhnańni. Suprać jaho zavočna zaviali kryminalnuju spravu, jahony kanał «Tutejšy Šlachcič», jaki zajmajecca papularyzacyjaj biełaruskaj historyi, kultury, movy, pryznali ekstremisckim.
«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach ci na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» adnosiać taksama praktyčna lubuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj. «Ekstremisckimi» ličacca i niepadkantrolnyja ŭładam vidy dziejnaści. Represii roznaha rodu zakranuli ŭžo kala 150 tysiač čałaviek, jašče niekalki socień tysiač vymušanyja byli pakinuć Biełaruś.
Ź infarmacyi «Našaj Nivy», Siamiona zatrymali 27 listapada 2025 hoda. Usie jaho staronki ŭ sacsietkach i na internet-płatformach źnikli, usio, što jon stvaraŭ, niedastupnaje.
Ciapier čytajuć
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ18
Kamientary
Trymajsia, Siamion! Žyvie Biełaruś!