Brytanskaja raźviedka: U bajach za Kupiansk suadnosiny strat Rasii i Ukrainy skłali 27 da 1

Kupiansk (nacisk na pieršy skład: KUpiansk) — važny čyhunačny i łahistyčny vuzieł u Charkaŭskaj vobłaści. Pieršy raz Rasija zachapiła jaho 27 lutaha 2022 hoda, na čaćviorty dzień vajny. Ale straciła jaho padčas ukrainskaha kontrnastupu ŭ vieraśni taho ž hoda. 

Minułym letam, kali asnoŭnyja siły Ukrainy byli zasiarodžany na inšych učastkach frontu, Rasija znajšła słabyja miescy ŭ abaronie Kupianska. Raptoŭny nacisk zaśpieŭ ukrainskija vojski źnianacku, i front ledź nie abvaliŭsia. Adnak pry kancy 2025 hoda ŭkraincy praviali tut paśpiachovuju kontrnastupalnuju apieracyju.

Jak piša The Washington Post, kontrnastup na paŭnočnym uschodzie staŭ adnym ź niamnohich prasoŭvańniaŭ USU za apošni hod. I jon dakazvaje, što Siły abarony zdolnyja adkinuć rasijskija vojski pry ŭmovie naležnaha ŭzbrajeńnia i arhanizacyi.

Ukraina terminova pierakinuła ŭ horad śpiecyjalizavanyja padraździaleńni bieśpiłotnikaŭ i piachoty, viarnuŭšy inicyjatyvu. Ciapier kamandziry kažuć, što jany zajmajucca misijami typu «znajści i źniščyć», začyščajučy horad ad reštkaŭ rasijskich sałdat (jakich, pavodle acenak, zastałosia nie mienš za 100) i spyniajučy novyja sproby pierapravy cieraz raku Askoł.

Niahledziačy na pośpiechi, vuličnyja bai ŭ centry horada praciahvajucca. Maleńkija hrupy sałdat z abodvuch bakoŭ zaležać ad zabieśpiačeńnia dronami, bo padvozić resursy technikaj zanadta niebiaśpiečna. Rasijskija vojski vykarystoŭvajuć dla praniknieńnia ŭ horad samyja roznyja sposaby: ad nadzimanych łodak na race Askoł da trub zakinutaha hazapravoda.

Rasijskija sałdaty časam prachodziać da 15 kiłamietraŭ pad ziamloj pa trubach, vykarystoŭvajučy elektrasamakaty, kab paskoryć ruch. Niekatoryja vychodziać z truby z prykmietami chimičnaha atručeńnia.

Jak piša The Times, ahulnyja straty akupantaŭ u rajonie Kupianska za minuły hod vymiarajucca tysiačami. Padčas bryfinhu dla vajskovaha kiraŭnictva Vialikabrytanii na minułym tydni byli ahučany ašałamlalnyja ličby: padčas bajoŭ za horad ukrainskija siły źniščyli ŭ 27 razoŭ bolš rasijskich sałdat, čym stracili sami.

Kiraŭnik Ukrainskaha centra biaśpieki i supracoŭnictva Siarhiej Kuzan u kamientary dla 24tv.ua adznačyŭ: ličby brytanskaj raźviedki, chutčej za ŭsio, tyčacca kankretnych etapaŭ apieracyi ŭ Kupiansku. Mienavita hetym i tłumačacca takija šakujučyja suadnosiny strat, jakija sapraŭdy mahli mieć miesca ŭ asobnyja pieryjady bajoŭ.

Krynicy ŭ abaronnym viedamstvie paviedamlajuć, što napiaredadni Kaladaŭ ukrainskija vojski akružyli kala 200 rasijskich sałdat. Častka akružanych rasijskich vajskoŭcaŭ znachodziłasia ŭ Kupianskaj centralnaj haradskoj balnicy. Pa ich byŭ naniesieny ŭdar ukrainskaj avijabombaj.

Dla ŭzmacnieńnia abarony horada, jaki jašče niekalki tydniaŭ tamu znachodziŭsia pad pahrozaj zachopu, byli pierakinutyja adny z najlepš padrychtavanych padraździaleńniaŭ, u tym liku 13‑ia bryhada Nachvardyi «Chartyja».

Pa acenkach ukrainskich vajskoŭcaŭ, poŭnaja začystka horada moža zaniać jašče miesiacy z-za składanaści vyjaŭleńnia rasijskich sałdat, jakija chavajucca ŭ padvałach i ruinach, biez stvareńnia ryzyki dla žyćcia ŭkrainskich vajskoŭcaŭ. Začystka kožnaha doma ŭskładniajecca tym, što nad horadam uvieś čas kružlajuć dziasiatki rasijskich dronaŭ.

19 studzienia kamandujučy Nachvardyi Alaksandr Piŭnienka zajaviŭ, što ŭkrainskija padraździaleńni kantralujuć centralnuju častku Kupianska i budynak haradskoj rady.

• 2
• 0
• 0
• 0
• 0
• 0
• 0
• 0