Biełarus, jakoha padazrajuć u Francyi ŭ špijanažy, pasprabavaŭ patłumačyć, što rabiŭ kala zavoda dronaŭ
55‑siekundnaje videa jon adpraviŭ svajmu synu, jaki vučycca ŭ Rasii.
U Francyi pa padazreńni ŭ špijanažy za zavodam dronaŭ Delair kala Tułuzy zatrymali 47‑hadovaha biełarusa. Jon fihuruje ŭ spravie jak M.A., paviedamlaje Le Monde z spasyłkaj na materyjały spravy. Voś što stała viadoma z tych materyjałaŭ.
Pavodle słoŭ mužčyny padčas śledstva, 3 červienia jon apynuŭsia ŭ pramysłovaj zonie kamuny Łabiež na paŭdniovy ŭschod ad Tułuzy vypadkova — šukaŭ aŭtamajsterniu, kab adramantavać prabituju šynu. Mienavita tak jon nibyta i trapiŭ da zavoda Delair, jaki śpiecyjalizujecca na vytvorčaści dronaŭ, u tym liku dla francuzskaj i ŭkrainskaj armij. Ubačyŭšy vyprabavańni dronaŭ u palocie zvonku terytoryi pradpryjemstva, biełarus, pavodle ŭłasnaha pryznańnia, byŭ uražany i zachacieŭ zafiksavać hety momant na videa, kab padzialicca im z synam.
Mienavita hetaje 55‑siekundnaje videa i stała hałoŭnaj ulikaj dla śledstva: jano było adpraŭlena na rasijski numar telefona, jaki naležyć synu zatrymanaha — studentu kala 20 hadoŭ, jaki vučycca ŭ Rasii.
Mužčyna nastojvaje, što syn zastajecca adzinym čałaviekam, kamu jon pakazvaŭ hetyja kadry.
Kali techniki Delair zaŭvažyli, što mužčyna zdymaje, i paprasili jaho syści, jon, pavodle ŭłasnych słoŭ, spakojna padparadkavaŭsia i nie sprabavaŭ uciačy — bo nie ličyŭ, što zrabiŭ niešta niezakonnaje. Niejki čas jon zastavaŭsia ŭ svaim aŭtamabili niepadalok, a potym pajechaŭ abiedać u restaran na vychadzie z pramysłovaj zony, dzie jaho i zatrymali.
Pierad hetym, 1 červienia, niekalki čałaviek kinuli ŭ budynak zavoda niekalki kaktejlaŭ Mołatava, jakija nie vybuchnuli.
U Francyi biełarus zarablaŭ pieraprodažam aŭto. Jon naradziŭsia ŭ 1978 hodzie, maje dvuch dziaciej — adno žyvie ŭ Biełarusi, druhoje vučycca ŭ Rasii. Aficyjna jon pražyvaje ŭ Ispanii, adnak užo kala hoda pieramiaščajecca pa roznych krainach Jeŭropy, što dadatkova pryciahvaje ŭvahu śledčych, jakija dapuskajuć, što padobnyja «pasłuhi» jon moh akazvać i ŭ inšych dziaržavach ES.
Advakat biełarusa nastojvaje, što sprava značna składaniejšaja, čym jaje padaje prakuratura, i patrabuje dadatkovych pravierak.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury4
Kamientary