U Novaj Baravoj budujuć novy dom z kvaterami ad 35 kvadrataŭ. Camaja tannaja — $86 tysiač
U Avija-kvartale Novaj Baravoj uźviaduć dom na 5 padjezdaŭ i 172 kvatery. Akramia standartnych varyjantaŭ tut budzie žyllo z terasami, kładoŭkami i navat hatovaj adździełkaj. Košt kvadrata startuje ad 1767 dalaraŭ pa kursie, piša realt.by.
Dom 14.3 stanie častkaj hrupy «Soniečny blik», pry budaŭnictvie jakoj maksimalna zachavajuć darosłyja drevy. Usia infrastruktura budzie ŭ krokavaj dastupnaści: parkinhi, mahaziny, kaviarni. Praz darohu — dźvie škoły, dziciačy sad i stadyjon. U samim Avija-kvartale źjavicca dziciačaja placoŭka ŭ vyhladzie prapielera, a taksama šmatlikija zony adpačynku z altankami, abłokami-arelami i prahułačnymi darožkami.
Prajektujučy novy dom, architektary natchnialisia soniečnymi blikami. Fasady vykanajuć u hradyjentnych adcieńniach nieba, dapoŭniać biełymi elemientami, jakija nahadvajuć abłoki, i jarkim haryzantalnym akcentam u vyhladzie soniečnaha promnia. Dom budzie pieramiennaj paviarchovaści — ad 6 da 9 pavierchaŭ.
Kvatery — płoščaj ad 35 da 115 kvadrataŭ: ad jeŭradvušak da prastornych piacipakajovych varyjantaŭ. U niekatorych kvaterach buduć kładoŭki. Tyja, chto buduć žyć na pieršym paviersie, zmohuć karystacca ŭłasnymi terasami.
U domie buduć dastupnyja kvatery z adździełkaj ad zabudoŭščyka: Basic z całkam abstalavanaj kuchniaj abo pieradčystavy farmat White Box z hatovaj unutranaj prybiralniaj (sanvuzłom). U viersii z kuchniaj kvatera budzie asnaščana ŭbudavanaj technikaj: chaładzilnikam, vyciažkaj, indukcyjnaj varačnaj panellu, duchoŭkaj i mikrachvalevaj piečču.
Prodažy kvater užo startavali. Košt kvadrata pačynajecca ad 1767 dalaraŭ u ekvivalencie. Atrymlivajecca, što samaja biudžetnaja kvatera abydziecca ŭ 86 725 dalaraŭ u pieraliku.
Usie padjezdy ŭ domie buduć prachadnymi i biezbarjernymi, z kalasačnymi, łapamyjkami, liftami i dyzajnierskimi interjerami. U afarmleńni vykarystajuć spakojnyja bieła-błakitnyja adcieńni, lustranyja dekaratyŭnyja elemienty i ciopłaje akcentnaje aśviatleńnie, jakoje praciahvaje temu soniečnych adlustravańniaŭ.
Hałoŭnaj idejaj zakrytaha dvara stanie pryrodnaja źjava hało — śvietłavoje kolca vakoł sonca. Prastora budzie abjadnana tryma kruhłymi placoŭkami, jakija simvalizujuć sonca. Dla dziaciej pastaviać hulniavyja kompleksy z horkaj, arelami, piasočnicaj i pružynnymi kačałkami. U dvary taksama źjaviacca viełaboksy, haradskija aharodziki i cichija zony adpačynku.
Niedaloka ad doma praduhledžany dva parkinhi na 300 i 150 mašyna-miescaŭ. Aŭtamabil možna budzie pakinuć i na bližejšaj parkoŭcy.
Novy dom zdaduć u čaćviortym kvartale 2027 hoda.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»9
Kamientary