Мітрапаліт Павел ініцыяваў маштабную праверку Брацтва святых віленскіх пакутнікаў — астраўка беларускасці ў БПЦ
У жніўні спецыяльная камісія пачала праверку дзейнасці Брацтва святых віленскіх пакутнікаў, якое ўзначальвае Мікола Матрунчык. Брацтва паўстала ў пачатку 1990-х гадоў і аб’яднала пад сваім крылом тых людзей у праваслаўнай царкве, якім дарагая беларуская мова і слова.
Дзейнасць брацтва ўсяляк падтрымліваў мітрапаліт Філарэт.
«Філарэт добра ставіўся да беларускай справы. Мы ўзгаднялі з ім свае планы, ён даваў нам шмат парадаў па міжнароднай лініі, калі нам не хапала свайго досведу», — расказвае спадар Матрунчык.
Брацтва віленскіх пакутнікаў было прымацаванае да Петрапаўлаўскага сабора ў Мінску. Менавіта там у свой час з’явіліся першыя літургіі на беларускай мове, якія праводзіў айцец Георгій Латушка. Шмат намаганняў брацтва ўкладвала ў пераклады праваслаўнай літаратуры, літургіі, Новага запавета на беларускую мову. Гэта быў такі астравок беларускасці ў БПЦ.
Мікола Матрунчык кажа, што сітуацыя моцна змянілася пасля прыходу мітрапаліта Паўла, які на працягу ўсяго свайго тэрміну знаходжання ў Беларусі ніяк не звяртаў увагу на дзейнасць брацтва. «Калі святкавалі 25-годдзе брацтва, то думалі, што мітрапаліт неяк паглядзіць у наш бок, але не, ён быў заняты іншымі справамі», — кажа спадар Матрунчык.
Ва ўласнасці брацтва маецца і нерухомасць, у іхнім распараджэнні ёсць дом «Кінанія» ў Калодзішчах.
Менавіта там праходзяць беларускамоўныя праваслаўныя імпрэзы, розныя трэнінгі, сустрэчы. Існуе версія, кіраўніцтва царквы палічыла, што ў брацтва існуе зашмат самастойнасці, таму і была ініцыяваная праверка.
«Наша брацтва як нейкае бяльмо ў воку для кагосьці, пастаянна чагосьці патрабуюць беларускага, якога нават у грамадстве няма, а што казаць пра царкву. А мы то адзін зварот напішам, то іншы. Прасілі ўшаноўваць больш годна беларускіх святых, каб яны сталі нацыятворчым чыннікам», — расказвае Матрунчык.
Як растлумачыў сам мітрапаліт Павел, ідзе праверка тых структураў, якія знаходзяцца ў межах мітраполіі. Спадар Матрунчык кажа, што да гэтай праверкі рыхтаваліся доўга. Усяго ў спісе на праверку каля 40 пунктаў. Праверка была завершана яшчэ 15 жніўня, а яе вынікі павінны былі быць агучаныя яшчэ 20 жніўня, але іх усё яшчэ няма.
Брацтва віленскіх пакутнікаў мае шматлікія міжнародныя сувязі і фінансава заўсёды было незалежным ад мітраполіі.
Прэс-сакратар БПЦ Сергій Лепін сказаў «Нашай Ніве», што праверкі бываюць у кожнай структуры, у тым ліку ўнутры БПЦ, ён не раіць шукаць у гэтай сітуацыі нешта надзвычайнае. Калі будуць вынікі праверкі, айцец Сергій пакуль не можа сказаць.
Мікола Матрунчык — магістр філасофіі, гісторык, публіцыст, грамадскі і царкоўны дзеяч.
Цяпер чытаюць
«Мінімальны заробак доктара ў Польшчы большы, чым я мела ў беларускім прыватным цэнтры». Доктарка Маркелава — пра працу ў польскай бальніцы і выраб натуральнай касметыкі6
Каментары