Палітзняволенага праграміста асудзілі на 4 гады калоніі за «ўзвядзенне барыкад» 10 жніўня на Пушкінскай
Суд Ленінскага раёна 10 лютага асудзіў на чатыры гады калоніі ўзмоцненага рэжыму палітзняволенага інжынера-праграміста Рамана Канановіча. Яго абвінавацілі ва ўзвядзенні барыкад з дапамогай жалезнай агароджы ў ноч з 10 на 11 жніўня каля ст. м. «Пушкінская», дзе тады загінуў пратэстовец Аляксандр Тарайкоўскі. Асноўны доказ віны Рамана — адна фатаграфія з яго тэлефона, паведамляюць праваабаронцы.
Віну палітвязень не прызнаў, ён растлумачыў на судзе, што прыбіраў агароджу з дарогі, каб вызваліць праход і прайсці ў госці да цёткі. Увесь суд над праграмістам заняў толькі тры гадзіны. Суддзя Таццяна Шоцік таксама вынесла вызначэнне: паведаміць пра прысуд і пакаранне Канановіча ў арганізацыю, дзе ён працаваў праграмістам да затрымання, каб супрацоўнікі гэтай фірмы не ўдзельнічалі ў масавых беспарадках.
Палітвязень цалкам не прызнаў віну. Раман Канановіч на судзе растлумачыў, што дапамог 10 жніўня незнаёмым людзям перацягнуць агароджу, спрабуючы яе перасунуць цалкам на зялёную зону, каб вызваліць праход, каб бесперашкодна працягнуць шлях.
«Пры мне ніхто, уключаючы мяне, агароджу на праезную частку не перацягнуў. Я працягнуў рух да метро «Пушкінская» па тратуары», — кажа Раман.
Пад вартай Раман знаходзіцца з 16 кастрычніка 2020 года.
Цяпер чытаюць
У Рэчыцы людзі выйшлі прыбіраць снег. Іх аштрафавалі5
У Рэчыцы людзі выйшлі прыбіраць снег. Іх аштрафавалі
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»1414
Каментары