Актывіст штаба Бабарыкі Халатран у апошнім слове: «Я люблю сваю радзіму — Беларусь. Я не прызнаю віну»
У судзе Фрунзенскага раёна Мінска працягнуўся судовы працэс над былым актывістам штаба Бабарыкі Лявонам Халатранам. Яго абвінавачваюць па артыкуле 341 ч. 1 КК «Арганізацыя альбо падрыхтоўка групавых дзеянняў, якія груба парушаюць грамадскі парадак».
У ноч выбараў на 10 жніўня, паводле версіі абвінавачання, Халатран удзельнічаў у беспарадках у раёне вуліц Багдановіча і праспекта Машэрава. Сам Халатран кажа, што проста выйшаў са штаба прагуляцца.
Пракурор запрасіў для абвінавачанага два гады хіміі. 17 лютага Лявон выступіў з апошнім словам:
«Я — прадпрымальнік, самастойна зарабляю сабе на жыццё. Мае бацькі медыкі: бацька — вайсковы, мама — цывільны.
Я законапаслухмяны грамадзянін, які любіць сваю радзіму — Беларусь. У сакавіку ў майго маленькага сына будзе дзень нараджэння, які б я хацеў сустрэць разам.
Як можна заблакаваць рух дарожнага транспарту, калі ён быў заблакаваны раней ДАІ? Як можна перашкодзіць працы грамадскага транспарту, калі выйшаў на вуліцу праз паўгадзіны пасля апошняга рэйсу?
Пра якія групавыя дзеянні можна казаць? У горадзе быў адключаны інтэрнэт, таму я перазвоньваўся са знаёмымі, каб падзяліцца важнымі ў той вечар навінамі. Так рабілі тысячы людзей. Я нікога не каардынаваў. Проста гуляў па горадзе, дзе няма каменданцкай гадзіны.
Мне здаецца, што абвінавачанне не чуе таго, што я кажу. Я не прызнаю сваю віну і прашу апраўдаць мяне цалкам. Таксама я хачу выказаць словы падтрымкі тым людзям, якія цяпер у зняволенні: Віктару і Эдуарду Бабарыкам, Марыі Калеснікавай, Максіму Знаку, Аляксандру Васілевічу і іншым».
Халатран з’яўляўся кіраўніком Ruin Bar у культавай культурнай прасторы ОК16. Летась стаў валанцёрам каманды Віктара Бабарыкі на прэзідэнцкіх выбарах. Прызнаны палітвязнем.
Прысуд па яго справе будзе агучаны 19 лютага, пасяджэнне прызначана на 10.05.
Чытайце таксама: «Дубасілі па галаве, прыгаворваючы: «чарнадупы». Гутарка з жонкай палітвязня Лявона Халатрана пра выхаванне сына без бацькі і ратаванне творчасцю
Цяпер чытаюць
Хто з палітвязняў выйшаў на свабоду 16 верасня ПОЎНЫ СПІС18
Каментары