Зяленскі: Пераможцаў у вайне не будзе

У вайне Расіі супраць Украіны больш не можа быць перамогі для абодвух бакоў — толькі спыненне баявых дзеянняў дзеля захавання чалавечых жыццяў. У той жа час некаторыя партнёры памылкова лічаць, што Пуціну патрэбная толькі частка ўкраінскай тэрыторыі, заявіў Уладзімір Зяленскі ў інтэрв'ю CBC News, піша РБК-Украіна.

Зяленскі заявіў: давядзецца змяніць меркаванне Пуціна.

«У яго самая вялікая тэрыторыя ў свеце, і яму патрэбныя нейкія кіламетры? Вось чаму вельмі дзіўна, калі некаторыя партнёры кажуць: яму патрэбная толькі гэтая частка Украіны, вось гэтыя кіламетры, і ўсё», — адзначыў прэзідэнт.

Ён дадаў, што гаворка ідзе не толькі пра асобныя кіламетры, а пра ўсю Украіну як частку Расіі. Мэта Крамля значна шырэйшая, чым атрыманне асобнага ўчастка зямлі — гаворка ідзе пра поўнае падпарадкаванне краіны.

Прэзідэнт Украіны таксама пракаментаваў ідэю аб рашэнні, выгадным адначасова і Расіі, і Украіне.

«Паміж намі кажучы, у гэтай вайне не можа быць win-win. Пасля столькіх чалавечых страт яна перастала быць пра перамогу для абодвух бакоў яшчэ ў першы дзень», — заявіў Зяленскі.

Паводле яго слоў, адзіная сапраўдная перамога зараз — гэта проста спыніць вайну дзеля чалавечых жыццяў, а не шукаць формулу, аднолькава выгадную абодвум бакам.

Зяленскі падкрэсліў, што Украіна і ЗША знаходзяцца ў пастаянным дыялогу і працягваюць перамовы — амерыканскі бок, паводле яго слоў, прымае розныя меры падтрымкі.

У той жа час наконт санкцый прэзідэнт адзначыў: ЗША варта дзейнічаць мацней і рашучэй, каб цалкам знішчыць здольнасці Расіі весці вайну.

Зяленскі распавёў, што амерыканскі бок папрасіў не раскрываць дэталі перамоў у медыя, пакуль працягваецца прапрацоўка агучаных ідэй.

Цяпер ідзе падрыхтоўка да сустрэчы прэзідэнта з Дональдам Трампам у Нью-Ёрку, якая запланаваная на канец верасня.

Раней Джарэд Кушнер ужо назваў галоўную перашкоду ў перамовах — паводле яго слоў, ЗША падрыхтавалі асноўную частку пагаднення аб завяршэнні вайны, але Кіеў не згаджаецца на тэрытарыяльныя патрабаванні Пуціна адносна Данбаса.

Паводле слоў Давіда Арахаміі, аднаго з удзельнікаў каманды перамоў, Расія можа вярнуцца да перамоўнага працэсу ўжо ў пачатку кастрычніка — пасля выбараў у Дзяржаўную думу, якія павінны адбыцца ў верасні.

Тым часам крыніца РБК-Украіна паведаміла, што вынікам працы Уіткафа і Кушнера можа стаць энергетычнае перамір'е паміж Украінай і РФ зімой — амерыканскі бок аргументуе гэта тым, што ў папярэднія зімы Расія так і не дасягнула сваёй мэты.

• 0
• 0
• 0
• 0
• 0
• 0
• 0
• 0