«Ніколі не будзе, што з тэрыторыі Беларусі нейкія войскі атакуюць Кіеў. Ні-ко-лі!» Прыводзім заявы Лукашэнкі пра вайну з Украінай

5 жніўня 2020 года

Адна з самых вядомых заяў была зроблена ў інтэрв'ю ўкраінскаму журналісту Дзмітрыю Гардону напярэдадні выбараў.

Павялічыць

«У нас ёсць даныя, што расіяне разгорнуць падраздзяленні ў рамках саюзных абавязальніцтваў і могуць нанесці ўдар з поўначы па Кіеве, — падчас інтэрв'ю Лукашэнка згадваў размову з Аляксандрам Турчынавым (у 2014 годзе в.а. прэзідэнта Украіны). — Ён мне кажа: «Вы ж разумееце, што мы не выстаім». Я кажу: «Саша, ніколі не будзе, што з тэрыторыі Беларусі нейкія войскі атакуюць Кіеў. Ні-ко-лі!»

Тады ён назваў подласцю такі варыянт развіцця падзей.

29 лістапада 2021 года

Напрыканцы мінулага года пра ўкраінскую памежную аперацыю «Палессе» ён выказваўся больш ваяўніча:

«Яшчэ раз хачу падкрэсліць: мы не бразгаем зброяй. Мы разумеем, што такое вайна. Мы многія перажылі нягоды пасляваенных гадоў, калі голыя, распранутыя з зямлянак не маглі вылезці.

Цяпер больш-менш жывём прымальна, мы не хочам ніякіх войнаў. Калі хто-небудзь хоча з намі размаўляць як з мірнымі людзьмі — калі ласка, з сённяшняга дня.

Мы гатовыя размаўляць. Але калі хтосьці да нас з мячом прыйдзе або са стрэльбай, у нас ёсць чым адказаць».

28 студзеня 2022 года

Сёлета частата згадвання вайны ў прамовах Лукашэнкі павялічылася. Падчас паслання народу ён заявіў наступнае:

«Дык будзе вайна ці не? Яна будзе. Але толькі ў двух выпадках. Калі супраць Беларусі будзе праведзеная прамая агрэсія. Калі супраць нашай Беларусі будзе развязаная гарачая вайна.

Мы ўсе як адзін, і нават тыя, хто не хоча, устануць на абарону нашай зямлі і нашай айчыны. Стагоддзямі наш народ змагаўся за сваю зямлю, за незалежнасць і суверэнітэт. Мы атрымалі, мы дамагліся гэтай незалежнасці. І сёння момант, калі трэба гэтую незалежнасць абараніць. 

І другі момант, калі быць вайне, і Беларусь будзе ў ёй удзельнічаць — калі на нашага саюзніка, Расійскую Федэрацыю, ажыццявяць непасрэдны напад, і такая ж агрэсія будзе здзейсненая супраць тэрыторыі РФ. Аснова таму — нашы саюзныя дамоўленасці».

«Хачу адказаць калектыўнаму Захаду. У іх гэтае пытанне вельмі важнае: ці будуць войскі на тэрыторыі Беларусі? Калі на нашу краіну будзе здзейсненая агрэсія, тут будуць сотні тысяч расійскіх войскаў, якія з сотнямі тысяч беларусаў будуць бараніць гэтую святую зямлю».

Павялічыць

3 лютага 2022

Лукашэнка зноў згадаў вайну і Украіну на сустрэчы з міністрам абароны Расіі Сяргеем Шайгу, абмяркоўваючы вучэнні «Саюзная рашучасць — 2022»:

«Сёння ў нас, на жаль, адкрываецца паўднёвы фронт, паўднёвы накірунак. Мы вымушаныя ўмацоўваць мяжу з Украінай. Таму вучэнні дапамогуць вызначыць самыя болевыя кропкі на гэтым накірунку для таго, каб без лішніх выдаткаў стварыць абарону на нашых паўднёвых рубяжах. А гэта таксама важна і для Расійскай Федэрацыі.

Павялічыць

Таму размовы пра вайну, не вайну і гэтак далей… Палезуць — атрымаюць. Вось і ўся вайна. Нам чужога не трэба. Дай бог сваё асвоіць — ад Брэста да Уладзівастока».

4 лютага 2022 года

У інтэрв'ю расійскаму прапагандысту Уладзіміру Салаўёву на пытанне, ці верыць ён у пачатак вялікай вайны (спачатку ва Украіне, потым у Еўропе) Лукашэнка адказаў адмоўна:

«АДКБ што паказала… пакуль яны там разгорнуцца і перашлюць нейкія войскі, мы ўжо будзем стаяць каля Ла-Манша. [ … ] Яны разумеюць, што бесперспектыўна з намі ваяваць, перш за ўсё з Расіяй».

Павялічыць

У гэтай жа размове ён зноў выказаўся пра вайну з паўднёвым суседам: «Украіна ніколі не будзе з намі ваяваць. Гэтая вайна працягнецца ну максімум тры-чатыры дні. Там не будзе каму супраць нас ваяваць! [ … ] Як толькі ледзь-ледзь запахла, Валодзя Зяленскі адразу трухнуў: «Хлопцы, хлопцы».

10 лютага 2022 года

Чарговая заява аб тым, што вайны не будзе, была зробленая ў кадравы дзень:

«Проста перакананы, што ніякай гарачай вайны не будзе. Ужо занадта мы прывыклі да камфорту, а з зоны камфорту вылезці і пачаць ваяваць… […] Я не думаю, што калі звар'яцелыя нейкія нацыкі ва Украіне не зладзяць правакацыю… Мы не падышлі, і ваяваць не будзем».

14 лютага 2022 года

Некалькі тыдняў таму Лукашэнка сустракаўся з былым Старшынёй Вярхоўнай Рады Украіны Аляксандрам Марозам. Падчас яе ён выкарыстаў іншыя выразы:

«Я дакладна ведаю, што трэба сёння тут Захаду. Трэба развязаць канфлікт. Яны ж, вы ведаеце, умеюць чужымі рукамі… А яшчэ лепш паваяваць чужымі рукамі, чужымі людзьмі. Ды хай гінуць там — украінцы, рускія, беларусы. Гэта далёка. Цяпер гвалт: а, вайна, вайна … Паслухайце, ну калі б планавалі нейкую вайну супраць Украіны, зусім па-іншаму б паводзілі сябе СМІ. [ … ] Як толькі сціхаюць на імгненне гэтыя крыкі пра вайну ва Украіне, з Амерыкі зноў ідзе сігнал, і гэтая істэрыя пачынае падагравацца.

А гэтая брахня з нагоды таго, што вось тут Лукашэнка гатовы напасці на Украіну… Слухайце, мне гэта ніколі не трэба было, не трэба і цяпер».

18 лютага 2022 года

Апошняе абвяржэнне было зробленае ў Маскве, на брыфінгу з Пуціным:

«Ніхто не хоча вайны і канфліктаў. Нам гэта не трэба. Ні расіянам, ні беларусам».

• 0
• 0
• 0
• 0
• 0
• 0
• 0
• 0