«Добра, што ёсць кнігі і ўсеагульная вера». Сваякам даходзяць весткі ад Сцяпана Латыпава з турмы
Сябры палітвязня Сцяпана Латыпава расказваюць у інстаграме, што лісты ад яго атрымліваюць бацька і родная цётка. Ад бацькі і цёткі таксама даходзяць лісты і Сцяпану. А таксама «зрэдку прабіваюцца паштоўкі і вестачкі ад сяброў і суседзяў з вялікай затрымкай», піша «Радыё Свабода».
Сябры пішуць, што ў Сцяпана скончыліся канверты і папера, бо пісаў, адказваў, але, «відаць, лісты зніклі ў віры падзей». Кажуць, што «настрой нармальны настолькі, наколькі ён можа быць там».
Сцяпан малюе, «калі ёсць на чым», шмат чытае — прачытаў Оскара Уайлда, Джэка Лондана, О'Генры.
«Скончыліся сушаныя маліны, пакуначак якіх прывёз з Валадаркі, як талісман — 55 ягадак! Калі піць раз на тыдзень, то павінна было хапіць на год! Не хапіла. Кінуў у гарбату барбарыс, лядзяш і, калі разжаваць ягадку, то, пахрумкваючы костачкамі, можна пераканаць сябе, што ў гарбаце цэлая лыжка малінаў».
Сябры перадаюць усім «велізарнае прывітанне ад Сцяпана» і цытуюць радкі з ягонага ліста: «Добра, што ёсць кнігі і ўсеагульная вера».
Сцяпан Латыпаў асуджаны лукашэнкаўскім судом да 8,5 гадоў зняволення, год таму яго перавялі на два гады на турэмны рэжым.
Цяпер чытаюць
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»2222
Каментары