Паводле закона, пасля смерці экс-кіраўніка дзяржавы з бюджэта павінны плаціць усім членам яго сям'і.
Днямі дэпутаты ўхвалілі праўкі ў закон «Аб прэзідэнце Рэспублікі Беларусь», якія гарантуюць шыкоўнае жыццё на пенсіі Лукашэнку і ягонай сям'і. Пра якую суму выплат ідзе гаворка?
У абноўленым законе гаворыцца, што экс-прэзідэнт працягне пажыццёва атрымліваць зарплату штомесяц у 100-працэнтным памеры. Гэтыя выплаты гарантуюцца незалежна ад таго, ці ёсць у яго іншыя крыніцы даходу.
Апошні раз звесткі пра заробак Лукашэнкі публікаваліся перад выбарамі 2020 года. Тады ён пазначыў, што за 2019 год зарабіў 117 068 рублёў. Гэта 9755 рублёў на месяц.
Калі пералічыць у валюту, заробак Лукашэнкі складаў каля 4670 даляраў.
Аднак, як вынікае з абноўленага закона, памер рэгулярных выплат пасля адыходу ад улады будзе роўны заробку новага дзеючага прэзідэнта.
Такім чынам Лукашэнку не будзе страшная ніякая дэвальвацыя або дэнамінацыя беларускага рубля. Так ён засцярог сябе ад трапляння ў пастку, у якой апынуўся першы кіраўнік незалежнай Беларусі Станіслаў Шушкевіч, калі цягам некалькіх гадоў атрымліваў пенсію эквівалентную некалькім далярам. У 2013-м, напрыклад, пенсія першага кіраўніка незалежнай Беларусі складала 37 цэнтаў, а ў 2015-м — 20 цэнтаў.
Нагадаем, Лукашэнка ў 1997-м адмяніў пастанову парламента аб пажыццёвай пенсіі былому прэм'еру і кіраўніку дзяржавы ў памеры 70-75% ад акладу дзейнага прэм'ера і спікера. Гэта азначала, што пенсіі былі зафіксаваныя на ўзроўні сум, пазначаных на момант выдання дэкрэта.
Дабіцца павышэння пенсіі ў Шушкевіча атрымалася толькі напрыканцы 2015 года — ён стаў атрымліваць 220 даляраў.
Паклапаціўся пра сям'ю
Вяртаючыся да асобы Лукашэнкі — за кошт бюджэту будзе арганізавана не толькі яго пахаванне і ўвекавечанне памяці.
Згодна з законам, пасля смерці экс-прэзідэнта кожнаму з членаў яго сям'і пажыццёва прызначаецца грашовае ўтрыманне (100% ад зарплаты дзейнага прэзідэнта) незалежна ад наяўнасці ў іх іншых крыніц сродкаў да існавання.
Хто маецца на ўвазе пад членамі сям'і, якія пасля смерці экс-прэзідэнта будуць атрымліваць прэзідэнцкую зарплату, не ўдакладняецца.
Таксама, згодна з абноўленым законам, сам экс-прэзідэнт і члены яго сям'і будуць мець дзяржаўную ахову.
Апроч гэтага, былому прэзідэнту бясплатна перадаецца ва ўласнасць на выбар для пастаяннага пражывання нерухомасць, якая знаходзіцца ў дзяржаўнай уласнасці ў Беларусі, уключаючы зямельны ўчастак з размешчанымі на ім капітальнымі пабудовамі, іншай нерухомасцю, у тым ліку гаспадарчага прызначэння, а таксама рухомая маёмасць, звязаная з добраўпарадкаваннем і эксплуатацыяй нерухомасці, гаворыцца ў дакуменце.
Цалкам азнаёміцца з дакументам можна па спасылцы.
«Наша Нiва» — бастыён беларушчыны
ПАДТРЫМАЦЬ
Лукашэнка быў у Маскве без георгіеўскай стужкі. Наяўнасць або адсутнасць стужак падзяліла гасцей парада на дзве групы10
Каментары