Чаму ў Пінску так шмат змей на набярэжнай і адкуль з'явіліся гадзюкі на градках
На набярэжнай у Пінску, дзе кожны год заўважаюць вужоў, гэтым разам іх колькасць прыкметна павялічылася, што звязана з паводкамі і пацяпленнем клімату. Змеі сталі лягчэй пераносіць зімоўку ў Беларусі, праз што іх колькасць узрасла. Пра гэта расказаў загадчык лабараторыі Палескага аграрна-экалагічнага інстытута НАН Беларусі Віктар Дзямянчык у эфіры тэлеканала СТБ, піша «Люстэрка».
«У Пінску набярэжная заўсёды вабіла земнаводных, там ёсць корм для вужоў. Для іх гэта літаральна сталоўка, жывая бясплатная сталоўка, бо, па-першае, яна выграваецца, там шмат шчылін, там заўсёды шмат часночніц. Калі зусім сцямнее, там і шэрыя жабы паказваюцца», — растлумачыў навуковец штогадовае з’яўленне вужоў на набярэжнай.
Паводле мясцовых жыхароў, змеі поўзаюць толькі на набярэжнай, у дамах іх пакуль не бачылі. Сёлета сярод вужоў былі заўважаныя і гадзюкі, аднак, паводле звестак тэлеканала, гэтых атрутных змей усё часцей можна сустрэць у агародах мясцовых жыхароў. У Беларусі кожны год афіцыйна рэгіструецца каля 50 выпадкаў укусу гадзюкі, а паводле неафіцыйнай статыстыкі, такіх выпадкаў нашмат больш.
«Уявіце, вялікая вёска Стахава, дзе ў жыцці гадзюкі не бачылі, — і адзначаецца факт, што проста на агародзе жанчыну ўкусіла гадзюка. А чаму так атрымліваецца? Яны пачынаюць шукаць больш вільготныя месцы. А дзе сярод лета ці ў пачатку лета такія пастаянна вільготныя месцы падтрымліваюцца? Там, дзе паліваюць людзі», — расказаў Дзямянчык.
Навуковец папярэдзіў, што хутка ў беларускіх гарадах можна будзе часцей сустрэць розных прадстаўнікоў дзікай прыроды праз змену клімату.
Над шэрым кардыналам Нацбанка згусціліся хмары? Затрымалі яго сябра, былога выканаўчага дырэктара Банка развіцця7
Каментары