Дэпутат: «Кошт квадратнага метра не павінен перавышаць сярэднямесячнага заробку». Наколькі гэта рэальна?
У сталіцы квадрат у новабудоўлях без дзяржпадтрымкі цяпер каштуе ад $1150. Гэта значна вышэй за сярэдні заробак па краіне.
Метр жытла за месяц працы
Дэпутат Сяргей Казачок заявіў, што кошт квадратнага метра не павінен перавышаць памер сярэдняй зарплаты па краіне. У прыватнасці, калі гаворка ідзе пра будаўніцтва жылля для малазабяспечаных слаёў насельніцтва і жылля, якое будуецца па льготных крэдытах для маладых і шматдзетных сем'яў.
Казачок пераконвае, што цана квадратнага метра павінна быць рэгуляванай, а рэнтабельнасць пры будаўніцтве такіх аб'ектаў не павінна перавышаць 5%.
Сярэдні налічаны заробак па стане на ліпень 2024 года складаў у Беларусі 2355 рублёў — або каля $740. Праўда, калі лічыць заробак чыстымі, то застанецца 2025 рублёў (каля $635). Невядома, якую з лічбаў мае на ўвазе дэпутат.
Параўнаем, як суадносяцца заробкі з цэнамі на жыллё. Спачатку паглядзім на нерухомасць у рэгіёнах.
Так, напрыклад, у Гродне квадрат у новабудоўлі ад «Гроднажылбуд» каштуе 1800-1900 рублёў ва ўжо гатовым панэльным 19-павярховым доме. Па аналагічных цэнах прадаюць кватэры ў новабудоўлях і ў Магілёве. І гэта звычайнае рынкавае жыллё без якой-небудзь дзяржаўнай падтрымкі.
Выходзіць, што заява дэпутата ў першую чаргу адносіцца да Мінска, дзе кошт жылля значна вышэйшы, чым у рэгіёнах?
У сталіцы квадрат у новабудоўлях без дзяржпадтрымкі пачынаецца з цаны ў $1150, ці каля 3680 рублёў. Гэта значна вышэй не толькі за сярэдні налічаны заробак па краіне, але і па Мінску, дзе, па апошніх даных, зарплата складае 3103 рублі.
Ці магчыма дасягнуць агучаную мэту?
Пра формулу «1 м² жытла = адна сярэднемесячная зарплата па краіне» чыноўнікі кажуць не першы раз.
Так, напрыклад, у 2013 годзе Андрэй Кабякоў, тады кіраўнік Адміністрацыі прэзідэнта, заяўляў, што сабекошт квадратнага метра пры будаўніцтве панэльнага жылля ў Мінску складае каля $550-650. У той час кошт квадратнага метра ў панэльных дамах дасягаў $1300.
Тэму абмяркоўвалі і вясной-летам 2023 года. У маі мінулага года міністр архітэктуры і будаўніцтва Руслан Пархамовіч паведаміў, што сабекошт аднаго квадратнага метра жылля, якое здавалі ў эксплуатацыю на пачатку 2023 года, складаў 1500 рублёў. Гэта каля 500 даляраў па тагачасным курсе.
Для параўнання, сярэдні заробак за той жа перыяд дасягаў 1730 беларускіх рублёў.
Таксама вясною 2023 года выйшла пастанова Саўміна, у якой гаварылася пра прыняцце мер па рэгуляванні кошту будаўніцтва жылля з дзяржаўнай падтрымкай, каб сярэдні кошт квадратнага метра такога жылля не перавышаў сярэднямесячную зарплату.
Калі супаставіць узровень сярэдняй зарплаты па краіне (2355 рублёў) і цану квадрата з дзяржпадтрымкай, па якой летась прадавалі кватэры ў доме на вуліцы Валгаградскай (2320 і 2428 рублёў), то атрымліваецца, што дасягнуць абяцання рэальна. Тым больш на носе новая электаральная кампанія.
З месяц таму Беларусбанк змяніў правілы выдачы льготных крэдытаў для чаргавікоў, якія маюць патрэбу ў паляпшэнні жыллёвых умоў.
Льготная стаўка ў 12,5% застаецца, але цяпер уведзены тэрытарыяльны прынцып. Калі раней можна было стаяць у чарзе на паляпшэнне жыллёвых умоў у любым горадзе і набыць кватэру па льготным крэдыце ў Мінску, то цяпер гэтага зрабіць нельга.
Цяпер чытаюць
Загнуўся бізнэс члена хакейнай каманды Лукашэнкі, які абяцаў пабудаваць лыжны манеж за Вярхоўным судом узамен на ласыя ўчасткі3
Каментары