Расійскі святар, які прапагандаваў «уваскрасенне» загінулых ва Украіне, расказваў полацкім студэнтам пра каханне
Прэс-служба Полацкага дзяржаўнага ўніверсітэта паведаміла, што перад ягонымі студэнтамі прачытаў лекцыю пад назвай «Слова пра каханне» протаіерэй Арцемій Уладзіміраў, прадстаўлены таксама як «філолаг-русіст, педагог вышэйшай катэгорыі, член Саюза пісьменнікаў Расіі».
На лекцыі Арцемій Уладзіміраў расказваў пра адносіны паміж юнаком і дзяўчынай, пра мужчынскія паводзіны і шлюб.
Таксама падчас сустрэчы госць з Расіі прэзентаваў свае новыя кнігі, прымеркаваныя да 900-годдзя Полацкага манастыра і прысвечаныя княгіні Вользе і Еўфрасінні Полацкай.
Арцемій Уладзіміраў у пачатку XXI стагоддзя атрымаў вядомасць як аўтар праваслаўных кніг для дзяцей і бацькоў. У 2019 годзе Уладзіміраў расказваў, што, маўляў, меў зносіны з духам памерлага ў 1882 годзе Чарльза Дарвіна. Па словах святара, навуковец прасіў яго не верыць у тэорыю эвалюцыі.
Пасля пачатку поўнамаштабнай вайны ва Украіне ён цалкам падтрымаў палітыку расейскага кіраўніцтва. Арцемій актыўна выступае з праваеннымі пропаведзямі, у якіх прайграе асноўныя ўстаноўкі расійскай дзяржаўнай прапаганды.
У маі 2024 года ў адным з выступленняў святар расказаў, што часта мае зносіны з расійскімі вайскоўцамі і тлумачыць ім, што «смерці няма». У дадатак ён расказаў гісторыю пра нібыта ўваскрэслага пасля гібелі на вайне ва Украіне кітайца.
«Перад вялікім постам я паглядзеў ролік пра нейкага кітайца, які ўдзельнічаў у СВА, атрымаў кулю ў жывот, якая развярнула ўсе ягоныя вантробы, ад гэтага памёр і ўваскрос. Яму з'явіўся свяціцель Лука Крымскі, яго вылечыў», — заявіў святар.
Паводле яго, гэта не адзінкавы выпадак. А кітаец пасля «ўваскрашэння» разам з усёй сваёй сям'ёй стаў адэптам РПЦ.
Праўда, пасля аказалася, што бацюшка пераблытаў кітайца з якутам, а той быў памёр не зусім, а перажыў клінічную смерць на аперацыйным стале пасля ранення.
Каментары
сабой
вунь як ціскае хлопца
Таракан як сапраўдны паразіт, якому камфортна ў антысанітарыі, ператварыў краіну ў каналізацыю- усё гэ сюды сцякаецца.