У нямецкім горадзе Ібенбюрэне (зямля Паўночны Рэйн — Вестфалія) па падазрэнні ў крадзяжы з крамы вялікай колькасці плітак шакаладу затрымалі двух беларусаў ва ўзросце 34 і 40 гадоў. Пра гэта паведамляе «Беларусь і свет».
У суботу 29 сакавіка ўвечары экіпаж патрульнай машыны накіраваўся ў дысконтны магазін на Райнер-штрасэ ў сувязі з атрыманым паведамленнем пра крадзеж. Паводле атрыманай інфармацыі, двое невядомых мужчын скралі значную колькасць шакаладу.
Неўзабаве праваахоўнікі заўважылі аўтамабіль, які, па ўсім відаць, спрабаваў пазбегнуць праверкі. Volkswagen Touran з польскімі нумарамі рухаўся з перавышэннем хуткасці. Патруль пачаў пераслед і запатрабаваў спыніцца. У выніку машына гэта зрабіла.
У кампактвэне былі выяўленыя некалькі вялікіх пакетаў, у якіх знаходзіліся сотні плітак шакаладу і іншыя прадукты на суму больш за 2 тысячы еўра. Далейшае разбіральніцтва паказала, што нашы суайчыннікі меркавана прысвоілі гэтыя тавары.
Высветлілася, што падазраваныя не маюць пастаяннага месца жыхарства ў Германіі і што ў дачыненні да іх ужо было заведзена некалькі спраў. Мужчын даставілі да суддзі. Цяпер яны знаходзяцца пад вартай.
Цяпер чытаюць
Заканчваецца тэрмін даўніны па народным пратэсным артыкуле. Больш нікога не пасадзяць? Не, ёсць нюансы11
Каментары