Здаецца, лета ў Мінску набірае абароты — ужо некалькі дзён запар у сталіцы за 20 цяпла. Надвор'е спрыяе таму, каб у меню гараджан з'явіліся халодныя стравы і дэсерты. Айчынныя вытворцы, трэба прызнаць, трымаюць руку на пульсе і імкнуцца здзівіць спажыўца незвычайнымі халоднымі дэсертамі і напоямі. Выданне Blizko.by расказала пра зусім незвычайны летні дэсерт.
Такога ў Менску дакладна яшчэ не было: у адной са сталічных крам прадаюць марозіва-халаднік. Так, вы ўсё прачыталі правільна: марозіва-халаднік! Гэта значыць, не дэсерт са смакам аднаго з самых папулярных у беларусаў халодных супоў, а менавіта два ў адным: страву можна ўжываць і як суп, і як дэсерт. Пра гэта, дарэчы, папярэджваюць на касе пры продажы тавару.
Слоічак незвычайнай стравы масай у 330 грамаў прадукту каштуе 13 рублёў. Прадаюць яго на Чкалава, 20 у краме «Шэдэўры смаку».
Мабыць, за гэтыя грошы можна купіць столькі ж класічнага марожанага. Але тут, як той казаў, на смак і колер…
У руках — пластыкавы слоічак са змесцівам бурачнага колеру ўсярэдзіне. Бонусам да асноўнай стравы ідзе яшчэ адна ёмістасць — у ёй бульба пай (храбусткая бульбяная стружка-саломка).
Перад тым, як адкрыць марозіва-халаднік, можна прачытаць, як прадукт заяўляе вытворца. Такім чынам, куплены тавар называецца «Сарбет халаднік з бульбай пай замарожаны».
Па класіцы, сарбет — гэта замарожаны дэсерт на аснове фруктовага пюрэ і вады. Звычайна сарбет не ўтрымлівае малочных прадуктаў. Сарбет мае падобную з марозівам тэкстуру, але не зусім яно.
Што ў складзе квашаніны-марожанага? Тут ёсць кефір з тлустасцю ў 2,5%, вада, буракі, агурок, смятана з тлустасцю ў 22%, сухая аснова для падрыхтоўкі марозіва, цыбуля, зеляніна, бульба свежая, цукар, кроп, чорны перац.
Тэрмін прыдатнасці прадукту складае 30 дзён. Гэты слоічак халадніка-дэсерту быў выраблены 13 чэрвеня, так што з гэтым усё ў парадку.
Для аматараў сачыць за бялкамі, тлушчамі і вугляводамі ў спажыванай ежы такая інфармацыя: у ста грамах прадукту больш за ўсё вугляводаў — 10,57 грама, тлушчаў — 3,07 грама і бялкоў — 1,82 грама. Энергетычная каштоўнасць — 77,47 кілакалорый.
Каб азнаёміцца са складам прадукту, давялося ладна напружыцца: тэкставая інфармацыя на слоічку надрукаваная не зусім добра — многія літары сцёртыя. Магчыма, гэта першапачатковы брак друку, а магчыма — уздзеянне холаду на ўпакоўку (халаднік ляжаў у халадзільніку перад рэалізацыяй).
Вытворца адзначае чатыры плюсы гэтай стравы:
- эканомія часу для гатавання;
- прадукт падабаецца дзецям;
- на 100% натуральны прадукт;
- суп-дэсерт не ўтрымлівае ГМА.
На жаль, на момант дэгустацыі дзяцей пад рукой не аказалася, таму журналісты не змаглі вопытным шляхам праверыць адну з вартасцяў прадукту, але дарослыя з рэдакцыі суп-дэсерт паспрабавалі. Вось іх ўражанні:
«Гэта вельмі смачна. Пах халадніка і гародніны. Адчуваецца, што тут і насамрэч натруальныя прадукты — нічога «хімічнага». Вельмі незвычайная страва. Чысты халаднік, несалодкі. Падобна на свежае агародніннае пюрэ. У спякоту тое, што трэба».
«Бульбачка ачмурэнная. Такое адчуванне, што на сале нейкім пасмажаная. Знешні выгляд халадніка насцярожвае. А на смак… Смак халаднічка, вельмі смачна. Адзінае, што шмат лёду, яму трэба даць адтаць трохі. У цэлым, смачна».
«Мне непрыемны знешні выгляд прадукту. Я загадзя прадузяты да гэтага халадніка, таму што замарожаны суп для мяне — гэта нейкая дрэнь. Я памятаю, што піў агароднінны сок, мне не спадабалася, думаю тут нешта падобнае. У гэтай масы — смак бурачніка, так. Мне цяжка ўявіць сцэнар, калі камусьці такое захочацца з'есці. Ну, гэта значыць, ты ідзеш па вуліцы ў спякоту і такі: «Трэба астудзіцца». І замест марожанага бярэш вось гэта. Яно ж горкае нейкае… Але, думаю, калі яго размарозіць, атрымаецца цалкам сабе ядомае, але трэба быць вялікім аматарам падобнай ежы. Пры гэтым бульба пай вельмі смачная — яе я б еў лыжкамі».
«Прышпільны смак. Натуральны халаднік. Адчуваю буракі, смятану або кефір, агурок адчуваю. Гэта проста вельмі смачны замарожаны халаднік. Бульба вельмі смачная. Я б купляў».
«Выдатна прадуманая ўпакоўка. Слоічак гэты, па-першае, зручна адкрываць: змесціва не пральецца, нават калі яно растане. Па-другое, бульба, пададзеная асобна, — гэта шык! Зараз будзем спрабаваць… Смачна! Ёсць кісліначка, адчуваецца бурачок. Адчуваю кропчык, агурочак, можа быць, нават яйка. Усё, што павінна быць у сапраўдным халадніку».
«На выгляд, скажам шчыра, не вельмі. На смак — натуральны халаднік. Але халаднік усё ж такі павінен быць вадкім, а гэтая маса — даволі густая, як мус або суп-пюрэ. Я б такое рэгулярна есці не стала».
Каментары