За апошнія гады ў Мінску і іншых беларускіх гарадах рэкламы анлайн-казіно і ставак на спорт стала значна больш. З некаторых ракурсаў у сталіцы бачна адразу некалькі прома-банераў. Адкуль такі бум?
«Рэклама казіно проста ўсюды»
Рэклама азартных гульняў у сталіцы цяпер на кожным кроку.
«На кожным трэцім білбордзе рэклама анлайн-казіно, у кожным ліфце рэклама анлайн-казіно, на кожным прыпынку рэклама анлайн-казіно… Гэта сумна», — піша гараджанін у Threads.
«Мінск і ўся Беларусь пакрыліся рэкламай анлайн-казіно, букмекераў і іншых ставак на спорт, а па сутнасці — аўтаматызаваных схем адымання грошай у насельніцтва», — каментуе іншы.
«Замест таго, каб рэкламаваць добрых працадаўцаў, добрыя курсы, у нас на кожным кроку рэкламуюць казіно. П — прыярытэты».
Адна жанчына нават прыгадала гісторыю: яе 10‑гадовы ўнук па памяці паўтараў рэкламныя лозунгі анлайн-казіно, якія бачыў у горадзе. «І потым хочам, каб дзеці не гулялі», — заўважыла яна.
У 2024 годзе такая рэклама з'явілася і на Нацыянальнай бібліятэцы.
Рэкламай анлайн-казіно і бэцінгавых кампаній незадаволеная і адыёзная прарасійская актывістка Вольга Бондарава.
«Спачатку дзяржава падсаджвае на казіно, а потым дзеці не ведаюць, як выруліць, і ідуць у закладчыкі!» — скардзілася яна.
«Кампаніі змагаюцца за новых гульцоў»
Па словах Кацярыны, эксперткі па маркетынгу ў бэцінгавых і гэмблінгавых кампаніях (першыя прымаюць стаўкі на спорт і іншыя падзеі, другія ўяўляюць сабой анлайн-казіно), за апошнія гады ў Беларусі аператараў стала больш, і разам з гэтым вырасла канкурэнцыя. Але гэта адбылося не толькі ў нашай краіне — такая тэндэнцыя агулам у рэгіёне.
«Маркетынг у сферы гэмблінгу і бэцінгу заўсёды быў дастаткова агрэсіўным. Гэта звязана з высокай канкурэнцыяй: кампаніі змагаюцца за новых гульцоў і стараюцца ўтрымліваць цяперашніх.
Працуе просты прынцып: «вядомая кампанія — ёсць грошы — хутчэй за ўсё, не падмане з выплатамі». Таму брэнды актыўна інвестуюць у вонкавую рэкламу, анлайн-прасоўванне, бонусныя акцыі», — тлумачыць экспертка.
Сярод найбольш прыкметных гульцоў беларускага рынку сёння — Betera (раней Parimatch), Maxline, Favbet BY, Marathonbet і BetCity.
Пры гэтым у Беларусі дзейнічаюць абмежаванні: рэклама анлайн-казіно не можа гарантаваць выйгрыш або выкарыстоўваць прамыя заклікі кшталту «зрабі стаўку і атрымай». Таму кампаніі выбіраюць больш абцякальныя фармулёўкі — «паспрабуй, выпрабуй поспех».
Акрамя банераў і ролікаў, мінчукі ўсё часцей бачаць і мерапрыемствы, арганізаваныя бэцінгавымі кампаніямі — ад канцэртаў да спартыўных гульняў. Гэта, як тлумачыць Кацярына, працуе хутчэй на пазнавальнасць і імідж, чым на прыцягненне новых кліентаў.
«З ростам колькасці анлайн-карыстальнікаў і развіццём мабільных сэрвісаў павялічваецца і колькасць кліентаў у аператараў. Асабліва гэта прыкметна сярод тых, хто цікавіцца спортам: live-бэцінг стаў часткай лайфстайлу.
Для многіх гэмблінг — гэта не толькі гульня на грошы, але і спосаб зняць стрэс, элемент вольнага часу. За апошнія 4‑5 гадоў гэты сегмент стаў больш звыклым і сацыяльна прыкметным», — кажа Кацярына.
Індустрыя казіно актыўна пачала развівацца ў Беларусі ў 1990‑я. У нашай краіне абмежаванні для гульнявога бізнэсу не былі моцнымі адносна суседзяў, і ўжо ў 2000‑х у Мінск і іншыя гарады сталі прыязджаць «казіно-турысты».
У чэрвені гэтага года ў Беларусі ўвялі новыя абмежаванні на працу анлайн-казіно: цяпер для рэгістрацыі на партале трэба прысутнічаць у кампаніі фізічна ці сазвоньвацца з менеджарамі па відэасувязі. Забаронена ствараць больш за адзін акаўнт і ўдзельнічаць у гульні па просьбе іншых людзей.
«Наша Нiва» — бастыён беларушчыны
ПАДТРЫМАЦЬ
Каментары
Адпаведна размяшчэнне рэкламы іх корміць.
А як апасля 2020 г. ІТ-дзяржава ўзяла курс на ўсялякія скамы і адмыйныя канторы з усяго былога СССР, то каму яшчэ тут быць?