Знайшлі першую зялёную зорку. Раней лічылася, што такіх не бывае
Астраномы ўпершыню адшукалі зорку, якая мела б зялёны колер, калі б на яе можна было паглядзець зблізку. Як такое магчыма?
Звычайна колер зоркі залежыць ад тэмпературы яе паверхні. Халаднейшыя зоркі выглядаюць аранжавымі, гарачэйшыя — белымі, як наша Сонца, а самыя гарачыя маюць блакітнаватае адценне. Доўгі час навукоўцы меркавалі, што тое самае правіла дзейнічае і для белых карлікаў.
Аднак, як піша The Independent, даследаванне астраномаў з Уорыкскага ўніверсітэта ў Вялікабрытаніі паказала, што колер гэтых зорак можа залежаць не толькі ад тэмпературы, але і ад хімічнага складу іх атмасферы.
Белыя карлікі адрозніваюцца надзвычай высокай шчыльнасцю. У некаторых з іх нават рэчыва ў атмасферы можа мець шчыльнасць, параўнальную са шчыльнасцю вады. У такіх умовах змяняецца ўзаемадзеянне хімічных элементаў з плазмай і тое, як яны паглынаюць святло на розных даўжынях хваль. У выніку колер зоркі залежыць не толькі ад тэмпературы, але і ад складу яе атмасферы.
Зоркі з вялікай колькасцю вугляроду могуць выглядаць ружовымі або фіялетавымі, а тыя, у атмасферу якіх трапілі рэшткі старых планетных сістэм, жоўтымі. Больш халодныя белыя карлікі з атмасферай з вадароду і гелію могуць мець сіняе адценне.
Але найбольш даследчыкаў здзівіў белы карлік WD J1330+6435 з тэмпературай каля 4000 градусаў Цэльсія. У яго атмасферу трапіла камяністае рэчыва з планетнай сістэмы, цэнтрам якой ён калісьці быў. Разам з ім у атмасферы з'явіліся кальцый, літый і натрый.
Менавіта натрый, як высветлілі навукоўцы, адыграў ключавую ролю ў незвычайнай афарбоўцы зоркі. Ён паглынае аранжавую частку спектра, у выніку чаго святло белага карліка набывае жаўтавата-зялёнае адценне.
Даследчыкі таксама знайшлі зорку, якую лічаць самай чырвонай з вядомых. Белы карлік WD J1011+2845 знаходзіцца прыкладна за 48 светлавых гадоў ад Зямлі. Вуглярод, які падымаецца да яго паверхні, змяняе спектр выпраменьвання так, што зорка павінна выглядаць насычана-ружовай.
Пры гэтым большасць белых карлікаў усё ж застаюцца белымі. З 151 зоркі, даследаванай навукоўцамі ў радыусе прыкладна 65 светлавых гадоў ад Зямлі, толькі пяць мелі незвычайную афарбоўку: дзве аказаліся жоўтымі, тры — ружовымі. Астатнія 146 у сярэднім мелі халоднае белае адценне.
Цяпер чытаюць
«Запрасіў мяне на спатканне і прыехаў на яго з пакетам памідораў замест кветак». Што ўспамінаюць пра Яна Памедора Рэуцкага, адміна шматтысячнай суполкі беларусаў Польшчы55
Каментары
калі б
сучасная навука, яна такая