200 расійскіх вайскоўцаў будуць сёлета задарма адпачываць у беларускіх санаторыях

Дзве сотні расійскіх вайскоўцаў, сярод якіх — удзельнікі вайны ва Украіне, змогуць атрымаць пуцёўкі ў беларускія санаторыі ў 2026 годзе задарма. За такое «аздараўленне» возьмуцца тры беларускія санаторыі, паведамляе «Радыё Свабода».

Пра гэта стала вядома ў выніку праведзенага 20 сакавіка ў Маскве паседжання конкурснай камісіі Пастаяннага камітэта так званай Саюзнай дзяржавы Беларусі і Расіі. На ім вызначалі пераможцаў адкрытага тэндару, абвешчанага гэтай установай на права аказання паслуг «арганізацыі санаторна-курортнага лячэння ветэранаў і інвалідаў Вялікай Айчыннай вайны і баявых дзеянняў» у 2026 годзе.

Пачынаючы з 2011 года, такія паслугі, згодна з пастановай Савета Міністраў Саюзнай дзяржавы, надавалі толькі беларускім і расійскім ветэранам і інвалідам, што ўдзельнічалі ў Другой сусветнай вайне. Але 24 лістапада 2022 года, ужо пасля пачатку поўнамаштабнай расійскай агрэсіі ва Украіне, у тэксце пастановы змянілі фармулёўкі. Туды дадалі шырэйшае паняцце — «ветэран баявых дзеянняў». Гэта значыць, што ў пералік тых, хто мае права атрымоўваць бясплатныя пуцёўкі ў санаторыі Беларусі і Расіі, трапілі ўсе расійскія вайскоўцы, што ўдзельнічалі ў вайне ва Украіне.

За лячэнне такія вайскоўцы нічога не заплацяць. Фінансуюцца пуцёўкі за кошт бюджэту Саюзнай дзяржавы, які ў сваю чаргу напаўняецца з бюджэтаў Беларусі і Расіі. На гэта прадугледжана выдаткаваць 33,6 мільёна расійскіх рублёў (прыкладна 415 тысяч даляраў).

Згодна з інфармацыяй з дзяржаўнага расейскага тэндару, дакументы з пацверджаннем гатоўнасці аказаць паслугі лячэння і рэабілітацыі ў конкурсную камісію даслалі тры беларускія санаторыі і адзін расійскі. Так, пра жаданне засвоіць усю вылучаную на праграму суму і вылучыць 400 пуцёвак для ветэранаў пагадзіўся Лепельскі вайсковы санаторый, засвоіць частку грошай і надаць 120 пуцёвак — баранавіцкі санаторый «Чабарок», 40 пуцёвак — мінскі санаторый «Сасновы бор» адкрытага акцыянернага таварыства «Белдзяржздраўніца». 250 пуцёвак гатовы даць расійскі кардыялягічны санаторны цэнтр «Переделкино».

Паводле канчатковага дакументу конкурснай камісіі, апублікаванага 23 сакавіка 2026 году, прынята рашэнне ўва ўсе чатыры санаторыі выдаць 361 пуцёўку, з якіх 201 пуцёўка — у тры беларускія. Лепельскаму вайсковаму санаторыю нададзена права «аздараўлення» 155 ветэранаў, баранавіцкаму санаторыю «Чабарок» — 26 і мінскаму санаторыю «Сасновы бор» — 20 вэтэранаў.

Сярод паслуг, якія мусяць забяспечыць беларускія санаторыі: дыягнастычная, лячэбна-аздараўленчая, рэабілітацыйная дапамогі, арганізацыя вольнага часу, правядзенне «заездаў і мерапрыемстваў па тэматыцы Саюзнай дзяржавы». За свой уласны кошт санаторыі маюць даставіць ветэранаў ад бліжэйшага вакзалу ці аэрапорту, правесці экскурсіі «па мясцінах баявой славы», а таксама раздрукаваць групавое «фота на памяць».

У Лепельскі вайсковы санаторый расійскія вайскоўцы прыязджалі і ў 2024 і 2025 гадах.

• 1
• 0
• 0
• 1
• 0
• 0
• 6
• 0