У Мінску за $6000 прадаюць манету з 1990-х, з якой адбылася неверагодная хімічная рэакцыя
На платформе «Куфар» з'явілася незвычайная прапанова з прыватнай калекцыі — расійская пяцірублёвая манета 1998 года, якая, як мяркуецца, пасля чаканкі была падвергнутая магнітна-імпульснаму абцісканню. Прынамсі, такое ўладальніку сцвярджаюць некалькі платных версій штучнага інтэлекту.
Аўтар аб'явы сцвярджае, што манета магла быць апрацаваная з дапамогай так званага магнітнага «шрынкера». Звычайную ўжо адчаканеную манету змясцілі ў невялікую шматвітковую шпульку — саленоід. Пасля таго ў гэту шпульку на вельмі кароткі час разрадзілі магутную батарэю высакавольтных кандэнсатараў.
У выніку ўзнік імпульс току сілай у дзясяткі або нават сотні тысяч ампераў. Хутка зменлівае магнітнае поле шпулькі выклікала ў манеце магутны віхравы ток. Паводле закона Ленца, яго магнітнае поле супрацьдзейнічала полю шпулькі.
З-за гэтага па ўсёй вонкавай акружнасці манеты ўзнікла вельмі моцная сіла, накіраваная да цэнтра. Манета сціснулася адначасова па ўсім перыметры, а не з аднаго боку. Сам працэс у падобных эксперыментальных устаноўках можа займаць усяго дзясяткі мікрасекундаў.
Менавіта таму манета захавала амаль ідэальна круглую форму: уздзеянне было сіметрычным па ўсёй акружнасці.
Пры гэтым манета стала меншай у дыяметры і таўсцейшай. Метал пры такой апрацоўцы фактычна не знікае, таму маса застаецца практычна такой жа. Калі плошча круга памяншаецца, той жа аб'ём металу павінен перамясціцца ў таўшчыню.
Іншымі словамі, манета не «сохне» на атамным узроўні, а пластычна перафарміроўваецца: дыяметр памяншаецца, а метал выціскаецца ўверх і ўніз, павялічваючы таўшчыню.
Па словах уладальніка, малюнак на манеце таксама паменшыўся прапарцыйна. Гэта азначае, што гаворка ідзе не пра новую паменшаную матрыцу для чаканкі, а пра першапачатковы малюнак, які сціснуўся разам з самім металам.
Звычайны бытавы электрамагніт, трансфарматар або пастаяннае магнітнае поле такога эфекту стварыць не могуць. Для гэтага неабходная спецыяльная імпульсная ўстаноўка з высакавольтнай кандэнсатарнай батарэяй і магутным саленоідам. Пры такіх эксперыментах працоўная шпулька можа сама разбурыцца з-за велізарных механічных нагрузак, таму абсталяванне размяшчаюць у трывалай ахоўнай камеры.
Аўтар аб'явы лічыць, што тое, што ў яго ёсць — сапраўдная расійская пяцірублёвая манета 1998 года, якая ўжо пасля чаканкі была падвергнутая магнітна-імпульснаму абцісканню. Прытым гэта не вытворчы брак расійскага Манетнага двара, а эксперыментальна перароблены нумізматычны прадмет.
Заяўленая маса манеты — 6,51 грама. На думку яе ўладальніка, гэта добра адпавядае версіі аб захаванні асноўнай колькасці металу пасля сціскання.
Асобна аўтар аб'явы звяртае ўвагу на радыяльныя лініі, якія з'явіліся на паверхні манеты. Паводле яго слоў, яны ўтвараюцца ў працэсе дэфармацыі і з'яўляюцца ўнікальнымі: нават дзве аднолькавыя манеты, апрацаваныя ў аднолькавых умовах, не будуць мець цалкам аднолькавага малюнка такіх ліній.
Таму прадавец называе манету рэальным нумізматычным унікальным артэфактам, які вельмі цяжка знайсці ў звычайным продажы, і падкрэслівае, што такая манета можа стаць адзіным падобным экзэмплярам у прыватнай калекцыі. Хоча ён за яе пакуль што 18 100 рублёў, але гатовы абмяркоўваць цану з сапраўды сур'ёзнымі і зацікаўленымі людзьмі.
Цяпер чытаюць
«На такую х**ню павялася». Расіянка прыехала з Сібіры ў Беларусь і цяпер з мацюкамі расказвае, як тут складана жыць32
Каментары