«Babry» adpieli svajo

U Babrujsku prajšoŭ festyval «Rok za babroŭ». Jon prynios masu stanoŭčych uražańniaŭ i sensacyjnuju navinu. A ź Ministerstva kultury byŭ atrymany aficyjny dakument, što ministerstva ničoha nia maje suprać vystupu biełaruskich rok-hurtoŭ.

Miesca praviadzieńnia festu nie było vypadkovym. U Babrujsku raźmiaščajecca brovar «Siabar», jaki vyrablaje hatunak piva «Babroŭ». Pa prykładzie znanych rasiejskich pivavaraŭ, jakija ŭkładajuć hrošy ŭ rok-muzyku, babrujcy vyrašyli zrabić niešta padobnaje ŭ dačynieńni da ajčynnych muzykaŭ. Symbalična, što adkryvaŭ siamihadzinny kancert na płoščy la haradzkoha Pałacu mastactvaŭ ansambl «Siabry». Anatol Jarmolenka & Co byli adzinym kalektyvam, udzieł jakoha biez prablem byŭ uchvaleny miascovymi instancyjami. Reštu biaźlitasna vykraślili sa śpisu. Siarod niepažadanych akazalisia «Neŭra Dziubel», «Krama», «N.R.M.» i navat «apalityčnaja» «Krambambula». I tolki paśla taho, jak ź Ministerstva kultury byŭ atrymany aficyjny dakument, što ministerstva ničoha nia maje suprać pradstaŭlenaha śpisu vykanaŭcaŭ, pierad hurtami zapaliłasia zialonaje śviatło. Navat dali dazvoł na vystup hurtu «Zet».

Publiki na haradzkoj płoščy sabrałasia šmat, choć plac zusim nie nadajecca da rok-kancertaŭ: huk adbivaŭsia ad domu nasuprać, a tamu narmalna słuchać muzyku možna było tolki pad samaj scenaj.

Muzykaŭ čakaŭ lozunh «Za Biełaruś!», prymacavany na avanscenie. Alaksiej «Stoks» rašuča zajaviŭ: «My pryjechali vykonvać muzyku, a nie vystupać pad niejkimi lozunhami». Tym bolš, što kancert byŭ za ratavańnie babroŭ, jakich vykraślili z Čyrvonaj knihi. Urešcie lozunh prybrali.

Pierad babrujcami vystupali «Indyha», Alaksiej Šadźko ź «Siastroj», «Madera hard-bluz», «Slang», «Flat», «IQ-48», «Svet Boogie Band» i «Stoks». U cełym kancert atrymaŭsia vielmi prystojny pa ŭzroŭni i raznastajny pa stylistycy. Praŭda, padałosia, što miascovaja publika praktyčna nia viedała muzykantaŭ, za vyniatkam apošnich. Reahavała jana davoli strymana, razvarušyć jaje zdoleli chiba što muzyki «Svet'u», jakija pakazali sapraŭdnaje sceničnaje šoŭ. Vioŭ fest u niepaŭtornaj maniery Lavon Volski, što prybyŭ u Babrujsk unačy z Homielu, dzie taksama vystupaŭ.

Vysnova: usio zaležyć ad ludziej na miescach. Tam, dzie imknucca pierastrachavacca, kulturnaje žyćcio atrymlivaje perspektyvy začachnuć. I naadvarot: dziakujučy «Roku za babroŭ» babrujskaja publika adkryła dla siabie nacyjanalnuju rok-muzyku. Prynamsi, paśla kancertu natoŭp moładzi atačyŭ aŭtobus z muzykantami, kab uziać aŭtohrafy.

Praŭda, nazva «festyval» padałasia pakul što avansam. Budziem spadziavacca, što nastupnym razam fest projdzie minimum na miesiac raniej, kali nia letam, dy budzie praciahvacca jak minimum dva dni. Voś tady my i atrymajem sapraŭdny rok-festyval.

∎

Rok-karanacyja adrodzicca

Jak paviedamiŭ dyrektar «Klas-klubu» Hienadź Šulman, što ŭdzielničaŭ u praviadzieńni festu, paśla dvuchhadovaha pierapynku musić adnavicca «Rok-karanacyja». Da Jurja Cybina, uładalnika pravoŭ na ideju cyrymonii, i «Klas-klubu» jak jaje arhanizatara, napeŭna, dadasca kampanija «Siabar». Adnoj z pryčyn, jakija zmusili adradzić cyrymoniju, sp.Šulman nazvaŭ toj fakt, što za dva hady na ajčynnaj scenie źjaviłasia značnaja kolkaść cikavych kalektyvaŭ. Dla jaho sapraŭdnym siurpryzam stali vystupy «IQ-48» i «Svet Boogie Band», a taksama «Stoksu». Adnosna apošniaj zhodny ź im całkam: «Stoks» zusim nievypadkova zakryvali kancert pad huki šykoŭnaha fajerverku, pakazaŭšy, što televizijnaje ŭvasableńnie kalektyvu i jaho sapraŭdnaje kancertnaje abličča — rečy vielmi roznyja.

• 0
• 0
• 0
• 0
• 0
• 0
• 0
• 0