Ukrainski śpiecnaz nie zmoh vybić rasijskich kamandas sa Słavianska. Turčynaŭ pahražaje zadziejničać armiju. Tusk i Łukašenka vykazali maralnuju padtrymku Kijevu
Uranku ŭkrainski śpiecnaz źjaviŭsia vakoł Słavianska — stratehičnaha horada na trasie Charkaŭ — Rastoŭ, jaki adrazaje Danieck i Łuhansk ad centra krainy.
Śpiecnaz zaniaŭ dva błokpasty na darohach, ale dalej natknuŭsia na supraciŭ. Rasijskija kamandas, što zaniali administratyŭnyja budynki i klučavyja pazicyi ŭ horadzie, pačali adstrelvacca.
Adzin aficer hrupy «Alfa» SBU byŭ zabity. Jašče piać paraniena.
Heta spyniła prastoŭvańnie śpiecnazaŭcaŭ.
Siły, viernyja kijeŭskamu ŭradu, praktyčna nijak nie prajavili siabie i ŭ inšych haradach Danbasa. Patryjatyčnyja siły Danieččyny na čale z hubiernataram Tarutam zastajucca sam-nasam z uzbrojenymi sieparatystami.
Siły śpiecnaza ŭ Słaviansku byli ścipłymi. U ich było siem BTRaŭ, niekalki aŭtamabilaŭ «Urał». Ich padtrymlivali viertaloty. Ale ci było ŭ ich na ŭzbrajeńni štości akramia aŭtamataŭ — niajasna.
Uviečary v.a. prezident Turčynaŭ abvieściŭ, što da SBU dałučycca armija.
Čynoŭniki Danieckaj abłasnoj administracyi, što zajmaje niejtralnuju pazicyju, zajaviła, što ahułam u mitynhach sieparatystaŭ biaruć udzieł prykładna 10 tysiač čałaviek. «U nas u horadzie 150 tysiač vybarcaŭ, a ŭ vas na mitynh sabrałasia 500 čałaviek», — kaža na videa važaku sieparatystaŭ mer zachoplenaha Kramatorska, ad jakoha patrabavali łajalnaści. Adnak źjaŭleńnie rasijskich dyviersijnych i raźviedvalnych hrupaŭ, tak zvanych «zialonych čałaviečkaŭ», halvanizavała radykalnyja elemienty.
Finansuje sieparatystaŭ syn Viktara Janukoviča Alaksandr i, mahčyma, miljarder Rynat Achmietaŭ.
Situacyja zastajecca tryvožnaj i ŭ Charkavie, dzie siońnia čarhovy raz sieparatysty napali na mitynh ukrainskich patryjotaŭ. Jość paranienyja. Heta nahadała padziei dvuchdzionnaj daŭniny ŭ Daniecku, kali byŭ zabity ŭkrainiec-demanstrant, pres-sakratar partyi «Svaboda».
Situacyja ŭ Charkaŭskaj vobłaści charaktaryzujecca tym, što bolšaść nasielnictva tam ukraincy i chacieli b zachavańnia adzinaj Ukrainy, a voś milicyja była ciesna źviazanyja z byłym režymam Janukoviča i, adpaviedna, chacieła b viartańnia staroha režymu.
Pucin blizki da taho, kab adkraić druhi kavałak ukrainskaha salami. Heta Danieckaja i Łuhanskaja vobłaści, dzie, jak i ŭ Krymie, 85% ludziej hałasavali za Janukoviča i dzie rasiejskaja mova, jak i ŭ Krymie, panuje.
Dalej lažać Charkaŭ i Adesa, dzie dola etničnych rasiejcaŭ mienšaja za 30%, za Janukoviča hałasavali tolki 70% i značnaja dola nasielnictva addaje pieravahu ŭkrainskaj movie i ličać siabie ŭ dušy ŭkraincami.
Uviečary niadzieli ŭłady Kijeva abvieścili, što adpraŭlajuć u Słaviansk reziervavy bataljon Nacyjanalnaj hvardyi — paŭvajennaje ŭtvareńnie, stvoranaje z aktyvistaŭ Majdanu.
Heta ŭsiaho 350 čałaviek, ale heta, mahčyma, adzinaja pakul bajazdolnaja siłavaja adzinka centralnaha ŭrada.
Zbrojna abaraniać Danbas ukraincam składana i sa stratehičnaha punktu hledžańnia. Heta vystup, z troch bakoŭ atočany Rasijaj.
Polski premjer Donald Tusk zajaviŭ siońnia, što «Pucin spynicca tam, dzie dazvolić Ukraina».
«Ukraincy raniej dziejničali racyjanalna, choć i nie viedaju, jak jany vyznačyli sabie miažu ŭstrymańnia ad vostraj reakcyi. Adnak mnie zdajecca, nadyšoŭ momant, kali ŭkrainskaja dziaržava pavinna dziejničać rašuča, kab pakazać, što nie ŭsprymaje takoha rodu dziejańniaŭ», — zajaviŭ Tusk.
Jon adznačyŭ, što zhodny z pazicyjaj ŭkrainskaj ułady adnosna «ŭsprymańnie sieparatystaŭ na ŭschodzie Ukrainy jak terarystaŭ».
«Pucin spynicca tam, dzie dazvolić Ukraina. Tamu Kijeŭ maje ŭziać spravy ŭ svaje ruki i sam vyrašać, kali pačnie zmahacca za terytaryjalnuju cełasnaść krainy i jakija srodki jon budzie vykarystoŭvać», — padkreśliŭ kiraŭnik polskaha ŭrada.
Maralnuju padtrymku kijeŭskamu ŭradu vykazaŭ i kiraŭnik Biełarusi Alaksandr Łukašenka. Łukašenka kateharyčna vystupiŭ suprać fiederalizacyi Ukrainy. Jon nazvaŭ jaje strašnaj pahrozaj dla stabilnaści ŭsiaho rehijona.
Jon taksama čarhovy raz raskrytykavaŭ byłoha prezidenta Ukrainy Viktara Janukoviča. Heta na im lažyć vina za sotniu zabitych na Majdanie skazaŭ jon. Łukašenka taksama vysoka acaniŭ v.a. prezidenta Ukrainy Alaksandra Turčynava. Jahonyja słovy prahučali jak zaklik da ŭkraincaŭ hurtavacca vakoł adzinstva krainy i jaje dziejnaha kiraŭnictva.
U archivach SBU znajšlisia dakumienty, jak savieckija śpiecsłužby zavierbavali emisara AUN, ale ŭkrainskaje padpolle heta vykryła i zabiła zdradnika88
Kamientary