Babior smačny? Pacuk sa śpiecyjami taksama — smakata: bolš za 10 tysiač čałaviek padpisalisia suprać kaŭbasy z babra
Na sajcie change.org zapuścili pietycyju suprać vytvorčaści kaŭbasy ź miasa babra. Jaje padpisali ŭžo 10 500 čałaviek. Aŭtar pietycyi źbirajecca nakiravać jaje ŭ Ministerstva sielskaj haspadarki i charčavańnia.
«Nie pačynajcie vytvorčaść kaŭbasy i sałaniny z babroŭ, — zaklikaje aŭtar pietycyi. — Ja, jak i maje siabry, viehietaryjaniec. My suprać hetaha. Usie viehietaryjancy Biełarusi suprać hetaha! I nie tolki viehietaryjancy.
Luby razvažny čałaviek budzie suprać! Kali my pačniem vypuskać takija pradukty, to što budzie dalej? Z patrebnymi śpiecyjami,iak kaža načalnik Minsielhasa, babior smačny! Pacuk taksama budzie smačny. Bolš taho, pa hetaj łohicy, čałaviek taksama budzie smačny! Mała ježy? Ludzi biez babroŭ chodziać hałodnyja i sumnyja? Chopić i taho, što ludzi inšych žyvioł zabivajuć.»
«Składvajecca karcina, što ludzi — monstry. Monstry, jakija nie ŭmiejuć dumać i dumać razumna. Monstry, jakija prosta biaruć i zabivajuć, kali im niešta nie padabajecca», — skazana ŭ zvarocie.
Aŭtar upeŭnieny, što kali pietycyja spracuje, to heta daść mahčymaść usim pierakanacca, što «u ludziej zastałasia choć niejkaja kropla čałaviečnaści».
Ideja zapuścić u vytvorčaść tušu hryzuna naležyć Ministerstvu lasnoj haspadarki. Tam rastłumačyli, što babroŭ u nas chapaje. Da taho ž, miasa hryzunoŭ vielmi karysnaje. Pieršy čas vypuskać kaŭbasu i tušonku ź miasa babra buduć u abmiežavanaj kolkaści.
Pa aficyjnych dadzienych, papulacyja babroŭ u Biełarusi naličvaje bolš za 60 tysiač asobin, a pa nieaficyjnych — kala 80 tysiač.
Navukoŭcy śćviardžajuć, što babry zasialili praktyčna ŭsie mielijaracyjnyja kanały krainy. Źviarki pieraškadžajuć sadoŭnikam i aharodnikam, bo budaŭnictva płacin pryvodzić da zatapleńnia terytoryj.
Načalnik adździeła palaŭničaj haspadarki Minlashasa Siarhiej Šastakoŭ raspavioŭ «Zialonamu partału», da jakich nastupstvaŭ dla papulacyi moža pryvieści rašeńnie vyrablać ź miasa hryzunoŭ kaŭbasu i tušonku.
— U ciapierašni čas, pa daśledavańniach, jakija ja pravodžu, možna zaklučyć, što kolkaść źviera istotna źniziłasia ŭ paraŭnańni z 2013 i 2014 hadami. Na niekatorych učastkach — na 40-50% ad kolkaści babra ŭ 2013 hodzie. Dla acenki limitaŭ kanfiskacyi žyvioł treba kiravacca pryrostam papulacyi. U cełym u Biełarusi ŭ 2014 hodzie zdabyvałasia kala 6000 asobin. Zdabyča žyvioł zvyš isnujučych limitaŭ moža niehatyŭna adbicca na papulacyi, — pieraściaroh vučony.
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary