Dziaržaŭnaje ahienctva BiełTA i «SB» dali słova italjanskamu šarłatanu-antyvakcynistu
U samoj Italii na «prafiesara» — jaki na samoj spravie nie prafiesar — asacyjacyja navukoŭcaŭ za hetyja zajavy padała zajavu ŭ prakuraturu.
Pieršaje, što kidajecca ŭ vočy, — heta spasyłki BiełTA i «SB» na krynicu infarmacyi: trendru.net. Heta i nie navukovy partał, i nie jakasny ŚMI, a ahrehatar klikbiejtnych zahałoŭkaŭ kštałtu «Złodziei raźbiahajucca, kali bačać hetaha chłopčyka». Hety sajt nie pradukuje ŭłasnaha kantentu, i kali my piarojdziem pa spasyłcy, to my vyjdziem na pierakaz materyjału z marhinalnaha italjanskaha videabłoha.
Nu a chto ž taki Stefana Mantanary, jakoha BiełTA i «SB» nazyvajuć «prafiesar z 40-hadovym stažam pracy ŭ apieracyjnych»? Šukajem — infarmacyi pra jaho niama ni ŭ encykłapiedyjach, ni navat u Vikipiedyi. Znachodzim tolki na jaho ŭłasnym sajcie. Hety 70-hadovy italjaniec navat pa ŭłasnym śćviardžeńni nie tolki nie «prafiesar», jak jaho až siem razoŭ u karotkim tekście nazyvajuć BiełTA i «SB», i navat nie kandydat navuk, a ŭsiaho tolki vypusknik adździaleńnia farmaceŭtyki ŭniviersiteta horada Modena. Zrešty, i jaho śćviardžeńnie pra najaŭnaść u jaho niejkaha dypłoma jašče zasłuhoŭvała b pravierki.
Internet utrymlivaje nie tak šmat uzhadak pra Mantanary, ale jany charakternyja. Naprykład, u 2014 hodzie jon zapisaŭ videabłoh pad nazvaj, ad jakoj stynie duša: «Žachlivaja praŭda pra vakcyny», u jakoj jon nazyvaje vakcynacyju dziaciej pryčynaj aŭtyzmu.
Pošuk na «Stefano Montanari» vyvodzić nas i na adzin niadaŭni dakumient. Heta zajava italjanskaj asacyjacyi «Il patto trasversale per la scienza». Asacyjacyja padała zajavu ŭ prakuraturu Modeny, u jakoj prosić zavieści suprać Mantanara kryminalnuju spravu akurat za jaho apošnija, sakavickija videa, adno ź jakich za pasiarednictvam rasijskaha śmiećcievaha sajta trapiła na biełaruski dziaržaŭny partał. Italjanskaja asacyjacyja miarkuje, što raspaŭsiud takoj łuchty, pazbaŭlenaj usialakaj navukovaj bazy, moža nanieści škodu zdaroŭju ludziej u vyniku niedaacenki imi niebiaśpieki pandemii.
A što śćviardžaje «prafiesar»? Mantanary pierakonvaje, što vakcyna ad karanavirusa nie moža być stvoranaja ŭ pryncypie — choć i kitajskija, i amierykanskija, i jeŭrapiejskija navukoŭcy vyjšli ŭžo na etap vyprabavavańniaŭ vakcyny, jakaja stvarajecca pa anałohii z vakcynami ad hrypu, Eboły i lubych inšych virusaŭ.
Mantanary taksama ličyć, što nasić palčatki ci maski, u tym liku i miedykam, biessensoŭna — choć i SAAZ, i biełaruskaje Ministerstva achovy zdaroŭja adnaznačna rekamiendujuć advarotnaje.
Mantanary miarkuje, što treba vieści zvyčajny ład žyćcia. Jon śćviardžaje, što ŭ Italii ad karanavirusa pamierła ŭsiaho try čałavieki. A astatnija pamierli ad inšych chvarob, prosta ŭ ich «taksama byŭ karanavirus». Mantanary davodzić, što karanavirus nie ŭjaŭlaje pahrozy, a mif pra jaho vydumali peŭnyja siły, kab atrymać ad hetaha ekanamičnuju vyhadu.
Antynavukovyja mierkavańni Mantanary pieradrukavali rasijskija nacyjanalistyčnyja resursy, prahnyja da teoryj zmovy, takija, jak telekanał «Carhrad» i rasijskaja «Komsomolskaja pravda». A za imi — BiełTA, «Sovietskaja Biełoruśsija» dy inšyja miedyjaresursy łukašenkaŭskaj viertykali.
Kamientary