Ličby Minzdaroŭja pa karanavirusie ŭ Dokšycach i Biešankovičach u 3-4 razy razychodziacca ź ličbami, nazvanymi kiraŭnikami vobłaści

Ministerstva achovy zdaroŭja admaŭlajecca sistematyčna publikavać statystyku pra kolkaść vypadkaŭ karanavirusa pa rehijonach Biełarusi. Choć statystyka pa inšych zachvorvańniach, u tym liku virusnych, rehularna publikujecca Biełstatam.

Razam z tym ličby pra kolkaść vypadkaŭ prasočvajucca na roznych uzroŭniach. Časam ich ahučvajuć rehijanalnyja sanepidstancyi, časam — miascovaja presa sa spasyłkaj na hałoŭnych daktaroŭ balnic. Narešcie, statystyku ahučvajuć na pasiadžeńni abłasnoha štaba ŭ Viciebsku.

I hetyja apublikavanyja ličby istotna adroźnivajucca ad aficyjnaj statystyki Ministerstva achovy zdaroŭja.

Čytajcie. Minzdaroŭja: Na Brestčynie 3 čałavieki z karanavirusam. Sanstancyja: U vobłaści 28 stanoŭčych testaŭ

Jaskravy prykład — siońniašniaja situacyja z Dokšycami, Biešankovičami i Loznam.

«U Dokšyckim rajonie zafiksavali 72 vypadki karanavirusa, Biešankovickim — 27, Loźnienskim — 22»,

— zajaviŭ načalnik hałoŭnaha ŭpraŭleńnia pa achovie zdaroŭja Viciebskaha abłvykankama Michaił Višniaviecki padčas pasiadžeńnia abłasnoha štaba. Jaho słovy pieradaje BiełTA. Heta ranišniaje pasiadžeńnie, na im ahučvajucca vyniki pa stanie na 6-ju hadzinu ranicy.

Ministr achovy zdaroŭja Uładzimir Karanik padčas bryfinhu vyrašyŭ taksama prajścisia pa haračych kropkach.

«U Dokšycach 20 pacyjentaŭ z łabaratorna paćvierdžanaj karanavirusnaj infiekcyjaj. U Biešankovičach — 7, u Loźnie — 8», — ahučyŭ śviežuju statystyku ministr praź niekalki hadzin paśla pasiadžeńnia ŭ Viciebsku. Statystyka ministra — heta taja samaja statystyka, pavodle jakoj ahułam u Biełarusi 4779 vypadkaŭ.

Ci mahło być, što Karanik ahučyŭ infarmacyju mienavita pa horadzie, a nie pa rajonie ŭ cełym? Naŭrad ci. Tamu što nichto nie viadzie statystyki pa horadzie asobna, a pa rajonie asobna, kali havorka pra sielskija rajony. Dyj praź niekalki siekund, zhadvajučy situacyju ŭ Miadzieli, ministr kazaŭ ahułam pra «žycharoŭ rajona».

Adkaz tearetyčna moža być u roznych kazuistyčnych farmuloŭkach ci ŭ tym, što infarmacyja z abłaściej sumirujecca ministerstvam tolki praź niekalki dzion.

U jakaści prykładu možna ŭziać situacyju ź nibyta chvorymi na karanavirus 15 rasijanami na budaŭnictvie AES. Ich pieršy test (jak padkreślivałasia, rasijski, niajakasny) daŭ stanoŭčy vynik. Ale ŭsie nastupnyja pakazali, što chvaroby i nie było. I što tady? Infarmacyja pra 15 chvorych rasijan ahučvałasia kiraŭnictvam vobłaści, ale ci trapiła ŭ statystyku Minzdaroŭja? A kali trapiła, to što zrabili paśla, vykraślili ich? 

«Naša Niva» nie atrymała mahčymaści zadać hetyja pytańni padčas bryfinhu Uładzimira Karanika, choć i prasiła pra heta.

Fakt zastajecca faktam: ličby, jakija ahučyła Ministerstva achovy zdaroŭja ŭ piatnicu, u 3-4 razy adroźnivajucca ad ličbaŭ, jakija ŭ toj ža dzień apublikavali struktury na miescach. U bok zanižeńnia.

Praciah temy: Minzdaroŭja patłumačyła, čamu słovy Karanika i abłasnoha kiraŭnictva adroźnivajucca ŭ razy

• 0
• 0
• 0
• 0
• 0
• 0
• 0
• 0